Nopa Centro de Detención de Inmigrantes Curtin, tlen mokaua nechka Derby (Australia Occidental), kinmakak chiknauij Jehová itlajtoltemakauaj se diploma tlen ika kintlaskamatiliaj nopa “nelkuali tekitl tlen kichiuaj” pampa kinpaleuijtokej maseualmej katli kejuak kintsaktokej. San ipan nopa kali tlauel miakej maseualmej itstokej pampa san asitokej ipan nopa altepetl uan amo kipiaj ininama. a

Sejse semana, Jehová itlajtoltemakauaj kinpaxalouaj, kikakij tlen kinpanotok, kinyolchikauaj uan kiniljuiaj tlen Biblia techtenkauilia. Christopher Riddoch, nopa tlayakanketl tlen kinkauilia religiones uan sekinok maseualmej ma kinpaxalokaj katli nopaya itstokej, kiijtok: “Nima nesi kema kinpaxalouaj tlen nopona tsaktokej”. Riddoch kiijtok Jehová itlajtoltemakauaj kinpaleuiaj kuali ma kiyolmatikaj uan ma yolpaktokaj. Ya kiijtoua kema kinpaxalouaj kejuak kiniljuiaj ni tlakamej: “Kena itstok se akajya tlen nelia kikuesoua tlen inmechpano uan kineki kuali xiitstokaj”.

Christopher Riddoch nojkia kiijtok ika nopa diploma tlen kinmakakej Jehová itlajtoltemakauaj kintlaskamatiliaj pampa “kinpaleuijtokej maseualmej katli itstokej ipan nopa kali ma kipatlakaj ininnemilis”. Teipa nojkia kiijtok pampa Jehová itlajtoltemakauaj kichiuaj kampeka tepaleuisej, kinextiaj “kuali itstokej ininuaya ininchampoyouaj, kuali kinmachtiaj ipan inintlanechikol uan ipan ininreligión”.