Maseualmej ipan nochi Tlaltipaktli kinpaleuijtok tlen eltok ipan jw.org. Ma tikitakaj tlen kiijtoua amatlajkuiloli tlen kiselijtoyaj ipan mayo 2014 ipan nopa ueyi kali Betel.

“Kema nokone ualayaya tlen escuela, kiualikayaya lápices, ajauili uan lentes tlen amo eliyaya iaxka. Maske miakpa tikiljuijkej amo kuali tlen kichiuayaya pampa tlachtekiyaya, amo techneltokayaya. Se tonali, tijkixtijkej ipan jw.org, nopa video tlen itoka Amo xitlachteki. ¡Tlauel techpaleuik! Nopa video tlauel kipaleuik tokone. Kema kiitak nopa video kiijtok kinekiyaya kikuepas tlen kiualikatoya tochaj, pampa kikuamachilijtoya toTeotsij amo kipaktia maseualmej ma tlachtekikaj. ¡Tlauel techpaleuik jw.org!” (D. N., África).

“Nokoneuaj kinpaktia jw.org. Pampa nopaya kikixtiaj videos tlen kinpaleuia ma kichiuakaj tlen toTeotsij itlajtol kiijtoua, kej kampa kiijtoua amo ma titlachtekikaj. Nojkia kiyekouaj sekinok kuajkuali tlamantli tlen kinpaleuis teipa uan kichiuas kuali ma monejnemiltikaj” (O. W., las Antillas).

“Na amo nechpaktiyaya nimomachtis, uan ayokmo nijnekiyaya nias escuela. Teipa nijpojki se tlamachtili ipan jw.org tlen itoka ‘¿Debería dejar de estudiar?’. Tlauel nechpaleuik amo nijkauas nimomachtis. Nijpojki kenijkatsa tlen nimomachtis ipan escuela nechpaleuis teipa uan nojkia nechpaleuis kuali ma nijchiua noteki” (N. F., África).

“Tlen kintlajtolmakaj telpokamej ipan jw.org, nechpaleuijtok kuali ma nimonejnemilti ipan noescuela. Nechpaleuijtok nimosentlalis ipan tlen nimomachtia uan amo nimoiljuijtinemis sekinok tlamantli” (G., África).

“Se siuatl katli iuaya nitekiti, nechiljuik se siuapil tlauel kitlaijiljuiyaya isiuapil ipan escuela. Yeka isiuapil tlauel majmauiyaya uan amo yajki escuela se keski tonali. Uajka nikiljuik se keski tlamantli tlen nesi ipan video Ximomanaui maske amo titemakilis, tlen eltok ipan jw.org. Tlauel kipaktik kampa kiijtoua tlaj ixuetskatos tlauel kipaleuis. Teipa kiixtomilik isiuapil tlake ueliskia kichiuas kema kitlaijiljuiskiaj. Kiampa isiuapil kuali momachilik kema sampa yajki escuela. Teipa, isiuapil mouampojchijki iuaya nopa siuapil katli kitlaijiljuiyaya” (V. K., Europa oriental).

“Tlauel niinmechtlaskamatilia nopa tlamachtili ‘¿Por qué siento el impulso de cortarme?’ tlen eltok ipan jw.org. Miak xiuitl nijchijtok nopa. Nimoiljuiyaya san na kiampa nechpanoyaya uan tlaj nikiljuiskia se akajya, amo nechkuamachiliskia. Ipan nopa tlamachtili kiijtoua tlen kinpanotok sekinok, nopa tlauel nechpaleuik. ¡Nama nijmati itstokej sekinok katli kimachiliaj tlen nechpano!” (Se ichpokatl tlen eua Australia).

“Ipan jw.org nijpantia tlamachtili tlen kinpaleuia telpokamej uan ichpokamej. Se tlamachtili nechpaleuik nijkuamachilis tlake kiijtosneki nopa acoso sexual, uajka nijkuamachilik nopa nechpanotoya uan nijmatki tlake kinamikiyaya nijchiuas uan kiampa nimomokuitlauis” (T. W., las Antillas).

“Notelpoka san mauiltijtinemi. Kineki kichiuas miak tlamantli uan kemantika kichiua tlen amo nimoiljuiyaya tlaj kichiuaskia. Yeka nijmati ouij nimonojnotsas iuaya. Se tonali, ipan jw.org nijtlachiliyaya tlamachtili tlen kinpaleuia katli mosenkajtokej uan tetajmej, uan nijpantik miak tlamachtili tlen nechpaleuiskia. Nechpaleuik kuali nimonojnotsas iuaya notelpoka, uan ya nojkia kipaleuik tlen eltok ipan Internet. Nama nechiljuia tlen kiyolmati, tlen kitekipachoua uan nopa kuali tlamantli tlen kipano” (C. B., África).

“Nopa jw.org kinpaleuia tetajmej kuali ma kinmachtikaj ininkoneuaj. Kema kiitakej nopa video tlen kiijtoua kenijkatsa tikinpantisej kuali touampoyouaj, kinpaleuik tokoneuaj kuali ma kitlapejpenikaj ininuampoyouaj tlen kinpaleuisej. Kema tokoneuaj kiixnamikij se tlaouijkayotl, nima tijpantiaj se tlamachtili tlen techpaleuia ipan jw.org. Nopaya onka miak kuajkuali tlajtoli” (E. L., Europa).

“Nosiua uan na tijpiaj chikuasej xiuitl timosenkajkej. Kej kinpano nochi katli mosenkajtokej, monejki tijmatisej kenijkatsa kuali timouikasej, kenijkatsa timonojnotsasej uan kenijkatsa tijmatisej tlen tijyolmatij. Yeka tlauel nechpaktik nopa tlamachtili ipan jw.org ‘Aprenda a escuchar’. Kiijtouayaya kuali tlajtoli tlen techpaleuia kuali ma titetlakakilikaj. Nijpojki nochi uan teipa nijmakak nosiua. Tijchiuaj kampeka tijchiuasej ipan tonemilis tlen nopaya tetlajtolmaka” (B. B., las Antillas).

“Kipia se xiuitl nikinixmati Jehová itlajtoltemakauaj, uan nijneki nikintlaskamatilis pampa kichijkej nopa jw.org. Nijyekojtok miak tlamantli: kenijkatsa amo nikualantiuetsis, kenijkatsa kuali nikiniskaltis nokoneuaj uan kenijkatsa kuali nijyakanas nosiua. Nama uelis nikijtos tlen eltok ipan jw.org nechpaleuik kuali nimouikas iuaya nosiua” (L. G. , las Antillas).

“Tlauel nechpaleuijtok nopa jw.org. Nopa videos ipan tlajtoli señas americano nechpaleuijtok kuali nimonojnotsas ininuaya sekinok. Achtouia, nijmatiyaya ouij nimosentlalis nijchiuas se keski tlamantli. Tlen kiijtouayaya nopa video Ahora veo la Biblia en mi idioma asik ipan noyolo, uan nechpaleuik nimosentlalis ipan tlamantli tlen kuali” (J. N., África).

“Tlauel nijpatiita jw.org. Nikinpaleuia katli amo tlakakij, uan nimosentlalia nikinpaleuis telpokamej katli amo tlakakij. Nochi tlen onka ipan tlajtoli señas nechpaleuijtok kuali nijyekos ni tlajtoli. Nojkia, nikinpaleuijtok sekinok maseualmej kuali ma mouikakaj ininuaya ininuampoyouaj uan ininchampoyouaj” (K. J., las Antillas).

“Na amo nitlachia, uan tlauel nechpaleuijtok tlen eltok ipan jw.org. Tlaj nechtitlaniliskia ipan correo nopa tlamachtili tlen nopaya eltok, uejkauaskia miak metstli. Tlen nijyekojtok ipan jw.org nechpaleuijtok kuali nimouikas ininuaya nochampoyouaj, uan nama ueli nitlapaleuia kampa niitstok. Tlauel niyolpaki pampa kema nouampoyouaj katli kena tlachiaj kiseliaj yankuik amatlajkuiloli, na nojkia nijselia nopa amatlajkuiloli ipan notlajtol” (C. A., Sudamérica).

“Katli amo uelij kipouaj braille o amo uelij kikouaj amochtli ipan braille, nopa jw.org tlauel kinpaleuijtok. Nopa grabaciones tlen nopaya eltok, kinpaleuia katli amo tlachiaj ma kimatikaj miak tlamantli tlen tlauel ipati. Kichijchijtokej jw.org ma kinpaleui nochi maseualmej. Nopa jw.org kinextia kinpatiitaj katli amo tlachiaj uan kichiua kuali ma kiyolmatikaj” (R. D., África).

“Nopa jw.org amo eli sanse kej kampa tlamachtiaj sekinok religiones ipan Internet, pampa ipan jw.org kitekiuiaj tlajtoli tlen nochi uelis kikuamachilisej. Amo ouij kiixtoma nopa tlamachtili, amo kitekiuiaj miak tlajtoli uan amo kiixtoma san maseualmej inintlalnamikilis. Tlen nopaya kiijtoua kinextia amo ouij se tlaneltokas” (A. G., Asia).

Amo kuali nijyolmatiyaya kema ayamo eltoya jw.org. Kema nijtlachilia tlen nopaya eltok, nikita eli kejuak se tlauili katli techpaleuia kuali ma tijkuamachilikaj toTeotsij iTlajtol. Nopaya ueli nijpoua uan nijtlakakilia tlamachtili kampa kiixtoma tlen toTeotsij kipaktia uan nojkia nijpantia tlen nijneki nijmatis” (J. C. , las Antillas).

“Maske niitstok ipan se pilaltepetsi ipan Sudamérica, ueli nijpoua nopa tlamachtili tlen eltok ipan jw.org, yeka tlauel niinmechtlaskamatilia. Tlaj amo eltoskia jw.org amo nijmatiskia tlake nijchiuaskia” (M. F., Sudamérica).