Ipan Diciembre 2012, ne Tailandia Jehová itlajtoltemakauaj kichijkej tlen monekiyaya uan kiampa kinpaleuiskiaj konemej kuali ma momachtikaj ipan escuela. Veinte Jehová itlajtoltemakauaj yajkej ipan escuelas ne Bangkok, mosentilijkej ininuayaj directores, tlamachtianij, uan katli nopaya momachtiaj uan kinmajmakakej pilamochtsi ¡Despertad! tlen metstli Octubre 2012, katli itoka “Cómo aprovechar al máximo la escuela”.

Tlauel kuali kiski tlen kichijkej, yeka teipa mochijki ipan nochi altepetl Tailandia. Ipan se xiuitl uan tlajko, Jehová itlajtoltemakauaj yajkej ipan 830 escuelas. Ni pilamochtsi tlauel kinpaktik tlamachtianij uan nojkia katli nopaya momachtiaj , yeka expa tlajtlankej nojua ma mochijchiua nopa pilamochtsi pampa miakej nojua tlajtlaniyayaj. Achtoui kichijkej san se 30,000 pilamochtsitsij, uan pampa miakej maseualmej kinpaktik monejki mochijchiuas kipano se 650,000 pilamochtsitsij.

Directores uan katli tlamachtiaj nima kiitakej tlauel ipati tlen tlamachtia nopa pilamochtsi ¡Despertad! Se siuatlamachtijketl kiijtok: “Ni amochtli kinpaleuis katli momachtiaj kuali ma mouikakaj ininuaya inintatauaj uan ma kichiuakaj kampeka kichiuasej tlen moiljuijtokej”. Ipan se keski escuelas pejkej ika tlamachtiaj, uan ipan sekinok escuelas pejkej ika kinmachtiaj konemej kuali ma tlapouakaj. Ipan se escuela, kema kichijkej se tekitl, katli nopaya momachtiaj, kitekiuijkej tlamachtili tlen nopa pilamochtsi. Uan katli kuali kichijkej kinmakakej se kuali tlamantli.

Se katli momachtia kitlaskamatki pampa kipaktik nopa tlamachtili “Cómo ganarle la batalla a la obesidad infantil y juvenil”, katli uala ipan nopa pilamochtsi. Nojkia kiijtok miakej maseualmej kipiaj obesidad uan iuampoyouaj amo kinpaktia kamanaltisej tlen nopa tlamantli. Teipa kiijtok: “Tlaskamati pampa intechmakaj tlamachtili tlen uelis techpaleuis uan tlen amo ouij tijkuamachilisej ”

Tetajmej nojkia kitlaskamatkej pampa kiski nopa tlamachtili. Se tenaj kiniljuik ome siuamej katli elij Jehová itlajtoltemakauaj katli kipaxalotoj ichaj, kenijkatsa tlen tetlajtolmaka nopa pilamochtsi kipaleuijtoya isiuapil kuali ma momachti ipan escuela”.

Pichai Petratyotin, se tlen Jehová itlajtoltemakauaj tlen Tailandia, kiijtok: “Nopa amochtli ¡Despertad! kinextia tlen Biblia tlamachtia nochipa uelis techpaleuis maske uejkajkia moijkuilok. Jehová itlajtoltemakauaj tijmati tlauel ipati tlamachtili tlen temakaj ipan escuela, yeka ika miak pakilistli tijmoyauaj ni pilamochtsi uan amo titlainamaj”.