Ipan mayo 6 xiuitl 2017, nechka 130 Jehová itlajtoltemakauaj tlasolpejpenkej ipan kuatitlamitl Bryukhovychi, nechka Lviv, ipan Ucrania. Katli tlapaleuijkej kipixtoyaj 22 uan sekij 80 xiuitl, inijuantij tekitij uan itstokej ipan kali Betel tlen Ucrania, nechka nopa kuatitlamitl. San ipan eyi horas, tlasolpejpenkej ipan se 50 hectáreas uan kisentilijkej nechka 600 kilos tlasoli.

Se ingeniero tlen itoka Mykhailo Splavinskyi, katli kimokuitlauia nopa kuatitlamitl tlen Lviv, kiijtok: “Jehová itlajtoltemakauaj elkej katli achtoui tlapaleuikoj kema titlasolpejpenkej ipan nopa kuatitlamitl kampa sejse xiuitl titlasolpejpenaj. Ipan 2014 inijuantij kipeualtijkej uan sejse xiuitl tlapaleuijtokej”.

Nopa tlakatl Splavinskyi kiijtok: “Onka ome tlamantli tlen kisokiuia nopa kuatitlamitl. Se, pampa maseualmej tlasoltepeuaj uan ome pampa camiones kitepeuaj tlasoli uan sekinok tlamantli”.

Tlasoli kinenpoloua kuatitlamitl. Yeka nopa tlakatl Splavinskyi kiijtoua “nopa tlasoli amo nima nempoliui” uan nojkia “kisokiuia atl uan ajakatl”. Nojkia tepalkatl kichiua ma tlatla kuatitlamitl. Nopa tepalkatl uan jeringas eli tlauel maljuili tlaj nopaya itstokej konemej. Nojkia kiijtoua: “Tlaj titlasolpejpenaj amo panos nopa tlamantli”.

Eli tlauel ouij tlasolpejpenasej ipan se kuatitlamitl tlen kipia 3,300 hectáreas. Nojkia nopa tlakatl kiijtok: “Tlauel ouij tlasolpejpenaj pampa san itstokej makuiltij katli kimokuitlauiaj nopa kuatitlamitl, yeka sejse xiuitl tikintlaneuij sekinok ma techpaleuikaj”.

Jehová itlajtoltemakauaj kitekiuiaj guantes, bolsas uan rastrillos kiampa kipejpenaj botellas, llantas, tepalkatl, tepostli, amatl, plásticos uan jeringas. Se tlamokuitlauijketl katli itoka Ihor Fedak kiijtoua: “Kampa Jehová itlajtoltemakauaj tlasolpejpenkej tlauel kuali mokajki”.

Maske amo kinnauatijkej ma kitlapejpenikaj tepalkatl, amatl uan plástico inijuantij kichijkej, kiampa nopa tlasoli sampa motekiuik. Teipa nopa tlasoli tlen mokajki kiuikakej ipan se empresa. Ipan xiuitl 2016, Jehová itlajtoltemakauaj pejkej tlaxtlauaj kampa kitepeuaj nopa tlasoli. Nopa tlakatl Fedak kiijtoua: “Tlauel nikintlaskamatilia Jehová itlajtoltemakauaj pampa tlauel techpaleuiaj”.

Jehová itlajtoltemakauaj tlauel kinpaktia sejse xiuitl tlapaleuisej, kiampa nopa altepetl uan nopa kuatitlamitl kuali nesij. Volker, se Jehová itlajtoltemakauaj kiijtoua: “Amo nipinaua nitlasolpejpenas, pampa kema nikinpaleuia sekinok kichiua kuali ma nijyolmati”.

Anzhelika kiijtoua: “Amo moneki nijmatis ajkia kitepejki nopa tlasoli, moneki nikitas kanke uelis nijtlalis”. Lois, katli kipia 78 xiuitl, uan nojkia tlasolpejpenki kiijtoua: “Kema nikaj tipaxalouaj uan tikitaj tepejtok tlasoli moneki amo tikualanisej, moneki tijpejpenasej uan tijtlalisej kampa kinamiki”.

Wieslaw nojkia kiijtoua: “Maske maseualmej techitaj kuali timoyoyontiaj kema titlajtolmoyauaj, nojkia timosentlalijtokej titekitisej ipan nopa kuatitlamitl uan ipan sekinok tekitl tlen toaltepe”.