Nopa Tour de Francia edición 103, kampa motlanij ika bicicletas, mochijki ipan julio 2 uan tlanki ipan julio 24, xiuitl 2016. Katli nopaya itstoyaj tlauel majmauiyayaj. Pampa se xiuitl achtoui, ipan nopa altepetl, terroristas kinmiktijkej kipano 100 maseualmej. Uan ipan julio 14 xiuitl 2016, tonali kema nochi iljuichiuaj ipan ni altepetl, se terrorista kinpechik ika se camión miakej maseualmej katli kimauisouayayaj nopa fuegos artificiales ipan altepetl Niza. Kinmiktik 86 maseualmej uan miakej kinkokok.

Pampa maseualmej majmauiyayaj uan monekiyaya ma kinyolchikauakaj, Jehová itlajtoltemakauaj kinejkej kinyolchikauasej ika toTeotsij iTlajtol. Yeka, kampa ueli kitlalijkej carritos tlen kipixtoya miak amochtli. Kipano 1,400 Jehová itlajtoltemakauaj tlapaleuijkej ma mochiua ni tekitl. Temakakej 2,000 amochtli. Kiselijkej, katli kinekiyayaj ma kinnankilikaj se keski tlajtlanili tlen tlauel ipati.

Maseualmej katli kintokilijtiauiyayaj katli motlalouayayaj ipan bicicleta, mosentlachiliyayaj pampa kampa ueli kinitayayaj Jehová itlajtoltemakauaj. Katli tlapaleuijkej ma mochiua nopa Tour de Francia, miakpa kintlaskamatilijkej Jehová itlajtoltemakauaj pampa kuali mokualchijchijkej, uan kiniljuikej: “Kampa ueli initstokej, ipan nochi ojtli”. Nojkia nopa maseualmej katli tlamauisouayayaj kiijtouayayaj: “¡Nikaj nojkia itstokej Jehová itlajtoltemakauaj!”. Se keski tonali teipa kema ya pejtoya motlalouaj, se tlakatl tlen kinejnemiltiyaya se autobús, ika tlatlepanitakayotl kiijtok amo kiseliskia se pilamatsi pampa ya kimakatoyaj naui.

Pampa kampa ueli kiitayayaj carritos, sekij kinejkej kimatisej tlen titlamachtiaj uan pejkej monechkauiaj uan kiselijkej amochtli. Kiampa kipantik se tlakatl tlen tekiti ipan televisión, ya kiilnamiki kinitstoya Jehová itlajtoltemakauaj ipan nopa mauiltilistli se xiuijtlaya. Ipan ni xiuitl monechkauik ipan nopa carrito uan kiuikak nopa amochtli El secreto de la felicidad familiar pampa kipixtoyaj se tlamachtili tlen tlauel kipaktik. Teipa, kema kipojki se kentsi nopa amochtli ipan icarro, kiniljuik iuampoyouaj tlen nopa carritos uan inijuantij nojkia monechkauijkej kampa kitlalijtoyaj carritos pampa nojkia kinejkej amatlajkuiloli.

Sekij maseualmej kinpouilijkej Jehová itlajtoltemakauaj tlen kinpanotok. Se neskayotl, se ichpokatl kiniljuik tlauel mokuesojtoya uan kinekiyaya nopa tonali momajkauas kampa pano tren pampa kinekiyaya momiktis. Uan kema kikajki nopa kuali tlamachtili tlen Biblia kiijtoua uan kenijkatsa tiitstosej kema toTeotsij itlanauatijkayo tekichijtos ipan Tlaltipaktli, kuali kiyolmatki uan kiijtok amo momiktis. Seyok siuatl kiniljuik Jehová itlajtoltemakauaj: “¡Nochipa xijchijtokaj ni kuali tekitl!”.

Se tlakatl tlen kitekiuia muletas, kiijtok amo kinkamauiaj tlen amo kinixmati, maske kiampa kiijtok, kena kiselik ma kipaleui se siuatl katli kuali moyoyontijtoya pampa kiitak eliyaya se tlen Jehová itlajtoltemakauaj. Uan kiiljuik: “Tlaskamati pampa tinechixuetskilik uan pampa kuali timoyoyontijtok. Ta amo nimitsmakasi”.