Ipan tonali 20, metstli mayo 2015, se katli kiyakana Rostov del Don, se altepetl tlen tlauel ueyi tlen mokaua ika sur tlen Rusia, kintitlanilik Jehová itlajtoltemakauaj se amatlajkuiloli kampa kintlaskamatiliyaya pampa kuali tlapaleuijkej kema kiyejyekchijkej nopa altepetl ipan campaña primaveral.

Ipan nopa tonali, Jehová itlajtoltemakauaj tlen naui tlanechikoli kipejpenkej miak tlasoli tlen eltoya kampa pano maseualmej uan tlen eltoya atenteno. Ipan se tlalochtli kitemitijkej nechka 300 koxtali uan kiuikakej ika camiones.

¿Kenke Jehová itlajtoltemakauaj kinejkej tlapaleuisej? “Monekiyaya nijchiuas se tlamantli, kiijtok Raisa, katli kipia 67 xiuitl, nijneki noaltepe ma elto tlachpampa uan kiampa kuali tiitstosej uan amo timokokosej. Maske san se keskij kimatkej tlen tijchijkej, tlauel niyolpaki pampa Jehová kena kiitak tlen tijchijkej”. Seyok Jehová itekipanojka katli itoka Aleksander kiijtok: “Amo san titlajtolmoyauaj, nojkia titlapaleuiaj ipan toaltepe kema moneki. Kuali nijyolmati uan tlauel niyolpaki kema nikinpaleuia nokalnechkauaj”.

Se keskij maseualmej kiitakej kenijkatsa tekitij Jehová itlajtoltemakauaj uan kinpaktik tlen kichijkej. Se tlakatl tlen nopaya eua kinsentlachilik kema kimatki amo kintlaxtlauiyayaj, yeka kinejki kinpaleuis uan kiijtok: “Amo kema nimoiljuik kuali nimomachiliskia tlaj nitlapaleuiskiaj”. Nojkia kiijtok: “Sekij tlen inmojuantij amo nikaj inmochaj uan inualajkej intlapaleuikoj”.

Katli kiyakana nopa altepetl kinitak se keskij Jehová itlajtoltemakauaj kitemitijtoyaj miak koxtali ika tlasoli uan kiniixkopinki nopa toikniuaj, uan kiijtok: “Nikinnextilis sekinok kenijkatsa kinamiki titekitisej”.