“¡Tlauel tiyolpakij pampa tikitaj nelnelia techikneliaj!”. Ya nopa kiijtok se siuatl tlen eua Ucrania kema kipojkej se amatlajkuiloli tlen tlauel ipati, tlen kititlantoyaj Katli kinyakanaj Jehová itlajtoltemakauaj. Stephen Lett, se Katli kinyakana Jehová itlajtoltemakauaj, kipojki ni amatlajkuiloli kema yajki Ucrania ipan tonali 10 uan 11, metstli mayo 2014, kitlakakilijkej 165,000 Jehová itlajtoltemakauaj.

Ni amatlajkuiloli uan sekinok tlamachtili kitlajtolkuepkej ipan makuili tlajtoli uan kipanoltijkej ipan 700 Kali kampa mosentiliaj Jehová itlajtoltemakauaj ipan nochi Ucrania.

Ipan nopa tonali, Mark Sanderson, se Katli kinyakana Jehová itlajtoltemakauaj, nojkia kipojki nopa amatlajkuiloli ipan tlanechikoli tlen Rusia. Ni tlamachtili kitlajtolkuepkej ipan 14 tlajtoli, uan kikajkej 180,413 Jehová itlajtoltemakauaj tlen itstokej ipan kipano 2,500 tlanechikoli tlen onka ipan Rusia uan ipan Bielorrusia.

Ni amatlajkuiloli kintitlanilijkej toikniuaj tlen Rusia uan Ucrania. Toikni Sanderson kipojki ni amatlajkuiloli ipan tlajtoli ruso, uan nopa sucursal tlen Rusia kiijtok: “Toikniuaj tlen Rusia tlauel kuali kiyolmatij pampa Katli kinyakanaj Jehová itlajtoltemakauaj kinextijtokej kenijkatsa tlauel kinikneliaj. Kimatkej kejuak Katli kinyakanaj Jehová itlajtoltemakauaj kinnajnauajkej”.

Ika ni amatlajkuiloli Katli kinyakanaj Jehová itlajtoltemakauaj kinekiyayaj kinyolchikauasej toikniuaj tlen itstokej Rusia uan Ucrania, pampa nopaya tlanauatianij kintlaijiyouiltiaj. Kiniljuijkej amo ma mokalakikaj ipan política uan yon ipan sekinok tlamantli tlen mochiua ipan Tlaltipaktli (Juan 17:16).

Yeka, Katli kinyakanaj Jehová itlajtoltemakauaj kinilnamikilijkej toikniuaj tlauel ipati kuali ma mouikakaj iuaya Jehová, yeka moneki ma momaijtokaj, ma momachtikaj Biblia uan ma moyoliljuikaj ipan tlen momachtiaj. Nojkia kiniljuik ma motemachikaj ipan tlen toTeotsij kiijtoua ipan Isaías 54:17: “Niyon se tepostli tlen kichijchijtokej tlakamej axuelis inmechtsontlamiltis”.

Itlamia nopa amatlajkuiloli kiijtouayaya: “Nochi inmojuantij tlauel tiinmechikneliaj. Uelis inmotemachisej amo kema tiinmechilkauaj uan nochipa tikiljuiaj Jehová ma inmechpaleui”.

Nopa kali Betel tlen Ucrania kiijtok: “Toikniuaj tlauel yolpakij uan kuali kiyolmatij pampa kiitstokej kenijkatsa Katli kinyakanaj Jehová itlajtoltemakauaj tlauel kinikneliaj uan kintekipachoua tlen kinpano. Ipan nopa tonali kema toikni Sanderson kipaxaloto Rusia, toikni Lett nojkia kipaxaloto Ucrania, ni kinextia toTeotsij itekipanojkauaj tekitij sansejko, uan kinpaleuik toikniuaj ma kiitakaj Jehová uan Jesús tlauel kinikneliaj. Tlauel kuali pampa techpaxalokoj ipan nopa tonali kema tlauel monekiyaya. Nama uelis tikixnamikisej nochi tlaouijkayotl tlen tijpiasej uan nochipa tijtekipanosej Jehová”.