Ipan octubre 5, xiuitl 2013, mochijki nopa tlanechikoli katli sejse xiuitl kichiua nopa Watch Tower Bible and Tract Society of Pennsylvania (número 129). Kema mochijki nopa tlanechikoli kiitakej 257,294 maseualmej ipan 21 uejueyi altepemej uan pilaltepetsitsij. San se keskij itstoyaj kampa mochijki nopa tlanechikoli, nochi nopa sekinok kitlachilijkej ipan Internet. Uan nochi katli teipa kitlachilijkej, elkej 1,413,676 maseualmej ipan 31 uejueyi altepemej uan pilaltepetsitsij. San ni tlanechikoli tlauel miakej kitlachilijtokej. Ipan abril 28, xiuitl 2013, nojkia mochijki se tlanechikoli tlen tlauel miakej kitlachilijkej; nopa tlanechikoli kitlachilijkej 1,327,704 maseualmej katli euaj México uan Centroamérica.

Ipan xiuitl 1920, Jehová itlajtoltemakauaj kitekiuiyayaj teléfonos uan radios, kiampa katli itstoyaj ipan sekinok altepemej kikakiyayaj nopa tlamachtili tlen moixtomayaya ipan uejueyi tlanechikolistli. Nama ika Internet, katli kitlachiliaj ni tlanechikoli, uelij kiitaj kema mopanoltia o kema ya panotok se keski minutos. William, katli eua Estados Unidos, kitlachilik ni tlanechikoli ika Internet. Ipan 1942 yajki ipan se ueyi tlanechikolistli ipan Richmond (Virginia, Estados Unidos), uan ika teléfono, kipanoltijkej nopa tlamachtili tlen moixtonki ipan seyok altepetl. Ya kiijtoua: “Amo eli sanse. Kema tikinitaj katli kiixtomaj nopa tlamachtili, ¡nelia tlauel techpaleuia!”.

Jehová itlajtoltemakauaj monejki tekitisej se xiuitl uan kiampa ueliskia kipanoltisej ipan Internet ni tlanechikoli. Ipan Brooklyn (Nueva York) itstoyaj se keskij Jehová itlajtoltemakauaj katli kitlachiliyayaj kuali ma nesi ipan Internet nopa tlanechikoli tlen mopanoltiyaya. Uan sekinok mokajkej ipan nochi sábado uan domingo, uan kitlachilijkej kuali ma mopanolti nopa tlamachtili ipan nopa altepemej kampa kinextiskiaj. Ryan, katli tlapaleuik ma mochiua ni tekitl, kiijtok: “Maske amo kuali tikochkej, kema tijmatkej kenijkatsa kinpaleuijtoya nopa tlamachtili tlen kitlachilijkej, tlauel kuali tijyolmatkej pampa tijmatkej kuali tijchijtoyaj toteki”.