Tein Biblia kijtoua

 Daniel katka se tanauatijkej judío akin semi moixmatik uan nemik itech siglo chikome uan chikuasen achto ke ualaskia Cristo. Dios kipaleuij maj uelini kijtouani toni kijtosnekia tein aksa kikochitaya. No kiitaltij seki taman tein ika kimatiltij tein panoskia satepan uan kichiuak maj kijkuilouani amatajkuilol tein kipia itokay (Daniel 1:17; 2:19).

¿Akoni katka Daniel?

 Daniel moskaltij Judá, tekiuajyot kampa yetoya Jerusalén uan inintemplo judíos. Itech xiuit 617 achto ke ualaskia Cristo, Nabucodonosor, akin tekiuajtia Babilonia, moaxkatilij Jerusalén uan kinuikak takamej akin ueyichiuanimej katkaj (2 Reyes 24:15; Daniel 1:1). Daniel, akin xa telpochok katka no kiuikakej.

 Daniel uan okseki telpochmej (kemej Sadrac, Mesac uan Abednego) kinuikakej ichan tekiuaj ompa Babilonia para kiseliskiaj se kuali tamachtilis uan satepan kitekitiliskiaj tekiuaj. Maski Daniel uan eyi itasojikniuan semi kinchikaujkauiayaj maj kichiuanij tein yejuan kimatiaj ke amo kuali katka, kiixtalijkej kitakamatiskej ininDios, Jehová (Daniel 1:3-8). Eyi xiuit satepan ke kinmachtijkej, tekiuaj Nabucodonosor kinueyitalij porin tel tamatinij katkaj uan miak taman ueliaj kichiuayaj, uan kiniluij “ke tel uejka kintaniaj nochin tiopixkamej-magos uan adivinos akin nemiaj noyampa kampa taixyekanaya”. Yejua ika kiixtalij maj Daniel uan itasojikniuan kitekitilianij (Daniel 1:18-20).

 Miak xiujmej satepan, keman Daniel kipanauiayaya 90 xiujmej, tekiuaj kitatitauij. Belsasar, akin ijkuak tekiuajtia Babilonia, kitajtanij Daniel maj kiluiani toni kijtosnekiaj seki tajtolmej tein neskaj itech tepamit. Dios kipaleuij Daniel maj kimatiltiani ke Medopersia moaxkatiliskia Babilonia. Uan ijkon panok. Nejon youak moaxkatilijkej Babilonia (Daniel 5:1, 13-31).

 Medopersas peuak tekiuajtij ompa Babilonia uan Daniel kiselij se ueyi tekit, uan tekiuaj Darío kiixtalijtoya kimakas okachi tanauatil (Daniel 6:1-3). Okseki uejueyi chiuanimej kitelnexikoluijkej Daniel uan yejua ika kitemojkej kimiktiskej. Kichiujkej maj kipantamotanij kampa yetoyaj tekuanimej, sayoj ke Jehová kimakixtij (Daniel 6:4-23). Keman tel xiuejya katka, se ángel monextij iixpan uan ojpa kiluij: “Dios mitsteltasojta” (Daniel 10:11, 19).

 Xikonita inemilis Daniel itech ome tamouisol tein motokaytia Daniel, se takat akin nochipa takuaujtamatik.