Jesús tamachtij netataujtil padrenuestro porin imomachtijkauan kitajtanijkej: “NoTekotsin, xitechnextili keniuj timotataujtiskej” (Lucas 11:1). Yejua ika netataujtil padrenuestro techpaleuia maj tikmatikan toni uelis tikijtoskej itech tonetataujtil uan keniuj moneki tikchiuaskej. a Sayoj ke, netataujtil padrenuestro, oso inetataujtil toTekotsin, amo sayoj yejua netataujtil tein Dios kikaki, ta kinextia katiyejua netataujtilmej kiuelkaki Dios.

Itech nejin tamachtilis tikitaskej nejin:

•  ¿Katiyejua netataujtil padrenuestro?

•  ¿Toni kijtosneki tein kijtoua padrenuestro?

•  ¿Moneki nochipa nikijtos padrenuestro keman niktataujtis Dios?

•  ¿Keniuj moneki niktataujtis Dios?

•  Okseki netataujtilmej tein nesij itech Biblia

 Padrenuestro moajsi itech Mateo 6:9-13, uan kijtoua ijkon: “ToTajtsin akin tietok ne iluikak, maj nochin kiitakan ke motokay semi ueyi. Maj techixyekanaki moTaixyekanalis. Maj mochiua tein tikneki nikan taltikpak, ijkon kemej ne iluikak. Xitechmaka totaxkaltsin tein monekis nejin tonal; xitechtapojpolui tein titauikaj, kemej tejuan no tikintapojpoluianij akin techtauikiliaj. Uan amo xikaua maj timotajtakolmakakan, ta xitechmakixti den Amokuali”.

 Tein Jesús tamachtij nochipa mouika ika tein Biblia kijtoua, yejua ika taixejekol maj Biblia techpaleui maj tikajsikamatikan tein kijtosneki padrenuestro.

 “ToTajtsin akin tietok ne iluikak”

 Kemej Dios techchijchiuak uan techmakak tonemilis kinamiki maj tikiluikan ‘toTajtsin’ (Isaías 64:8).

“Maj nochin kiitakan ke motokay semi ueyi”

 Dios monotsa Jehová. Kemej nejon tokayit yektik, moneki tiktakachiuaskej uan tikueyitaliskej. Tikchiuaj nejin keman tikinmatiltiaj oksekin keniuj tamati Dios uan tein kiixtalijtok kichiuas (Salmo 83:18; Isaías 6:3).

“Maj techixyekanaki moTaixyekanalis”

 Itaixyekanalis Dios, se tekiuajyot tein moajsi iluikak uan tekiuaj yejua Jesús. Jesús techmachtij maj titajtanikan maj nejon taixyekanalis tekiuajti nikan taltikpak (Daniel 2:44; Apocalipsis 11:15).

“Maj mochiua tein tikneki nikan taltikpak, ijkon kemej ne iluikak”

 Ompa iluikak amo mochiua tein amo kuali nion onkak mikilis. Dios no kineki maj ijkon tinemikan nikan taltikpak: maj taltikpakneminij nochipaya tiyolseujkanemikan uan maj amo timouikan (Salmo 37:11, 29).

“Xitechmaka totaxkaltsin tein monekis nejin tonal”

 Moneki tikelnamikiskej ke para tiksentokaskej tiyoltoskej, moneki maj toTachijchiujkauj techpaleui maj tikpiakan tein tikuaskej uan okseki taman tein moneki (Hechos 17:24, 25).

“Xitechtapojpolui tein titauikaj, kemej tejuan no tikintapojpoluianij akin techtauikiliaj”

 Itech nejin tajkuilolmej tajtol “titauikaj” no kijtosneki “totajtakoluan” (Lucas 11:4). Tinochin titajtakolchiuaj uan moneki maj techtapojpoluikan. Sayoj ke komo tiknekij maj Dios techtapojpolui, no moneki tikintapojpoluiskej oksekin (Mateo 6:14, 15).

“Amo xikaua maj timotajtakolmakakan, ta xitechmakixti den Amokuali”

 Jehová amo keman techtanejnektia para maj tikchiuakan tein amo kuali (Santiago 1:13). Sayoj ke Satanás kemaj techtanejnektia, yejua ika no moixmati kemej “Amokuali” (1 Juan 5:19; Mateo 4:1-4). Keman tikijtouaj nejin, tiktajtaniaj Jehová maj techpaleui maj amo timotajtakolmakakan uan maj tiktakamatikan.

 Keman Jesús tamachtij netataujtil padrenuestro kinekia kinextis keniuj moneki se kitataujtis Dios uan amo maj nochipa se kijto ijkon kemej yetok. Achto ke kijtoskia padrenuestro, Jesús tanejmachtij: “Keman timotataujtis, amo miakpa xikijto sayoj se taman” (Mateo 6:7). Tein melauj, okse tonal keman no tamachtij keniuj se kitataujtis Dios, kikuik okseki tajtolmej (Lucas 11:2-4).

  Keman tiktataujtiaj Dios, okachi kuali komo tikiluiaj tein tiknemiliaj uan tein tikmachiliaj (Salmo 62:8).

 Padrenuestro kinextia katiyejua netataujtilmej kikaki Dios. Xikonita keniuj okseki tajkuilolmej itech Biblia mouikaj ika tein kijtoua nejin netataujtil.

•    Sayoj Dios moneki se kitataujtis

   Tajkuilol: “Nochipa xikchiuakan netataujtil uan chikauak xiktataujtikan Dios maj namechixyekana itech tein yeski taman tein nankipanoskej uan nochipa xiktasojkamatilikan” (Filipenses 4:6).

   Tein kijtosneki: Keman itech netataujtil peua tikijtouaj “toTajtsin”, techmachtia ke sayoj moneki tiktataujtiskej Jehová Dios, amo Jesús, nion María nion santos.

•   Moneki titajtaniskej itech netataujtil tein mouika ika tein Dios kineki

   Tajkuilol: “Uelis tiktajtaniskej nochi, uan komo yejua tein Dios kineki yejua techkaki” (1 Juan 5:14).

   Tein kijtosneki: Keman Jesucristo kijtoj “maj mochiua tein tikneki” kinextij ke motelneki tiktayekanaltiskej tein Dios kineki itech tonemilis. Yejua ika, keman tiktataujtiaj Dios tikijtouaj tein mouika ika tein kineki. Para tikmatiskej toni kineki Dios maj mochiua nikan taltikpak uan keniuj kineki maj nemikan taltikpakneminij, moneki timomachtiskej Biblia.

•   No uelis titajtaniskej tein tejuan techpoloua uan uelis tikiluiskej tein techtekipachoua

   Tajkuilol: “Xikauili Jehová tein mitstekipachoua, uan yejua mitspaleuis” (Salmo 55:22).

   Tein kijtosneki: Kemej Dios kitekipachoua tein techpanoua, itech padrenuestro, Jesús no ika tajtoj okseki taman tein moneki. No ijkon uelis tiktajtaniskej Dios maj techpaleui maj tikpiakan tein ika timoixpanoltiskej, maj techixyekana keman moneki titaixpejpenaskej, maj techpaleui keman tikpanouaj ouijkayomej uan maj techtapojpolui totajtakoluan. b