Akin iniuan kuali timouikaj uelis kichiuaskej maj tiyolpakikan uan techpaleuiskej maj kuali techyoui. Komo tikinpiaj kuali totasojikniuan, techpaleuiskej maj tikpiakan kualtsitsin kualneskayomej uan kichiuaskej maj okachi tiyolkualmej (Proverbios 27:17).

 2Sayoj ke, Biblia kijtoua ke motelneki kuali tikinixpejpenaskej akin iniuan timouikaj uan technejmachtia toni uelis panos komo amo kuali tikinixpejpenaj (Proverbios 13:20; 1 Corintios 15:33). Komo akin iniuan timouikaj kichiuaj tein amo kuali, uelis kichiuaskej maj amo kuali titaixpejpenakan oso maj amo tikpiakanok kualtsitsin kualneskayomej.

Itech nejin tamachtilis tikitaskej nejin:

•  ¿Akoni se kuali tetasojikniuj?

•  ¿Akonimej akin kuali mouikayaj ininka tajtoua Biblia?

•  ¿Uelis timouikaskej iuan Dios?

•  Tajkuilolmej itech Biblia tein ika tajtouaj tasojiknimej

 Biblia kijtoua ke ome tasojiknimej kuali mouikaj amo porin kiuelitaj sayoj se taman. Kemej neskayot, Salmo 119:63 kijtoua: “Iniuan kuali nimouika nochin akin mitsmojkatokaj a uan akin kitakamatij motanauatiluan”. Akin kijkuiloj nejin salmo kijtoj ke kuali mouikaya iniuan akin kinekiaj kiyolpaktiskej Dios uan kitakamatiskej itanauatiluan.

 Biblia no kijtoua katiyejua kualneskayomej moneki kipias se kuali tetasojikniuj, kemej neskayot:

•   “Akin yekmelauj totasojikniuj nochipa techtasojta, uan mochiua kemej se tokniuj keman titajyouiaj” (Proverbios 17:17).

•   “Moajsij tasojiknimej akin mochiuiliaj tein amo kuali, sayoj ke moajsi se tetasojikniuj akin okachi tetasojta ke se teikniuj” (Proverbios 18:24).

 Nejin tajkuilolmej techmachtiaj ke se kuali tetasojikniuj amo tekaua, tetasojta, kualtakat uan kiuelita kitemakas tein kipia. Se yekmelauj tetasojikniuj touan yetos keman techpanos tein kuali uan tein amo kuali. Uan no, moyolchikauas techiluis komo kiita ke tein tikchiuatij amo kuali yetok oso komo tikchiujtokejya (Proverbios 27:6, 9).

 Biblia ininka tajtoua sekin akin kuali mouikakej maski tataman kemej moskaltijkej, seseko kayomej katkaj, tataman xiujmej kipiayaj oso sekin ueyichiuanimej katkaj uan sekin amo. Maj tikitakan eyi neskayomej.

•   Rut uan Noemí. Kemej Rut katka isiuamon Noemí, xa okachi ichpoch katka. Uan no katka okseko kayot, maski ijkon, kuali mouikakej uan moteltasojtayaj (Rut 1:16).

•   David uan Jonatán. Nesi ke Jonatán kiyekanaya David 30 xiujmej, sayoj ke Biblia kijtoua ke “peuak kuali mouikaj” (1 Samuel 18:1).

•   Jesús uan itatitaniluan. Jesús kipiaya tanauatil porin katka ‘inintamachtijkauj uan inintekotsin’ itatitaniluan (Juan 13:13). Maski ijkon, Jesús kinitaya kemej itasojikniuan. Uan no, kuali mouikaya iniuan akin kikakiaj tein tamachtiaya. Yejua kijtoj: “Namechiluia notasojikniuan, porin namechtapouijya nochi tein nikakilij noTajtsin” (Juan 15:14, 15).

 Kemaj, uelis tiyeskij tiitasojikniuan Dios. Biblia kijtoua ke “semi kuali mouika iniuan akin yolmelaujkej” (Proverbios 3:32). Ika okseki tajtolmej, Dios kinixpejpena kemej itasojikniuan akin mochikauaj kuali monejnemiltiskej, amo takajkayauaskej uan mochikauaj kitakamatiskej itanauatiluan. Kemej neskayot, Biblia kijtoua ke Abrahán, se takat tatakamatkej, katka itasojikniuj Dios (2 Crónicas 20:7; Isaías 41:8; Santiago 2:23).