Éxodo 13:1-22
13 Jehová no kiluij Moisés:
2 “Xinechinxelouili nochin okichpipil israelitas akin tayekanaj. Okichpil israelita akin tayekana uan tapialueuet tein achto yoli, noaxkauan”.
3 Uan Moisés kiniluij israelitas: “Xikelnamikikan nejin tonal keman nankiskej de Egipto, kampa namechteltekitiltiayaj, porin Jehová namechkixtij de nikan ika ichikaualis. Yejua ika amo xikuakan nion teyi tein kipia levadura.
4 Nankisatij nejin tonal itech metsti abib.*
5 Jehová motenkauak iniuan mouejkaujtatuan ke mitsmakaskia inintal akin kinixmatij kemej cananeos, hititas, amorreos, heveos uan jebuseos, kampa onkak miak leche uan nekti.* Keman ompa mitsajxitis, xijxiujtika monekis tikelnamikis nejin tonal.
6 Chikome tonal moneki tikuas pantsin tein amo kipia levadura, uan itech chikometika tonal mochiuas se iluit para tikueyitalis Jehová.
7 Moneki tikuas pantsin tein amo kipia levadura nejon chikome tonal. Amo xikpia nion teyi tein kipia levadura uan itech nochi motal amo xikpia harinajtix tein kipia levadura.
8 Uan nejon tonal moneki tikiluis mokoneuj: ‘Nikchiua nejin para nikelnamikis keniuj Jehová nechkixtij de Egipto’.
9 Nejin iluit yeski kemej se taman tein ijkuiliujtos momako uan moixkuako. Mitselnamiktis ke moneki ika titajtos itanauatil Jehová. No mitselnamiktis ke Jehová mitskixtij de Egipto ika ichikaualis.
10 Xijxiujtika moneki tikchiuas nejin tein Dios kiixtalij itech tonal tein kijtoj.
11 ”Keman Jehová mitsajxitis itech inintal cananeos, tein mitsiluij tejua uan mouejkaujtatuan ke mitsmakaskia,
12 moneki tikxelouilis Jehová nochin okichpipil akin tayekanaj uan nochin tapialueuetkej tein achto yolkej. Nochin iaxkauan Jehová.
13 Se burro tein achto yolis moneki tikmakixtis. Uan para tikmakixtis moneki titaxtauas ika se ichkat.* Komo amo titaxtaua moneki tikechpostekis. No moneki titaxtauas para tikinmakixtis nochin mookichpipiluan akin tayekanaj.
14 ”Komo se tonal mokoneuj mitstajtania* ‘¿Keyej tikchiua nejin?’, moneki tikiluis ‘Jehová ika ichikaualis techkixtij de Egipto kampa techteltekitiltiayaj.
15 Kemej tekiuaj akin taixyekanaya Egipto amo techkauaya maj tikisakan, Jehová kinmijmiktij nochin konemej akin tayekanayaj de Egipto uan nochin tapialmej tein achto yolkaj. Yejua ika tikmiktiliaj Jehová nochin tapialueuetkej tein achto yolij uan titaxtauaj para tikinmakixtiskej tookichpipiluan akin tayekanajʼ.
16 Uan nejin iluit yeski kemej se taman tein ijkuiliujtos momako uan moixkuako, porin Jehová techkixtij de Egipto ika ichikaualis”.
17 Uan keman tekiuaj kinkauak israelitas maj kisakan, Dios amo kinuikak itech ojti tein panoua kampa nemij akin kinixmatij kemej filisteos, maski okachi amo uejka katka. Dios ijkon kichiuak porin kijtoj: “Keman kiitaskej ke monekis tateuiskej, xa kinemiliskej maj amo kisanij uan mokepaskej Egipto”.
18 Yejua ika, Dios kichiuak maj israelitas yanij itech taluakyan tanakastan den mar Rojo. Keman yejuan kiskej de Egipto kualtsin xejxeliujtiayaj kemej soldados.
19 Moisés kiuikak iomiyouan José porin José kiniluijka ikoneuan Israel nejin: “Xikyekmatikan ke Dios namechpaleuikiuj. Xinechyekiluikan ke nankiuikaskej noomiyouan”.
20 Uan israelitas kiskej de Sucot uan kinkejketskej ininkaltsitsin* ompa Ezam, kampa peuaya taluakyan.
21 Jehová kinyekantiaya. Tonayan kinyekantiaya ika se mixti uan youak kinyekantiaya ika se tit* tein kintauilijtiaya. Ijkon uelia nejnemiaj tonayan uan youak.
22 Tonayan nejon mixti amo kinkauaya uan de youak nejon tit nochipa iniuan yetoya.
Tajtolmelaualismej
^ Oso “miel”.
^ Oso “borrego”.
^ Oso “mitstajtoltia”.
^ Nejin kaltsitsin chijchiujtoyaj ika tasal (tilmaj).
^ Nejin mixti uan nejin tit (tekol) moitayaj kemej se kalikxit.
