Éxodo 17:1-16
17 Nochin israelitas kiskej den taluakyan kampa motanotsa Sin. Mokaltalijtiayaj ijkon kemej Jehová kinnauatiaya. Uan keman yetoyaj kampa motanotsa Refidim, amo onkaya at tein ueliskia tayiskej.
2 Yejua ika peujkej kualanij iuan Moisés uan kiluiaj: “¡Xitechmaka at porin tiamikij!”. Sayoj ke Moisés kinnankilij: “¿Keyej nankualanij nouan? ¿Keyej nankisentokaj nankiyejyekouaj Jehová?”.
3 Sayoj ke ompa nochin tel amikiaj. Yejua ika peujkej kijijtouaj Moisés uan kiluiaj: “¿Keyej titechkixtij de Egipto? Tejuan, tokoneuan uan totapialuan timikitij. ¿Yejua nejon tein tiknekia?”.
4 Yejua ika, Moisés kitataujtij Jehová maj kipaleui uan kiluij: “¿Toni maj nikchiua? ¡Tepitsin poliui para nechtetemaskej!”.*
5 Uan Jehová kiluij Moisés: “Xitayekanteua uan xikinuika seki taixyekananij israelitas, uan no ximaaktiuj topil tein ika tikuitekik ueyiat Nilo.
6 Nejua nietos itech tepejxit ompa Horeb. Tejua moneki tikuitekis tepejxit, uan kisas at para maj nochin atikan”. Yejua nejon tein Moisés kichiuak ininixpan taixyekananij israelitas.
7 Yejua ika ompa tatokaytij Masá* uan Meribá,* porin israelitas iuan kualankaj Moisés uan porin kiyejyekojkaj Jehová keman kijtojkej: “¿Touan yetok Jehová oso amo?”.
8 Uan akin kinixmatij kemej amalequitas yajkej Refidim uan kinteuitoj israelitas.
9 Yejua ika Moisés kiluij Josué: “Xikinkuiteua seki takamej uan ximoteuitij iniuan amalequitas. Mosta nietos tepekuapan uan nimaaktos topil tein toTajtsin Dios nechiluij maj nikuika”.
10 Uan Josué kichiuak ijkon kemej kiluijka Moisés uan moteuito iniuan amalequitas. Uan Moisés, Aarón uan Hur pankiskej tepekuapan.
11 Keman Moisés maajkoijkaya, israelitas tataniaj; sayoj ke keman momatemouiaya, amalequitas tataniaj.
12 Keman Moisés makoujtik, kiuikilijkej se tet para maj ompa motali, uan yejua ompa motalij. Uan Aarón uan Hur moketskej inajnakastan para kimapaleuiskej. Ijkon Moisés maajkoijkaya hasta ke pankalakik tonaltsin.
13 Ijkon, Josué kintanik amalequitas.
14 Uan Jehová kiluij Moisés: “Xikijkuilo nejin itech amatajkuilol para maj moelnamiki uan oksepa xikilui Josué: ‘Nikintamiixpoloti amalequitas uan amo akinok kinelnamikis’”.
15 Uan Moisés kichijchiuak se altar uan kitokaytij Jehová-Nisí
16 keman kijtoj: “Kemej amalequitas kiixnamikij Jah uan amo kinekij maj taixyekana, Jehová kinteuijtos yejuan uan nochin ininkoneuan akin yoltiaskej”.
Tajtolmelaualismej
^ Oso “nechtepoxoniskej”, “nechmojmotaskej ika tet”.
^ Tokayit tein kijtosneki ‘kiyejyekouaj’.
^ Tokayit tein kijtosneki ‘mokualantiaj’.
