Éxodo 19:1-25
19 Ome metsti satepan ke israelitas kiskej de Egipto, ajsikej itech taluakyan Sinaí.
2 Kiskej de Refidim, ajsikej itech taluakyan Sinaí uan ompa kinkejketskej ininkaltsitsin* tepeixpan.
3 Uan Moisés pankisak tajtoto iuan toTajtsin Dios. Itech tepet, Jehová kiualnotsak uan kiluij: “Yejua nejin tein moneki tikiniluis israelitas, ikoneuan Jacob:
4 ‘Namejuan nankiyekitakej tein nikinchiuilij akin nemiaj Egipto. Namechualkuik nikan kemej se águila kinuika ipiluan itech iajtapaluan.
5 Uan axkan, komo nankichiuaj nochi tein namechnauatia uan tein nimotenkauati namouan, de nochin akin nemij itech taltikpak sayoj namejuan okachi namechtasojtas, porin nochi taltikpak noaxka.
6 Nanyeskij tekiuanij uan tiopixkamej, nanpouiskej itech se altepet tein nimoxelouilij’. Nochi nejon moneki tikiniluis israelitas”.
7 Uan Moisés temok, kinsentilij taixyekananij israelitas uan kiniluij nochi tein Jehová kinauatijka.
8 Satepan, nochin israelitas tanankilijkej: “Tikchiuatij nochi tein Jehová kijtoj”. Nimantsin, Moisés kiluito Jehová tein nochin kijtojkej.
9 Uan Jehová kiluij Moisés: “Xikita, nimitsitakiuj uan nimitsualnojnotsas desde kampa tatileujtos, para maj nochin kikakikan tein nimitsiluis uan para maj nochipa no mouan takuaujtamatikan”. Uan Moisés kimatiltij Jehová tein nochin kijtojkaj.
10 Jehová kiluij Moisés: “Xikinitati israelitas uan xikinilui maj axkan uan mosta mochipauakan para nechueyichiuaskej, uan yejuan moneki kipakaskej inintasal.*
11 Uan para uipta maj yetokanya kemej moneki, porin ijkuak, nejua Jehová, niualpantemos itech tepet Sinaí ininixpan nochin.
12 Moneki tiktalis se lindero tepetsintan uan tikiniluis israelitas: ‘Amo xipankisakan itech tepet nion ximonalketsakan nepaka. Akin kitalis se imets itech tepet moneki nankimiktiskej.
13 Sayoj ke amo xikitskikan, ta moneki nankitetemaskej* oso nankimotaskej.* Amo importa ox tapial oso takat, maj miki’. Sayoj ke, keman mokakis ke tapitsaj,* uelis motokiskejya”.
14 Satepan, Moisés temok den tepet uan peuak kiniluia israelitas maj mochipauakan para kiueyichiuaskej Dios, uan yejuan kipakkej inintasal.
15 Moisés kiniluij: “Xikchiuakan tein moneki para uipta kuali nanyetoskejya. Amo ximotekakan iuan namosiuatsin”.
16 Uiptika kualkan tatitikuinik uan tapepetanik. Fiero tatileuik itech tepet uan mokakia ke chikauak tapitsayaj. Nochin akin ompa yetoyaj peuak uiuiyokaj.
17 Uan Moisés kichiuak maj nochin kisakan de kampa yetoyaj ininkaltsitsin para kikakiskej tein toTajtsin Dios kiniluiskia, uan yejuan mokejketskej tepetsintan.
18 Tepet Sinaí tamipopokaya, porin Jehová ompa ualpantemoka itech tit.* Pokti kisaya kemej tikotaj uan nochin tepet chikauak mooliniaya.
19 Keman mokakia ke okachi chikauak tapitsayaj, Moisés tajtouaya uan toTajtsin Dios kinankiliaya.
20 Jehová ualpantemok itech tepet Sinaí, ikuapan tepet. Uan Jehová kiluij Moisés maj pankisani ompa, uan Moisés pankisak.
21 Jehová kinauatij Moisés: “Xipantemo uan xikinnejmachtiti israelitas maj amo moteltokikan para nechitaskej nejua, Jehová, porin komo ijkon kichiuaj, miakej mikiskej.
22 Uan no, nejua Jehová, nikneki xikinilui takamej akin nechtekitiliaj kemej tiopixkamej, maj mochipauakan para nechueyichiuaskej, para maj nejua Jehová amo nikinmikti”.
23 Moisés kiluij Jehová: “Israelitas amo uelis pankisaskej itech tepet Sinaí porin ipa titechnejmachtijya keman tinechiluij: ‘Xiktali se lindero tepetsintan uan xinechxelouili’”.
24 Sayoj ke Jehová kiluij: “Xitemo uan xikuiti Aarón. Sayoj ke amo xikinkaua maj tiopixkamej nion oksekin nalpanokan para pankisaskej uan nechitaskej nejua Jehová, para maj amo nikinmikti”.
25 Yejua ika Moisés temok uan kiniluij israelitas tein Dios kijtoj.
Tajtolmelaualismej
^ Nejin kaltsitsin chijchiujtoyaj ika tasal (tilmaj).
^ Oso “inintilmaj”.
^ Oso “nankitepoxoniskej”, “nankimojmotaskej ika tet”.
^ Xa kitamotiliskiaj se flecha.
^ Itech hebreo, “kipitsaj ikuaomiyo ichkaueuet”.
^ Oso “tekol”.
