Éxodo 2:1-25
2 Itech nejon tonalmej, se takat akin katka ichankauj Leví monamiktij iuan se siuatsin akin no katka ichankauj Leví.
2 Siuatsin mokokoxkatalij uan kipiak se okichpiltsin. Kemej kiitak ke tel kuakualtsin katka, kitatij* eyi metsti.
3 Keman amo uelik kitatijok, kikuik se chikiuit, kitalilij chapopote,* ompa kikalakij okichpiltsin uan kitalij tatenoj den ueyiat Nilo, kampa onkaya miak akat.
4 Sayoj ke se siuapil akin katka iikniuj okichpiltsin kiuejkaitstoya.
5 Uan iichpoch tekiuaj akin taixyekanaya Egipto maltito* itech ueyiat Nilo. Keman siuamej akin kitekitiliayaj nenentoyaj tatenoj den ueyiat, yejua kiitak chikiuit tein yetoya akatsalan, uan nimantsin kinauatij se itakeual maj kiualkuili.
6 Keman kitapoj chikiuit, kiitak ke ompa yetoya nejon pilitsin uan chokatoya. Yejua kiiknelij uan kijtoj: “Nejin konetsin hebreo”.*
7 Uan iikniuj okichpiltsin kitajtanij* iichpoch tekiuaj: “¿Tikneki maj niktemoti se siuatsin hebrea para maj mitschichitili nejin pilitsin?”.
8 Uan ichpoch kinankilij: “¡Kemaj, xiktemoti!”. Uan siuapil nimantsin kitemoto imomaj okichpiltsin.
9 Iichpoch tekiuaj kiluij nejon siuatsin: “Xikuika nejin okichpiltsin uan xinechchichitili uan nimitstaxtauis”. Uan siuatsin kiuikak uan kichichitij.
10 Keman okichpiltsin moskaltij, siuatsin kimakato iichpoch tekiuaj uan yejua kiiskaltij kemej iokichpil. Uan kitokaytij Moisés* porin kijtoj ke kikixtijka den at.
11 Satepan, keman Moisés ueyiya katka, kinitato iikniuan akin kinteltekitiltiayaj, uan kiitak ke se takat de Egipto kimagatoya* se hebreo.
12 Yejua ika sentatachiak, uan kemej amo akin kiitak, kimiktij takat de Egipto uan kixalpachoj.
13 Mostika, oksepa kinitato iikniuan uan kiitak ke ome hebreos moteuijtoyaj. Yejua ika kiluij akin tapeualtijka: “¿Keyej tikteuijtok mokniuj?”.
14 Yejua kinankilij: “¿Akoni mitsixtalij kemej totaixyekankauj uan tojuez? ¿Tiknemilia tinechmiktis kemej tikmiktij takat akin nikan kayot?”. Uan Moisés momoujtij uan kinemilij: “¡Kimatkejya tein nikchiuak!”.
15 Keman tekiuaj kimatik, kimiktisnekik Moisés. Sayoj ke yejua choloj uan nemito Madián. Keman ompa ajsik, motalito kampa atakuiaj.
16 Akin katka tiopixkat ompa Madián kinpiaya chikome isiuapipiluan. Uan yejuan kikixtitoj at uan kipexontijkej* kampa atayiaj itapialuan inintat.
17 Sayoj ke seki takamej akin kinyekpiayaj ichkamej* ajsikej ompa uan kineualtijkej. Nejon takamej ipa ijkon kichiuayaj. Keman Moisés kiitak nejon, moketsak uan kinpaleuito nejon siuamej uan kinatiltij tapialmej.
18 Inintat nejon siuamej katka Reuel.* Keman yejuan ajsikej ichan, yejua kiniluij: “¡Tel niman nanejkokej!”.
19 Yejuan kiluijkej: “Se takat de Egipto techpaleuij keman ichkatajpianij techkuejmolojtoyaj. Hasta techkixtilij at uan kinatiltij tapialmej”.
20 Uan Reuel kiniluij isiuapipiluan: “¿Uan kani yetok? ¿Keyej nankiualkaujteujkej? Xiknotsatij para maj takuaki touan”.
21 Satepan, Moisés kijtoj ke kemaj mokauaskia ichan Reuel, uan yejua kimakak isiuapil, Ziporá, para maj iuan monamikti.
22 Satepan, Ziporá kipiak se okichpil, uan Moisés kitokaytij Guersom,* porin kijtoj: “Ninemi itech nejin tal kampa amo nikayot”.
23 Panokej miak tonalmej uan tekiuaj akin taixyekanaya Egipto momikilij. Sayoj ke israelitas kisentokayaj moyolkokojtoyaj porin kinteltekitiltiayaj. Uan kitsajtsiliayaj toTajtsin Dios maj kinpaleui.
24 Satepan, Dios kikakik keniuj tayokolchokayaj uan kielnamikik* tein motenkaujka iniuan Abrahán, Isaac uan Jacob.
25 Yejua ika, Dios kiitak keniuj israelitas tajyouijtoyaj uan kiniknelij.
Tajtolmelaualismej
^ Oso “kicholtij”.
^ Oso “alquitrán”.
^ Oso “mopakato”.
^ Oso “kitajtoltij”.
^ Tokayit tein kijtosneki ‘kikixtijkej den atʼ.
^ Oso “kiuitektoya”.
^ Oso “kitemitijkej”.
^ Oso “borregos”.
^ Oso Jetró.
^ Tokayit tein kijtosneki ‘nemi kampa amo kayotʼ.
^ Oso “kiixtalij kichiuas”.
