Éxodo 22:1-31
22 ”Komo se takat kiichteki se kuakouej oso se ichkat* uan kimiktia oso kinamaka, moneki taxtauas. Komo kiichteki se kuakouej moneki kikepas makuil kuakuejmej, komo kiichteki se ichkat moneki kikepas naui ichkamej.
2 ”(Komo kiixajsij se tachtekkej kalaktok techan youak uan kimagaj* uan kimiktiaj, akin kimiktij amo kitatsakuiltiskej.
3 Sayoj ke komo nochi nejin panoua keman ipa tanesikya, akin kimiktij moneki kitatsakuiltiskej).
”Tachtekkej moneki taxtauas. Komo amo teyi kipia, moneki kinamakaskej para kiixtauas nochi tein kiichtekik.
4 Komo kiajxiliaj yoltokok kuakouej, burro oso ichkat, tachtekkej moneki kitemakas ome tapialmej.
5 ”Komo aksa* kinuika itapialuan maj takuatij italpan oso kampa kitoktok uvas uan kinkaua maj kalakitij tetalpan uan tatamiaj, moneki taxtauas. Moneki kitemakas tein okachi kuali tein mochiuas italpan oso uvas tein kitekis.
6 ”Komo aksa tatikuiltia uan tataj* koujtsitsin uan hasta tatok tein ijilpitok, tatok tein ayamo kitekij oso nochi tein onkak itech nejon tal, akin tatikuiltij moneki kiixtauas nochi tein tatak.
7 ”Komo se takat kimaka okse takat itomin oso okse taman para maj kipiali sayoj ke kalakij ichan uan kiichtekiliaj, komo kiajsij akin tachtekik, moneki kiixtauas okse achiok.
8 Sayoj ke komo amo kiajsij, akin kitachtekitoj moneki kiuikaskej iniuan jueces para maj toTajtsin Dios kinexti ox yejua mokuilij.
9 Keman aksa kijtos ke okse kikuilij teisa, uelis yeski se kuakouej, se burro, se ichkat, se tasal* oso okse taman tein kipoloj, nejon omen moneki yaskej iniuan jueces para maj toTajtsin Dios kinexti akoni iaxka tein poliuik. Dios kinextis akoni kichiuak tein amo kuali, uan yejua moneki kimakas okse takat okse achiok.
10 ”Yejua nejin tein moneki mochiuas komo se takat kiluia okse maj kiyekpiali se burro, se kuakouej, se ichkat oso okse tapial uan nejon tapial miki, motelkojkokoua oso kiuikaj uan amo akin kiita toni panok.
11 Akin kipixtoya tapial moneki kijtos itokaykopa Jehová ke yejua amo teyi kichiuilij. Akin iaxka tapial moneki kineltokilis nejon takat, uan yejua amo monekis kikepilis nion teyi.
12 Sayoj ke komo kiichtekiliaj tapial,* moneki kikepilis akin iaxka katka.
13 Uan komo se tekuani kikokototsak nejon tapial, nejon takat moneki kiualkuis tapial takokotots. Amo teyi monekis kikepas komo ijkon panoua.
14 ”Komo aksa kitaneuilia okse takat se tapial uan nejon tapial motelkojkokoua oso miki uan akin iaxka amo kiita, takat akin taneuik tapial moneki taxtauas.
15 Sayoj ke komo akin iaxka tapial kiita tein panok, akin taneuik amo moneki kiixtauas nion teyi. Komo taxtaujka para maj kitaneujtikan, amo teyi kitemakasok.
16 ”Komo se takat kikajkayaua se ichpoch* akin amo kijtantokej uan iuan moteka, nejon takat moneki kitemakas tein kitemakaj keman taijtanij para uelis iuan monamiktis.
17 Komo tetat amo kineki kitemakas isiuapil, takat akin kikajkayauak ichpoch ipa moneki taxtauas.
18 ”Moneki tikmiktis se siuat akin tenaualuia.
19 ”Akin motekas iuan se tapial* moneki mikis.
20 ”Akin kimaktilis tapialmej okseki dioses, moneki mikis. Sayoj Jehová moneki kimaktiliskej tapialmej.
21 ”Amo ika ximauilti nion xiktajyouilti akin amo israelita uan nemi mouan, porin namejuan no nanenkej Egipto, kampa amo nankayomej.
22 ”Amo xiktajyouiltikan akin amo nemiok itakatsin nion akin amo kinpiaok itatuan.*
23 Komo tikintajyouiltia uan yejuan nechtataujtiaj maj nikinpaleui, xikyekmati ke nejua nikinkakis.
24 Uan nitelkualanis namouan uan nikchiuas maj namechmiktikan akin namechtauelitaj. Namosiuauan amo kipiaskejok inintakauj uan namokoneuan amo kipiaskejok inintat.
25 ”Komo tiktaneujtia tomin se israelita akin pobre,* amo xikchiua kemej akin ipa tetaneujtia tomin.* Amo xiktajtani okachi para tiktanilis.
26 ”Komo mokniuj mitskauilia ipantaken para kinextis ke yekmelauj mitskepilis tein tiktaneujtij, moneki tikepilis ipantaken achto ke tapoyauis.
27 Porin sayoj yejua nejon tein kipia para mopankentis. ¿Toni mokentis keman kochitiuj? Keman nechtataujtis maj nikpaleui, xikyekmati ke nikakis porin niteiknelia.*
28 ”Amo xikuijuikalti* Dios nion xikuijuikalti se akin mitsixyekana.
29 ”Tein tiktokas motelchiuas uan no tiktelpias vino uan aceite. Amo xiknenemilijto ox tinechmaktilis nejon. Xinechmaktili mokoneuj akin tayekana.
30 Yejua nejin tein moneki tikchiuas iuan mokuakouej uan moichkauj: maj iuan yeto inan chikome tonal, sayoj ke itech chikueyitika tonal tinechmaktilis.
31 ”Namejuan moneki nankinextiskej ke nanxeliujtokej para nejua. Uan komo nankiajsij se tapial tein se tekuani kikokototsak, amo xikuakan. Xikintamotilikan itskuimej.
Tajtolmelaualismej
^ Oso “borrego”.
^ Oso “kiuitekij”.
^ Oso “akin”, “akaj”.
^ Oso “chichinauij”.
^ Oso “tilmaj”.
^ Nejin panoskia komo amo kiyekpia.
^ Tajtol hebreo kijtosneki se siuapil akin amo keman motekani iuan se takat.
^ Nejin kijtosneki motekas iuan se tapial kemej motekaskia iuan se takat oso se siuat.
^ Oso “iknotsitsin”, “mikakaualmej”.
^ Oso “tajyouijtok”.
^ Oso “tetaneujtia tomin uan xijxikuin (ixkis)”.
^ Oso “nikualtakat”.
^ Oso “Amo xiktejtelchiua”, “Amo xikijijto”.
