Éxodo 24:1-18
24 Uan Jehová kiluij Moisés: “Xipankisa itech tepet tejua, Aarón, Nadab, Abihú uan 70 taixyekananij israelitas uan ximoixpilokan desde uejka.
2 Sayoj tejua Moisés, uelis timotokis kampa nietok nejua Jehová. Oksekin maj amo motokikan uan israelitas maj amo mouan pankisakan”.
3 Uan Moisés kiniluito israelitas nochi tein Jehová kiluij uan nochi tein kinauatij. Uan nochin tanankilijkej ijkuin: “Ika miak pakilis tikchiuaskej nochi tein Jehová kijtoj”.
4 Uan Moisés kijkuiloj nochi tein Jehová kijtojka. Kualkan meuak uan tepetsintan kichijchiuak se altar. No kinkejketsak 12 temej porin katkaj 12 uejueyi kalyetonij israelitas.
5 Satepan kinijitak* seki telpochmej israelitas. Yejuan kichichinouilijkej Jehová seki tapialmej uan kimaktilijkej seki kuakuejmej para sentakuaskej iuan.*
6 Uan de nochi esti tein kisak, Moisés kisentilij tajko itech seki uejueyi kaxit uan tajko kipijpisuij itech altar.
7 Satepan, kikuik amatajkuilol kampa ijkuiliujtoya tein nochin kijtojkej ke kichiuaskiaj, uan chikauak kinlerouilij. Satepan yejuan kijtojkej: “Ika miak pakilis tikchiuaskej nochi tein Jehová kijtoj uan titatakamatiskej”.
8 Uan Moisés kinpijpisuilij esti israelitas uan kiniluij: “Ika nejin esti moixtalia tein Jehová motenkaua namouan ijkon kemej yekin nankikakkej”.
9 Moisés, Aarón, Nadab, Abihú uan 70 taixyekananij israelitas pankiskej itech tepet
10 uan kiitakej ininDios israelitas. Kampa ijkatoya moitaya kemej tet tein monotsa zafiro, chipaktsin kemej iluikak keman takistok.
11 Uan yejua amo teyi kinchiuilij nejin taixyekananij israelitas. ToTajtsin Dios kinnextilij ichikaualis, uan takuajkej uan tatayikej.
12 Uan Jehová kiluij Moisés: “Xipankisa hasta kampa nietok, itech nejin tepet, uan ompa ximokaua. Nimitsmakati lajas kampa nikijkuiloti tanauatilmej para nikinmachtis israelitas”.
13 Yejua ika Moisés uan Josué, akin kipaleuiaya, peujkej pankisaj itech tepet. Uan Moisés kisentokak pankisa itech tepet tein toTajtsin Dios kijitak.*
14 Sayoj ke kiniluijteuak taixyekananij: “Nikan xitechchiakan hasta maj timokepakan. Aarón uan Hur namouan mokauaj, yejua ika komo nankipiaj se kuejmol uelis nankiniluiskej yejuan”.
15 Uan Moisés pankisak itech tepet uan tel mixtaj katka.
16 Iueyi chikaualis Jehová yetoya itech tepet Sinaí, uan chikuasen tonal tel mixtaj katka ompa. Itech chikometika tonal, yejua kiualnotsak Moisés desde mixti.
17 Israelitas kiitayaj ke iueyi chikaualis Jehová moitaya tepekuapan kemej se ueyi tit.*
18 Uan Moisés pankistiajki itech tepet uan poliujtiajki itech mixti, uan ompa mokauak 40 tonalmej.
