Éxodo 26:1-37
26 ”Tikchijchiuas kaltsin kampa nechueyichiuaskej ika majtakti tasal.* Maj chijchiujto ika linojtamalin tein tel kuali, hilo azul, morado uan chichiltik. Itech nejon tasal tikmaijtsomas seki querubines.
2 Sejse tasal kipias 12 metros uan ome cuarta* de ueyak uan chikueyi cuarta* de patauak. Nochin kipiaskej sayoj se tamachiuj.
3 Tikinijtsomas majmakuil tasal para maj mosenkuitokan. Ijkon mochiuaskej ome uejueyi tasal.
4 Ika hilo azul tikijtsomilis seki tamalin itempan se ueyi tasal, uan no ijkon tikchiuas itempan okse ueyi tasal para ompa uelis tikinsalos.
5 Yeskij 50 itempan se ueyi tasal uan 50 itempan okse. Ijkon nochi tamalin tein tikijtsomilis sejse ueyi tasal moixnamiktoskej kampa mosalos.
6 Tikchijchiuas 50 ganchitos ika oro uan ika tikintajtakuiltis ome uejueyi tasal. Ijkon, ueyi tasal para kaltsin mosenkuitos.
7 ”Uan no, tikchijchiuas 11 tasalmej ika chivojtsonti para no tikpantalilis kaltsin.
8 Sejse tasal kipias 13 metros uan 35 centímetros* de ueyak uan chikueyi cuarta* de patauak. Nochin kipiaskej sayoj se tamachiuj.
9 Tikinijtsomas makuil tasal para maj mosenkuito, uan no tikinijtsomas okseki chikuasen tasal. Uan chikuasentika tasal tein mokauas taixpankopa den kaltsin tikelpachos.
10 Tikijtsomilis 50 tamalin itempan sejse ueyi tasal, kampa mosaloskej nejon ome uejueyi tasal.
11 Tikchijchiuas 50 ganchitos ika cobre uan tiktakuiltis itech nejon 50 tamalin tein kipias sejse ueyi tasal para mosentiliskej. Ijkon, yeski sayoj se ueyi tasal.
12 Tasal tein mokauas tatenoj pilkatos. Tajko den tasal tein mokauas tatenoj pilkatos taikampa.
13 Tein pilkatos sekopa uan oksekopa moneki yeski okachi ueyak ke linojtasal, ome cuarta.* Ijkon, kaltsin tamipantsaktos.
14 ”No tikpantalilis kaltsin ipankuetaxyo ichkaueuet* tein chichiltikya. Uan tiktamipantsakuas ika ipankuetaxyo foca.
15 ”Tikchijchiuas seki taman tein tamatis kemej ventanas tein ueueyak para kaltsin. Yeskij de acaciajkouit uan tikinkejketsas.
16 Sejse kipias naui metro uan ome cuarta* de ueyak uan eyi cuarta* de patauak.
17 Kipiaskej ome ininmetsuan* tein mokuitoskej. Ijkon moneki tikinchijchiuas nochin ventanas tein kipias kaltsin.
18 Tikinchijchiuas 20 ventanas tein yaskej sekopa. Keman tikalakis mokauaskej moopochmakopa.
19 ”No tikinchijchiuas ika plata 40 metstapechmej tein yaskej tatsintan de 20 ventanas: itsintan sejse ventana kipias ome metstapechmej kampa tikinmetskajkalakis.
20 Tikinchijchiuas 20 ventanas tein yaskej oksekopa. Keman tikalakis mokauaskej moyekmakopa.
21 No tikchijchiuas ika plata 40 metstapechmej: itsintan sejse ventana kipias ome metstapechmej.
22 Taikankopa den kaltsin, tein mokauas kampa ika pankalaki tonaltsin, kiuikas chikuasen ventanas.
23 Uan no, tikchijchiuas omeok tein yetoskej itech sejse esquina taikankopa den kaltsin kemej kalikximej.
24 Nejin kalikximej tein yetoskej itech sejse esquina ixome yeskij desde tatsintan hasta ajko. Mokuanamikitiuij kampa yetos yekinika ruedita.
25 Yeskij chikueyi ventanas tein kipiaskej 16 metstapechmej de plata: itsintan sejse ventana kipias ome metstapechmej.
26 ”Ika acaciajkouit tikchijchiuas makuil koujmej tein tikinixtapaltalis, para maj ventanas tein kipias kaltsin sekopa amo moxelokan.
27 No tikchijchiuas makuil koujmej para maj amo moxelokan ventanas tein yetoskej oksekopa, uan makuil para tein yetoskej taikankopa den kaltsin.
28 Kouit tein tikixtapaltalis tatajko, peuas se esquina uan tamitiuj hasta itech okse esquina.
29 ”In ventanas tikintamitalilis oro uan tikinchijchiuilis seki rueditas kampa tikinkajkalakis koujmej. Nejon koujmej no tikintamitalilis oro.
30 Moneki tikchijchiuas kaltsin ijkon kemej nimitsnextilij itech nejin tepet.
31 ”Tikchijchiuas se cortina ika hilo azul, morado, chichiltik uan ika linojtamalin tein tel kuali. Itech nejon cortina tikmaijtsomas seki querubines.
32 Tikpilos itech naui kalikximej de acaciajkouit tein tiktamitalilis oro. Ganchos tein ika pilkatoskej yeskij de oro uan kalikximej ijkatoskej itech naui metstapechmej de plata.
33 Tikpilos cortina tatampa den ganchitos, uan tiknalkalakitiuj tatiochiualkaxon* taikan den cortina. Nejon cortina kixelos cuarto tein monotsa Santo uan tein monotsa Santísimo.
34 Tiktalilis ipantsak tatiochiualkaxon tein yetos itech Santísimo.
35 ”Oksekopa den cortina tiktalis mesa. Taixpan den mesa tiktalis tauilketsaloni. Keman tikalakis, mesa yetos moyekmakopa uan tauilketsaloni moopochmakopa.
36 Para ikalakyan kaltsin tikchijchiuilis se cortina ika hilo azul, morado, chichiltik uan ika linojtamalin tein tel kuali.
37 Uan para tikpilos nejin cortina tikchijchiuas makuil kalikximej de acaciajkouit tein tiktamitalilis oro. Tikchijchiuas ganchos de oro uan tikatilis cobre para tikchijchiuas makuil metstapechmej.
Tajtolmelaualismej
^ Oso “tilmaj”.
^ Itech hebreo, “28 molikmej”. Xikonita B14.
^ Itech hebreo, “naui molik”.
^ Itech hebreo, “30 molikmej”.
^ Itech hebreo, “naui molik”.
^ Itech hebreo, “se molik”.
^ Oso “borrego”.
^ Itech hebreo, “majtakti molik”.
^ Itech hebreo, “se molik uan tajko”.
^ Oso “tablones”.
^ Xikonita tatiochiualkaxon.
