Éxodo 27:1-21
27 ”Tikchijchiuas in altar ika acaciajkouit. Yeski cuadrado uan kipias ome metro uan se cuarta* de ueyak uan no ijkon de patauak, uan kipias chikuasen cuarta* de uejkapan.
2 Uan no, itech sejse esquina tikchijchiuilis se cuerno. Nejon cuernos mokuitoskej iuan altar. Uan altar tiktamitalilis cobre.
3 No tikchijchiuas cubetas para ompa tiktemas koujnex,* uan no tikchijchiuas palas, uejueyi kaxit, teposmej tein tenpijpitstikej* para nakat uan tapalkamej para tekol. Nochi nejon tikchijchiuas ika cobre.
4 Tikintajtalis varillas de cobre uan tikchijchiuas kemej se malla. Uan itech sejse esquina tiktalilis naui rueditas tachijchiuj ika cobre.
5 Nejon malla tikalakis itech altar. Tiktalis tani* de itempan uan maj tamiti tatajko.
6 Uan no, tikchijchiuas seki kouit tein ueueyak uan tiktamitalilis cobre. Moneki yeski acaciajkouit.
7 Keman kiuikaskej altar, moneki kinkajkalakiskej nejon koujmej itech rueditas tein yetoskej tajtanakastan.
8 In altar yeski kemej se ueyi caja uan chijchiujtos ika tablones. Moneki chijchiujtos ijkon kemej nimitsnextilij itech nejin tepet.
9 ”Kalampa den kaltsin kampa nechueyichiuaskej no moneki titatsakuas. Kampa tikalakis, moopochmakopa kipias cortinas tachijchiuj ika linojtamalin tein tel kuali, uan kipias 44 metros uan tajko* de ueyak.
10 Tikinkejketsas 20 postes de cobre uan 20 metstapechmej no de cobre, kampa tikinmetskajkalakis. Ganchos tein kipiaskej nejon postes uan rueditas chijchiujtoskej ika plata.
11 Kampa tikalakis, moyekmakopa no yetoskej seki cortinas uan kipias 44 metros uan tajko de ueyak. Tikinkejketsas 20 postes uan tikinkajkalakis itech 20 metstapechmej no de cobre. Nejon postes no kipiaskej ganchos uan rueditas tein chijchiujtoskej ika plata.
12 Taikankopa den kaltsin no yetoskej seki cortinas tein kipias 22 metros uan se cuarta* de patauak. No tikinkejketsas majtakti postes itech majtakti metstapechmej.
13 Uan kampa ika ualkisa tonaltsin, kipias 22 metros uan se cuarta de patauak.
14 Taixpankopa den kaltsin, sekopa yetos se cortina tein kipias chikuasen metro uan eyi cuarta.* Yetos itech eyi postes tein ijijkatoskej itech eyi metstapechmej.
15 Uan oksekopa no yetos se cortina tein kipias chikuasen metro uan eyi cuarta. Yetos itech eyi postes tein ijijkatoskej itech eyi metstapechmej.
16 ”Kampa tikalakis para tipanos kampa yetos kaltsin, maj kipia se cortina tein kipias chikueyi metro uan naui cuarta* de ueyak. Nejon cortina chijchiujtos ika hilo azul, morado, chichiltik uan linojtamalin tein tel kuali. Kampa tikalakis ijijkatoskej naui postes itech naui metstapechmej.
17 Nochin postes tein ijijkatoskej kalampa uan kiyoualoskej kaltsin, kipiaskej rueditas uan ganchos de plata, sayoj ke sejse metstapech yeski de cobre.
18 Kampa tatsaktos kipias 44 metros uan tajko de ueyak, 22 metros uan se cuarta de patauak uan ome metro uan se cuarta de uejkapan. Cortinas tein ika tatsaktos chijchiujtoskej ika linojtamalin tein tel kuali, uan metstapechmej yeskij de cobre.
19 Uan nochi tein mokuis itech tekit tein mochiuas itech kaltsin, yeskij de cobre. Uan clavos tein talpan toktoskej para kitsikoskej cortinas den kaltsin uan tein ika tatsakuaskej kalixpan, no yeskij de cobre.
20 ”Uan no, xikinnauati israelitas maj mitsualkuilikan yekaceite de itakilo olivojkouit para maj candilmej nochipa tauijtokan.
21 Aarón uan ikoneuan kiitaskej maj xotatokan candilmej iixpan Jehová desde tiotak hasta kualkan. Nejon candilmej yetoskej itech kaltsin oksekopa den cortina, tanakastan den tatiochiualkaxon.* Desde axkan nikixtalia nejin tanauatil tein israelitas moneki nochipa kichiuaskej ijkon kemej yoltiaskej.
Tajtolmelaualismej
^ Itech hebreo, “makuil molik”. Xikonita B14.
^ Itech hebreo, “eyi molik”.
^ Oso “koujnex tein chiauak”.
^ Oso “yekapitstikej”.
^ Oso “atauj”, “tauakal”.
^ Itech hebreo, “100 molikmej”.
^ Itech hebreo, “50 molikmej”.
^ Itech hebreo, “15 molikmej”.
^ Itech hebreo, “20 molikmej”.
^ Xikonita tatiochiualkaxon.
