Éxodo 31:1-18
31 Uan Jehová kiluij Moisés:
2 “Xikita, nikijitak* Bezalel, ichankauj Judá. Yejua iokichpil Urí uan iixuiuj Hur.
3 Nikpaleuis ika nochikaualis para maj tamatkej, maj nochi kiajsikamati uan maj kimati keniuj kimachijchiuas tein yeski.
4 Ijkon uelis kinemilis keniuj kualtsin tachijchiuas, keniuj kikuis oro, plata uan cobre,
5 keniuj kitejtekis tet uan kitajtalis kampa moneki yas, uan uelis kichijchiuas tein yeski ika kouit.
6 Nikixtalij Oholiab para maj kipaleui Bezalel. Oholiab iokichpil Ahisamac uan ichankauj Dan. Uan nikchiuas maj akin kuali tamachijchiuaj okachi kuali tamachijchiuakan, para maj kichijchiuakan nochi tein nimitsnauatij.
7 Kichijchiuaskej kaltsin kampa nechueyichiuaskej, tatiochiualkaxon* uan ipantsak, nochi tein mokuis itech kaltsin,
8 mesa uan nochi tein ompa mokuis, tauilketsaloni tachijchiuj ika oro tein okachi kuali uan nochi tein mokuis para in tauilketsaloni, altar kampa tapopochuiskej,
9 altar kampa kichichinoskej tein kimaktiliskej Dios uan nochi tein ompa mokuis, paila uan kampa ijkatos,
10 tasal* tein kualtsin tajkitil, tasal tein kikuis Aarón kemej tiopixkat uan tasal tein kikuiskej ikoneuan para tekitiskej kemej tiopixkamej,
11 aceite para kixeloskej tein noaxka uan kopal tein ajuiyak tein mokuis itech kaltsin. Yejuan kichiuaskej nochi tein nimitsnauatij”.
12 Uan Jehová no kiluij Moisés:
13 “Xikinilui israelitas: ‘Moneki nankichiuaskej tein namechnauatij xikchiuakan itech tonal sábado, porin nejon tonal nimoxelouilij. Yejua nejon tein okachi moneki nankitayekanaltiskej, porin desde axkan nejon kinextia tein timotenkaujkej. Nejon namechelnamiktis ke nejua Jehová, namechxelojtok.
14 Moneki nankichiuaskej tein namechnauatij xikchiuakan itech tonal sábado, porin nejon tonal xeliujtok para nejua uan ijkon moneki nankiitaskej. Akin amo kichiuas tein namechnauatij moneki mikis. Akin tekitis nejon tonal moneki kimiktiskej.
15 Uelis nantekitiskej chikuasen tonal, sayoj ke chikometika tonal amo xikchiuakan nion se tekit porin sábado. Jehová moxelouilijya nejon tonal. Akin tekitis itech tonal sábado, moneki mikis.
16 Israelitas moneki kichiuaskej itech tonal sábado tein nitanauatij. Moneki moseuiskej nejon tonal yejuan uan nochin ininkoneuan akin yoltiaskej. Desde axkan ijkon nimotenkaua iniuan.
17 Desde axkan, tonal sábado kinextia tein nimotenkauak iniuan israelitas, porin nejua Jehová nikchijchiuak iluikak uan taltikpak itech chikuasen tonal, uan itech chikometika tonal amo nitekitikok uan nimoseuij’”.
18 Uan niman keman tamitajtoj iuan Moisés itech tepet Sinaí, Dios kimakak ome lajas kampa tajkuiloj ika ichikaualis.*
Tajtolmelaualismej
^ Oso “nikixpejpenak”.
^ Xikonita tatiochiualkaxon.
^ Oso “tilmaj”.
^ Itech hebreo, “imajpil”.
