Éxodo 38:1-31
38 Uan no, ika acaciajkouit kichijchiuak altar kampa kichichinoskej tein kimaktiliskej Dios. Katka cuadrado uan kipiaya ome metro uan se cuarta* de ueyak uan no ijkon de patauak, uan kipiaya chikuasen cuarta* de uejkapan.
2 Itech sejse esquina kichijchiuilij se cuerno. Altar uan cuernos tein kipiaya mosenkuitoyaj ika sayoj se kouit. Uan kitamitalilij cobre in altar.
3 Satepan kichijchiuak nochi tein mokuiskia itech altar: cubetas, palas, uejueyi kaxit, teposmej tein tenpijpitstikej* para nakat uan tapalkamej para tekol. Kichijchiuak nochi nejin ika cobre.
4 Uan no, kintajtalij varillas de cobre uan kichijchiuak kemej se malla uan kikalakij itech altar. Kitalij tani* de itempan uan tamito tatajko.
5 No kiatilij tepos uan kichijchiuak naui rueditas tein yaskiaj itech naui esquinas. Kintalij nejon rueditas kampa tamia malla para ompa kikajkalakiskiaj seki kouit tein ueueyak.
6 Satepan, kichijchiuak kouit tein ueueyak uan kitamitalilij cobre. Katka acaciajkouit.
7 Uan kinkajkalakij nejon koujmej itech rueditas tein yetoyaj tajtanakastan den altar para ika kiuikaskej. In altar katka kemej se ueyi caja uan chijchiujtoya ika tablones.
8 Uan ika cobre kichijchiuak paila uan kampa ijkatoskia. Kichijchiuak ika cobre tein siuamej kikuiaj para ika moixitaskej.* Nejon siuamej tekitiaj ikalakyan kaltsin kampa kiueyichiuayaj Dios ijkon kemej ixyetoya.
9 Uan tatsakuak kalampa den kaltsin. Kampa kalakiskiaj, ininopochmakopa yetoyaj cortinas tachijchiuj ika linojtamalin tein tel kuali, uan kipiaya 44 metros uan tajko* de ueyak.
10 Kinkejketsak 20 postes de cobre uan 20 metstapechmej no de cobre, kampa kinmetskajkalakiskia. Ganchos tein kipiaya nejon postes uan rueditas chijchiujtoyaj ika plata.
11 Kampa kalakiskiaj, ininyekmakopa no yetoyaj seki cortinas tein kipiaya 44 metros uan tajko de ueyak. Ijijkatoyaj 20 postes uan 20 metstapechmej de cobre. Nejon postes no kipiayaj ganchos uan rueditas tein chijchiujtoyaj ika plata.
12 Sayoj ke, taikankopa den kaltsin, cortinas kipiayaj 22 metros uan se cuarta* de patauak. Ijijkatoyaj majtakti postes itech majtakti metstapechmej. Nejon postes no kipiayaj ganchos uan rueditas tein chijchiujtoyaj ika plata.
13 Kampa ika ualkisa tonaltsin, kipiaya 22 metros uan se cuarta de patauak.
14 Taixpankopa den kaltsin, sekopa yetoya se cortina tein kipiaya chikuasen metro uan eyi cuarta.* Yetoya itech eyi postes tein ijijkatoyaj itech eyi metstapechmej.
15 Uan oksekopa yetoya se cortina tein kipiaya chikuasen metro uan eyi cuarta. Yetoya itech eyi postes tein ijijkatoyaj itech eyi metstapechmej.
16 Nochin cortinas tein ika tatsaktoya kalampa chijchiujtoyaj ika linojtamalin tein tel kuali.
17 Metstapechmej katkaj de cobre, ganchos uan rueditas katkaj de plata. No kitamitalilij plata ikuapan postes. Nochin postes tein ijijkatoyaj kalampa kipiayaj rueditas de plata.
18 Cortina tein yetoya kampa kalakiaj para panoskej kampa yetoya kaltsin, chijchiujtoya ika hilo azul, morado, chichiltik uan linojtamalin tein tel kuali. Kipiaya chikueyi metro uan naui cuarta de ueyak. Uan kipiaya ome metro uan se cuarta de uejkapan, ijkon kemej cortinas tein ika tatsaktoya kalampa.
19 Naui postes tein ijijkatoyaj uan naui metstapechmej chijchiujtoyaj ika cobre. Ganchos uan rueditas tein kipiayaj nejon postes chijchiujtoyaj ika plata uan ininkuapan kitamitalilij plata.
20 Nochin clavos tein talpan toktoyaj para kitsikoskej cortinas den kaltsin uan tein yetoyaj kalampa, katkaj de cobre.
21 Moisés tanauatij maj kijkuilokan nochi tein mokuik para kichijchiuaskej kaltsin kampa yetoskia tatiochiualkaxon.* Akin kinixmatij kemej levitas kijkuilojkej nochi nejon uan kinixyekanak Itamar, iokichpil tiopixkat Aarón.
22 Bezalel kichiuak nochi tein Jehová kinauatijka Moisés. Bezalel katka iokichpil Urí uan iixuiuj Hur, ichankauj Judá.
23 Iuan yetoya Oholiab, akin tamachijchiuaya, tajtsomaya uan tajkitia ika hilo azul, morado, chichiltik uan lino tein tel kuali. Oholiab katka iokichpil Ahisamac uan ichankauj Dan.
24 Oro tein mokuik para tachijchiuaskej kampa Dios taxeloj yejua tein kimaktilijkej Dios uan kimauiuikakej iixpan. Katka mil kilos,* tein kitamachiujkej ika pesa tein kikuiaj kampa Dios taxeloj.
25 Plata tein kiuikakej takamej akin kinijkuilojkaj katka 3,440 kilos,* tein kitamachiujkej ika pesa tein kikuiaj kampa Dios taxeloj.
26 Sejse takat akin kijkuilojkej uan kipiaya 20 xiujmej oso okachi, kiuikak chikuasen gramo* de plata. Kikuikej pesa tein kikuiaj kampa Dios taxeloj para kitamachiuaskej nejon plata. Katkaj 603,550* takamej.
27 Kiatilijkej 3,420 kilos* de plata uan ika kichijchiujkej imetstapech sejse ventana tein kipiaya kaltsin. Uan no ika kinchijchiujkej metstapechmej tein yetoyaj kampa pilkatoya cortina tein taxelouaya kalijtik. Ika nejon 3,420 kilos kinchijchiujkej 100 metstapechmej. Sejse metstapech kipiaya 34 kilos ika 200 gramos.
28 Uan ika 20 kilos de plata, yejua kinchijchiuak ganchos para kalikximej, kintamitalilij plata ininkuapan nejon kalikximej uan kinsentilij.
29 Cobre tein kitemakakej ajsik 2,420 kilos.*
30 Ika nochi nejin cobre, kichijchiuak imetstapech sejse kalikxit tein yetoya ikalakyan kaltsin, altar uan varillas tein kipiaya, nochi tein mokuiskia itech altar,
31 ininmetstapech postes tein ijijkatoyaj kalampa uan kiyoualouayaj kaltsin, ininmetstapech postes tein ijijkatoyaj kampa kalakiaj para panoskej kampa yetoya kaltsin, clavos tein talpan toktoyaj para kitsikoskej cortinas den kaltsin uan clavos tein yetoyaj kalampa.
Tajtolmelaualismej
^ Itech hebreo, “makuil molik”. Xikonita B14.
^ Itech hebreo, “eyi molik”.
^ Oso “yekapitstikej”.
^ Oso “atauj”, “tauakal”.
^ Nejin katkaj espejos tein ijkuak kikuiaj.
^ Itech hebreo, “100 molikmej”.
^ Itech hebreo, “50 molikmej”.
^ Itech hebreo, “15 molikmej”.
^ Xikonita tatiochiualkaxon.
^ Itech hebreo, “29 talentos uan 730 siclos”. Xikonita B14.
^ Itech hebreo, “100 talentos uan 1,775 siclos”.
^ Itech hebreo, “tajko siclo”.
^ Oso “seiscientos tres mil quinientos cincuenta”.
^ Itech hebreo, “100 talentos”.
^ Itech hebreo, “70 talentos uan 2,400 siclos”.
