Éxodo 6:1-30
6 Yejua ika Jehová kinankilij Moisés: “Axkan tikitati tein nikchiuiliti tekiuaj akin taixyekana Egipto. Ika nochikaualis nikchiuas maj namechkaua xikisakan, uan keman kiitas nochikaualis namechkixtis de kampa taixyekana maski amo kinekis”.
2 Uan Dios kiluij Moisés: “Nejua niJehová.
3 Nejua miakpa nikinnextilij Abrahán, Isaac uan Jacob ke nejua niDios akin nikpia nochi chikaualis, sayoj ke notokay Jehová amo senkis nikinixmatiltij.
4 No nimotenkauak iniuan ke nikinmakaskia tal tein poui Canaán, kampa nenkej maski amo ompa kayomej.
5 Nejua nikakini keniuj israelitas tayokolchokaj. Akin nemij Egipto semi kintajyouiltiaj. Uan amo nikelkaujtok tein nimotenkauak iniuan ininuejkaujtatuan.
6 ”Yejua ika xikinilui israelitas: ‘Nejua niJehová, uan nikchiuas maj amo namechteltekitiltikanok nion maj namechtajyouiltikanok. Ika nochikaualis namechmakixtis uan nikintatsakuiltis akin nemij Egipto.
7 Uan nanyeskij nannoaxkauan uan niyeski namoDios. Namejuan nankiyekmatiskej ke nejua niJehová namoDios, akin kichiuas maj amo namechtajyouiltikanok.
8 Namechuikas hasta itech tal tein nimotenkauak nikinmakas Abrahán, Isaac uan Jacob, uan namechmakas namejuan. Nejua niJehováʼ”.
9 Satepan, Moisés kinmatiltij israelitas nejin, sayoj ke amo kikakkej porin tayokoxtoyaj uan semi kintajyouiltijtoyaj.
10 Uan Jehová kiluij Moisés:
11 “Xikiluiti tekiuaj akin taixyekana Egipto maj kinkaua maj kisakan israelitas”.
12 Sayoj ke Moisés kinankilij Jehová: “Sayoj ke israelitas amo nechkakij. Uan kemej amo niyektajtoua, tekiuaj ipa amo no nechkakis”.
13 Maski ijkon, Jehová oksepa kiniluij Moisés uan Aarón tein monekia kiniluiskej israelitas uan tekiuaj, para kinkixtiskej de Egipto.
14 Yejuan nejin takamej akin kinixyekanayaj ininchankauan. Ikoneuan Rubén katkaj Hanok, Palú, Hezrón uan Carmí. Yejuan nejin ichankauan Rubén, iokichpil Israel akin tayekanaya.
15 Ikoneuan Simeón katkaj Jemuel, Jamín, Ohad, Jakín, Zóhar uan Shaúl. Shaúl katka iokichpil se siuat de Canaán. Yejuan nejin ichankauan Simeón.
16 Yejua nejin inintokay ikoneuan Leví, uan ininfamilias: Guersón, Cohat uan Merarí. Leví nemik 137 xiujmej.
17 Ikoneuan Guersón uan inintokay ininfamilias katkaj Libní uan Simeí.
18 Ikoneuan Cohat katkaj Amram, Izhar, Hebrón uan Uziel. Cohat nemik 133 xiujmej.
19 Ikoneuan Merarí katkaj Mahlí uan Musí.
Yejuan nejin katkaj ichankauan Leví uan ininkoneuan.
20 Uan Amram monamiktij iuan Jokébed, akin katka ipariente itat. Satepan Jokébed kipiak Aarón uan Moisés. Amram nemik 137 xiujmej.
21 Ikoneuan Izhar katkaj Coré, Néfeg uan Zicrí.
22 Ikoneuan Uziel katkaj Misael, Elzafán uan Sitrí.
23 Uan Aarón monamiktij iuan Eliseba. Eliseba katka isiuapil Aminadab uan iikniuj Nahsón. Satepan, Eliseba kinpiak Nadab, Abihú, Eleazar uan Itamar.
24 Ikoneuan Coré katkaj Asir, Elcaná uan Abiasaf. Yejuan nejin katkaj ichankauan Coré.
25 Uan Eleazar, iokichpil Aarón monamiktij iuan semej isiuapipiluan Putiel. Satepan kipiak se iokichpil akin monotsaya Finehás.
Yejuan nejin takamej akin kinixyekanayaj ichankauan Leví, xejxeliujtokej por familias.
26 Jehová kiniluij Aarón uan Moisés: “Xikinkixtikan israelitas de Egipto uan maj kualtsin xejxeliujtiakan”.
27 Yejuan nejin Moisés uan Aarón akin kinojnotsatoj tekiuaj akin taixyekanaya Egipto para kinkixtiskej israelitas de ompa.
28 Keman Jehová kinojnotsak Moisés ompa Egipto,
29 Jehová kiluij: “Nejua niJehová. Xikilui tekiuaj akin taixyekana Egipto nochi tein nimitsiluijtok”.
30 Uan Moisés kiluij Jehová: “Sayoj ke, kemej amo ueli niyektajtoua, tekiuaj ipa amo nechkakis”.
