Éxodo 8:1-32
8 Uan Jehová kinauatij Moisés: “Xikitati tekiuaj akin taixyekana Egipto uan xikilui: ‘Yejua nejin tein Jehová kijtoua: “Xikinkaua nokoneuan israelitas maj kisakan para maj nechueyichiuatij.
2 Komo tiksentoka amo tikinkaua maj kisakan, nikchiuati maj sentakuikan kalamej itech nochi tal kampa titaixyekana.
3 Itech ueyiat Nilo tentoskej kalamej uan ualkijkisaskej de ompa. Kalakiskej mochan, mocuarto uan mocama. No kalakiskej ininchan motakeualuan uan ininchan nochin akin tikinixyekana, kalakiskej kampa tikmaneloua harina uan kampa tipanchiua.
4 Uan kalamej mitssenkuiskej tejua, akin tikinixyekana uan nochin motakeualuan”’”.
5 Satepan, Jehová kinauatij Moisés: “Xikilui Aarón: ‘Ximomamelaua ika motopil para maj kalamej kisakan den uejueyi amej, kampa kiojtiaj at den ueyiat Nilo uan kampa ataj, uan maj sentakuikan itech nochi Egipto’”.
6 Uan Aarón momamelauak para maj kalamej ualkijkisakan de nochin amej, uan maj sentakuikan itech nochi Egipto.
7 Sayoj ke, tiopixkanaualmej no kichiujkej* nejon, uan no kichiujkej maj kisanij kalamej uan maj sentakuinij itech nochi Egipto.
8 Uan tekiuaj kinnotsak Moisés uan Aarón uan kiniluij: “Xiktataujtikan Jehová maj techinajchiuili kalamej, porin axkan nikneki nikinkauasya namokniuan maj kimaktilitij Jehová tapialmej”.
9 Uan Moisés kiluij tekiuaj: “Tejua uelis tinechiluis kemanian tikneki maj niktataujti Dios maj namechinajchiuili kalamej tejua, motakeualuan uan akin tikinixyekana, para maj amo yetokanok itech mokaluan. Kalamej sayoj mokauaskej itech ueyiat Nilo”.
10 Tekiuaj kinankilij: “Mosta”. Yejua ika Moisés kiluij: “Para tikmatis ke amo akin kemej toDios Jehová, mochiuas kemej tikijtoua.
11 Dios namechinajchiuilis kalamej tejua, motakeualuan uan akin tikinixyekana, uan amo yetoskejok itech mokaluan. Kalamej sayoj mokauaskej itech ueyiat Nilo”.
12 Yejua ika, Moisés uan Aarón kikaujteujkej tekiuaj, uan Moisés kitataujtij Jehová maj kinixpolo kalamej tein kititanilijka tekiuaj.
13 Uan Jehová kichiuak tein Moisés tajtanik, uan kalamej peuak mikij itech kalmej, kalixpan uan kampa tatokaj.
14 Akin nemiaj Egipto peuak kinsejsentiliaj uan tel miakkan kinmontontenkej. Uan itech nochi Egipto peuak tatsojyaya.
15 Keman tekiuaj kiitak ke amo onkayajok kalamej, amo kinekik kinkakis Moisés uan Aarón, ijkon kemej Jehová kijtojka.
16 Uan Jehová kinauatij Moisés: “Xikilui Aarón: ‘Ximomamelaua uan xikuiteki tal ika motopil, uan talnex mokepas pisilmoyomej tein momoyauaskej itech nochi Egiptoʼ”.
17 Uan yejuan ijkon kichiujkej. Aarón momamelauak uan kiuitekik tal ika itopil, uan talnex mokepak pisilmoyomej itech nochi Egipto uan peuak kintitipitsaj nochin akin ompa nemiaj uan tapialmej.
18 Tiopixkanaualmej no kinekkej kinchiuaskej* pisilmoyomej, sayoj ke amo uelkej. Uan pisilmoyomej kintitipitsayaj nochin uan no kintitipitsayaj tapialmej.
19 Yejua ika tiopixkanaualmej kiluijkej tekiuaj: “¡Nejin kichiuak* Dios!”. Sayoj ke tekiuaj kisentokak amo kinekik kinkakis, ijkon kemej Jehová kijtojka.
20 Uan Jehová kinauatij Moisés: “Mosta, kualkan ximeua uan xiknamikiti tekiuaj. Yejua yati ueyiat, uan moneki tikiluis nejin: ‘Yejua nejin tein Jehová kijtoj: “Xikinkaua nokoneuan israelitas maj kisakan para maj nechueyichiuatij.
21 Sayoj ke komo amo tikinkaua maj kisakan, nimitstitaniliti moyomej* tejua, motakeualuan uan akin tikinixyekana, uan kalakiskej itech mokaluan. Moyomej tentoskej itech nochin kalmej de Egipto uan hasta talpan, uan sentakuiskej.
22 Nejon tonal nikchiuas maj amo kalakikan itech tal tein poui Gosén, kampa nemij nokoneuan israelitas. Ompa amo ajsiskej moyomej, uan ijkon tikmatis ke nejua Jehová nikan nietok itech nejin tal.
23 Nikchiuas maj moita akonimej nokoneuan uan akonimej tikinixyekana tejua. Nejin mochiuas mosta”’”.
24 Uan yejua nejon tein Jehová kichiuak. Tentiualayaj tel miak moyomej uan kalakitoj ichan tekiuaj, ininchan itakeualuan uan itech nochi Egipto. Fiero tachiujkej.
25 Satepan, tekiuaj kinnotsak Moisés uan Aarón uan kiniluij: “Xikmaktilitij tapialmej namoDios, sayoj ke nikan Egipto”.
26 Sayoj ke Moisés kinankilij: “Amo uelis tikchiuaskej nejon. Nikan Egipto tel amo kiuelitaskiaj maj tikinmiktikan tapialmej para tikmaktiliskej toDios Jehová. Komo kiitaskiaj ke tikinmiktijtokej tapialmej, techtetemaskiaj.*
27 Yejua ika, tiatij eyi tonal ne taluakyan uan ompa tikmaktiliskej toDios Jehová seki tapialmej, ijkon kemej yejua techiluij”.
28 Yejua ika tekiuaj kijtoj: “Namechkauas xiakan taluakyan para xikmaktilitij tapialmej namoDios Jehová. Sayoj ke amo uejka xiakan. Uan xiktataujtikan namoDios maj techinajchiuili moyomej”.
29 Moisés kinankilij: “Niati, uan niktataujtis Jehová maj mosta namechinajchiuili moyomej tejua, motakeualuan uan akin tikinixyekana. Sayoj ke amo oksepa xitechkajkayaua* uan xitechkaua maj tikisakan para tikmaktiliskej tapialmej Jehová”.
30 Uan Moisés kikaujteuak tekiuaj uan kitataujtij Jehová.
31 Uan Jehová kichiuak tein Moisés kitajtanij. Yejua ika Dios kinajchiuilij moyomej tekiuaj, itakeualuan uan akin kinixyekanaya. Amo mokauak nion se moyot.
32 Sayoj ke tekiuaj oksepa amo kinekik takakis uan amo kinkauak israelitas maj kisakan.
Tajtolmelaualismej
^ Oso “kichiujkej ika ininnaualo”.
^ Oso “kichiuaskej ika ininnaualo”.
^ Itech hebreo, “imajpil”.
^ Nejin tamatij kemej sayolimej tein tetipiniaj.
^ Oso “techtepoxoniskiaj”, “techmojmotaskiaj ika tet”.
^ Oso “amo ximauiltijto”.
