1 Crónicas 10:1-14
-
Saúl uan ikoneuan mikij (1-14)
10 Filisteos moteuijtoyaj iniuan israelitas. Sayoj ke soldados israelitas kincholuijkej filisteos uan filisteos kinmiktijkej miakej israelitas itech tepet Guilboa.
2 Filisteos motalojkej para kintokatiaskej Saúl uan ikoneuan. Keman kinajsitoj, kimiktijkej Jonatán, Abinadab uan Malki-Súa. Yejuan katkaj ikoneuan Saúl.
3 Filisteos kisenkuikej Saúl. Keman akin kitamotayaj flechas kiajsikej, kikokojkej.
4 Yejua ika Saúl kiluij takat akin kimamaliaya tein ika tateuiaya: “Xikixti momachete tein ojkan tenej* uan xinechtokili. Amo nikneki maj ualakan ne takamej akin amo kitekitiliaj Dios uan maj nechtajyouiltikan”.* Sayoj ke takat akin kitamamaliaya amo kinekik kimiktis porin semi mouia. Yejua ika Saúl kiketsak imachete tein ojkan tenej uan itech motamotak.
5 Keman takat akin kitamamaliaya Saúl kiitak ke mikkaya, no kiketsak imachete tein ojkan tenej, itech motamotak uan mikik.
6 Nejon tonal ijkon mikkej Saúl uan eyi ikoneuan. Uan no mikkej nochin akin nemiaj ichan akin iuan yetoyaj nejon tonal.
7 Keman israelitas akin yetoyaj tal tamanis* tein moixmati kemej Jezreel kiitakej ke nochin soldados cholojkaj uan ke Saúl uan ikoneuan mikkaj, kiskej de ininueyi xolal uan cholojkej. Satepan filisteos ompa chanchiuatoj.
8 Mostika, filisteos yajkej kampa uejuetstoyaj soldados israelitas akin kinmiktijkaj para kinkuiliskej nochi tein patiyoj tein kipiayaj. Uan kiitakej ke itech tepet Guilboa uetstoyaj Saúl uan ikoneuan.
9 Saúl kikixtilijkej itasal, kikechkotonkej uan kikixtilijkej nochi tein motaliliaya para tateuis. Satepan kititankej aksa* maj youi noyan* kampa nemiaj filisteos uan itech templos kampa kinueyichiuayaj inintatadiosuan* para maj kitematilti ke tatankaj.
10 Nochi tein Saúl motaliliaya para tateuis kikauatoj itech templo kampa kiueyichiuayaj inintatadios, uan itsontekon kipilotoj itech templo kampa kiueyichiuayaj inintatadios Dagón.
11 Akin nemiaj Jabés tein yetok Galaad kimatkej nochi tein filisteos kichiuilijkaj Saúl.
12 Yejua ika nochin soldados yajkej kikuitoj inakayo Saúl uan ininnakayo ikoneuan uan kinuikakej Jabés. Kitokkej ininomiyouan* tatampa de se ueyi kouit tein yetok Jabés uan amo takuajkej chikome tonal.
13 Ijkon mikik Saúl porin kiixtopeuak Jehová uan porin amo kitakamatik tein Jehová kinauatijka. Yejua no kiitato se siuat akin kinnojnotsaya mikemej para maj kipaleui,
14 uan amo kitemoj Jehová para maj kipaleui. Yejua ika kimiktij* uan kiixtalij David akin katka iokichpil Jesé para maj tekiuajti.
Tajtolmelaualismej
^ Oso “moespada”.
^ Oso “noka mauiltikan”.
^ Oso “takomol”.
^ Oso “akin”, “akaj”.
^ Oso “nochkan”.
^ Oso “inintiotsitsin”.
^ Kitokkej ininomiyouan satepan ke kichichinojkej ininnakayo. Xikonita 1Sa 31:12, 13.
^ Nikan ika tajtojtok Jehová.
