1 Crónicas 12:1-40
-
Akin kipaleuijkej David para maj tekiuajti (1-40)
12 Yejuan nejin takamej akin kiajsitoj David ompa Ziclag keman motatijtinemia* porin Saúl iokichpil Quis kitemojtinemia. Yejuan katkaj soldados akin kuali tateuiayaj akin kipaleuiayaj David keman yaya tateuiti.
2 Kipiayaj arcos* uan uelia kitamotayaj tet uan flechas ika ininyekmay uan ika ininopochmay. Katkaj iikniuan* Saúl akin pouiaj iniuan ikoneuan Benjamín.
3 Ahiézer kinixyekanaya nejin takamej uan Joás kipaleuiaya. Inintat Ahiézer uan Joás monotsaya Semaá akin katka kayot Guibeá. Uan okseki takamej akin no iniuan yetoyaj monotsayaj Jeziel uan Pélet akin katkaj ikoneuan Azmávet. No yetoya Beracá, Jehú akin katka kayot Anatot,
4 uan Ismayá akin katka kayot Gabaón. Ismayá pouia iniuan 30 soldados akin kuali tateuiayaj uan yejua kinixyekanaya. No yetoyaj Jeremías, Jahaziel, Johanán, Jozabad akin guederatita,
5 Eluzái, Jerimot, Bealías, Semarías, Sefatías akin harifita,
6 Elcaná, Isías, Azarel, Joézer, Jasobeam akin katkaj ichankauan Coré,
7 uan Joelá uan Zebadías akin katkaj ikoneuan Jeroham. Jeroham katka kayot Guedor.
8 Seki ikoneuan Gad yajkej taluakyan ompa Ziclag kampa David motatijtoya. Yejuan kiajsitoj David para kipaleuiskej. Katkaj soldados akin kimatiaj keniuj tateuiskej, kimatiaj keniuj kuali kikuiskej uejueyi escudos uan lanzas.* Ininixko moitaya kemej iixko se león* uan ijsiujka motalouayaj kemej masamej tein nemij kampa tepeyoj.
9 Katkaj 11 soldados, Ézer kinixyekanaya uan iniuan yetoyaj Abdías, Eliab,
10 Mismaná, Jeremías,
11 Atái, Eliel,
12 Johanán, Elzabad,
13 Jeremías uan Macbanái.
14 Nochin yejuan katkaj ikoneuan Gad uan kinixyekanayaj soldados. Akin amo semi chikauak katka uelia moteuiaya iniuan 100 soldados uan akin semi chikauak katka uelia moteuiaya iniuan mil soldados.
15 Yejuan nejin takamej akin kipanauijkej ueyiat Jordán itech metsti nisán* keman ueyiat moskaltijtoya, uan kichiujkej maj cholouanij nochin akin nemiaj kampa tamanis.* Sekin yajkej kampa ualkisa tonaltsin uan oksekin kampa pankalaki.
16 Seki takamej akin pouiaj iniuan ikoneuan Benjamín uan Judá no kiajsitoj David kampa motatijtoya.
17 David kisak, moketsak ininixpan uan kiniluij: “Komo nanualajkej nanechpaleuikoj, xikyekmatikan ke kuali timouikaskej. Sayoj ke komo nanechkitskikoj para nanechuikaskej kampa yetokej akin nechtauelitaj maski amo teyi nikchiuak, maj ininDios touejkaujtatuan kiita tein nankichiujtokej uan maj kiixtali tein mochiuas”.
18 Uan Dios kimakak* ichikaualis Amasái akin kinixyekanaya 30 soldados uan Amasái kijtoj:
“Tejuan timitspaleuiskej uan timitstekitiliskej David ikoneuj Jesé.
Kualtsin xieto uan maj kualtsin yetokan akin mitspaleuiajporin moDios mitspaleuijtok”.
Yejua ika David kinkauak maj kipaleuikan uan kinixtalij maj kinixyekanakan isoldados.
19 Seki takamej akin pouiaj iniuan ikoneuan Manasés no peuak kipaleuiaj David keman yajka iniuan filisteos para kiteuiskej Saúl. Sayoj ke David amo tateuijok iniuan filisteos porin akin kinixyekanayaj filisteos kitokakej.* Filisteos monojnotskej uan moiluijkej: “Peuas kipaleuis iteko Saúl uan techmiktis”.
20 Takamej akin pouiaj iniuan ikoneuan Manasés akin peuak kipaleuiaj David keman yajki Ziclag katkaj Adná, Jozabad, Jediael, Miguel, Jozabad, Elihú uan Ziletái. Yejuan kinixyekanayaj mijmil soldados akin pouiaj iniuan ikoneuan Manasés.
21 Nejin takamej akin pouiaj iniuan ikoneuan Manasés katkaj yolchikaujkej uan amo mouiaj. Yejua ika kipaleuijkej David keman kinteuij seki takamej akin kitachtekitoj. Satepan yejuan kinixyekankej isoldados David.
22 Mojmostaj ajsiaj takamej akin kinekiaj kipaleuiskej David, yejua ika motelmiakilijkej isoldados. Tel miakej katkaj ijkon kemej isoldados Dios tein yetokej ne iluikak.
23 Takamej akin kiajsitoj David ompa Hebrón kiixtalijkej kemej tekiuaj para maj kiixpata Saúl ijkon kemej Jehová kijtojka. Nejin takamej kiuikayaj tein ika tateuiskej uan nikan nesi kanachimej katkaj.
24 De ikoneuan Judá katkaj 6,800* soldados. Yejuan kiuikayaj uejueyi escudos uan lanzas, ijkon ueliskia niman tateuiskej.
25 De ikoneuan Simeón katkaj 7,100* soldados. Yejuan katkaj yolchikaujkej uan amo mouiaj.
26 De ikoneuan Leví katkaj 4,600* takamej akin yayaj iniuan soldados.
27 Jehoiadá kinixyekanaya ikoneuan Aarón uan iuan yajkej 3,700* takamej.
28 Iniuan nejon takamej no yetoya Sadoc, se telpoch akin katka yolchikauak uan amo mouia. Uan no iuan yajkej 22 takamej akin kinixyekanayaj soldados akin pouiaj iniuan ichankauan Sadoc.
29 De ikoneuan Benjamín katkaj eyi mil soldados. Yejuan katkaj iikniuan* Saúl. Miakej de nejon soldados tateuijkaj para kipaleuiskej Saúl uan ichankauan.
30 De ikoneuan Efraín katkaj 20,800* soldados. Nejin takamej katkaj yolchikaujkej uan amo mouiaj. Yejuan akin okachi kinixmatiaj de nochin ininuejueyi familias.
31 Soldados akin pouiaj iniuan seki* ikoneuan Manasés katkaj 18 mil. Nejin soldados kinijitakej para kiixtalitiuij David kemej tekiuaj.
32 De ikoneuan Isacar katkaj 200 takamej akin kinixyekanayaj soldados. Yejuan kuali taixejekouayaj uan kimatiaj toni monekia kichiuaskej israelitas. Uan no kinixyekanayaj nochin ininikniuan.
33 De ikoneuan Zabulón katkaj 50 mil soldados akin niman ueliskiaj yaskej tateuitiuij uan kipiayaj tein ika tateuiayaj. Nochin sayoj kipaleuiayaj David.
34 De ikoneuan Neftalí katkaj mil takamej akin taixyekanayaj, uan iniuan yayaj 37 mil soldados akin kipiayaj uejueyi escudos uan lanzas.
35 De ikoneuan Dan katkaj 28,600* soldados akin niman ueliskiaj yaskej tateuitiuij.
36 De ikoneuan Aser katkaj 40 mil soldados akin niman ueliskiaj yaskej tateuitiuij.
37 Uan de ikoneuan Rubén, Gad uan seki* ikoneuan Manasés akin nemiaj oksekopa den ueyiat Jordán katkaj 120 mil soldados. Yejuan kipiayaj miak taman tein ika tateuiskej.
38 Nochin yejuan katkaj soldados akin niman ueliskiaj yaskej tateuitiuij. Ualajkej Hebrón porin kitelnekiaj* kiixtaliskej David kemej tekiuaj itech xolal Israel uan oksekin israelitas no kinekiaj maj David tekiuajti.
39 Uan mokaujkej iuan David eyi tonal, porin akin nemiaj Judá kintachijchiuijkaj para takuaskej uan tatayiskej.
40 Uan no, akin ompaka nemiaj uan hasta akin nemiaj kampa kintaxejxelouilijkaj ikoneuan Isacar, ikoneuan Zabulón uan ikoneuan Neftalí kiualkuiaj miak taman tein ueliskia kikuaskej porin israelitas semi yolpakiaj. Kiualkuiaj harina, taxkaltsitsin tein chijchiujtoyaj ika higos tein uakik uan pasas, vino uan aceite. Nochi nejon kinmamaltijkaj burros, camellos, mulas uan kuakuejmej para kiualkuiskej. No kinualkuiaj miak kuakuejmej uan ichkamej.*
Tajtolmelaualismej
^ Oso “mocholtijtinemia”.
^ Oso “tein ika kitamotayaj flechas”.
^ Katkaj iparientes porin no pouiaj iniuan ichankauan Benjamín.
^ Nejin katka se kouit tein ueyak tein itempan kipiaya se tepos tein puntajyej.
^ Nejin xa kijtosneki ke katkaj yolchikaujkej oso ke moitayaj kemej leones.
^ Itech hebreo, “yekinika metsti”. Axkan nejin metsti uetsi itajkotian marzo hasta itajkotian abril. Xikonita nisán.
^ Oso “takomol”.
^ Itech hebreo, “kikemik ika”.
^ Oso “kieualtijkej”.
^ Oso “seis mil ochocientos”.
^ Oso “siete mil cien”.
^ Oso “cuatro mil seiscientos”.
^ Oso “tres mil setecientos”.
^ Katkaj iparientes porin no pouiaj iniuan ichankauan Benjamín.
^ Oso “veinte mil ochocientos”.
^ Itech hebreo, “tajko”.
^ Oso “veintiocho mil seiscientos”.
^ Itech hebreo, “tajko”.
^ Itech hebreo, “ika nochi ininyolo kinekiaj”.
^ Oso “borregos”.
