1 Crónicas 13:1-14
13 David kinnojnotsak takamej akin kinixyekanayaj mijmil soldados, akin kinixyekanayaj ciejcien soldados uan nochin okseki taixyekananij.
2 Uan David kiniluij nochin akin mosentilijkaj: “Tiknekij tikinnauatiskej maj touan mosentilikan nochin toparientes israelitas, tiopixkamej uan levitas akin yetokej itech ininueyi xolal.* Ijkon tikchiuaskej komo namejuan nankiitaj ke kuali yetok uan komo toDios Jehová techkaua.
3 Tiknekij tikuitiuij tatiochiualkaxon* tein iaxka toTajtsin Dios”. David kijtoj nejon porin israelitas kisenkaujkaj tatiochiualkaxon keman Saúl tekiuajtitoya.
4 Nochin israelitas kiuelitakej tein David kijtoj porin kiitakej ke yejua tein monekia kichiuaskej.
5 Yejua ika David kinsentilij israelitas, nochin akin nemiaj tanakastan den ueyiat* tein yetok ompa Egipto hasta Lebó-Hamat.* Kinsentilij para yaskej kikuitiuij tatiochiualkaxon tein iaxka toTajtsin Dios ompa Quiryat-Jearim.
6 David uan nochin israelitas pankiskej Baalá tein no moixmati kemej Quiryat-Jearim. Nejin ueyi xolal yetok kampa kintaxejxelouilijkaj ikoneuan Judá. Yejuan yajkej ompa para kipankixtiskej tatiochiualkaxon tein iaxka toTajtsin Dios, akin tokotsyetok tapani* den querubines. Israelitas yayaj kampa yetoya tatiochiualkaxon para kiueyichiuaskej itokay Jehová.
7 Tatiochiualkaxon tein iaxka toTajtsin Dios yetoya ichan Abinadab. Keman kiuikakej, kitejkoltijkej* itech se carreta tein yankuik. Uzá uan Ahió kiuikayaj nejon carreta.
8 David uan nochin israelitas semi yolpakiaj uan kiiluichiuilijtiayaj toTajtsin Dios. Yejuan cantarojtiayaj, kitsotsontiayaj arpas, cítara,* kitsilinijtiayaj tambortsitsin,* kikakistiltijtiayaj címbalos* uan kipitstiayaj trompetas.
9 Sayoj ke keman ajsitoj kampa kichipauayaj xinach kampa motanotsa Kidón, Uzá kikitskij tatiochiualkaxon porin kuakuejmej yaya kitsonkepatij.
10 Uan Jehová tel kualanik iuan Uzá porin kikitskij tatiochiualkaxon uan yejua ika kimiktij. Uzá mikik iixpan tatiochiualkaxon.*
11 Sayoj ke David kualanik porin Jehová kualanik iuan Uzá uan kimiktij. Uan ompa kampa momikilij Uzá tatokaytijkej Pérez-Uzá* uan ijkon moixmati hasta axkan.
12 Uan nejon tonal David kimouilij toTajtsin Dios uan kijtoj: “Ijkon amo uelis nikualkuis tatiochiualkaxon tein iaxka toTajtsin Dios”.
13 David amo kiualkuik tatiochiualkaxon kampa yejua nemia, itech ueyi xolal tein iaxka David, ta tanauatij maj kiuikanij ichan Obed-Edom akin kayot Gat.
14 Tatiochiualkaxon tein iaxka toTajtsin Dios yetoya eyi metsti ichan Obed-Edom. Uan Jehová semi kintatiochiuiaya akin nemiaj ichan Obed-Edom uan momiakilij nochi tein kipiaya.
Tajtolmelaualismej
^ Itech hebreo, “ininueyi xolal uan ixtauat tein kiyoualoua kampa kinpiaj inintapialuan”.
^ Xikonita tatiochiualkaxon.
^ Oso “Sihor”.
^ Oso “kampa peua Hamat”.
^ Oso xa “tatajko”.
^ Oso “kipankixtijkej”.
^ Nejin tein ika tatsotsonayaj chijchiujtoya ika kouit uan kitaliliayaj cuerdas.
^ Oso “panderetas”.
^ Nejin tein ika tatsotsonayaj katkaj ome uejueyi teposmej tein yojyoualtikej.
^ Itech hebreo, “iixpan Dios”.
^ Tokayit tein kijtosneki ‘ojti kampa kitatsakuiltijkej Uzá’.
