1 Crónicas 14:1-17
14 Hiram akin tekiuajtia Tiro kintitanik seki takamej maj kiitatij David. No kititanilij cedrojkouit uan kintitanik kalchiuanij* uan koujxijximanij para maj kichijchiuilikan David se ueyi kali.
2 Uan David kiajsikamatik ke Jehová kiixtalijkaya maj nochipa yejua tekiuajti itech xolal Israel, uan ke kintatiochiuijtoya israelitas akin kinixyekanaya. Dios kichiuak nejon para kinpaleuis israelitas.
3 David monamiktij iniuan okseki siuamej ompa Jerusalén uan kinpiak okseki iokichpipiluan uan isiuapipiluan.
4 Ikoneuan David akin yolkej Jerusalén monotsayaj Samúa, Sobab, Natán, Salomón,
5 Ibhar, Elisúa, Elpélet,
6 Noga, Néfeg, Jafía,
7 Elisamá, Beeliadá uan Elifélet.
8 Keman filisteos kimatkej ke israelitas kiixtalijkaj David kemej tekiuaj itech nochi xolal Israel, pankiskej para kiteuiskej. Keman David kimatik ke filisteos yayaj kiteuitij, yajki kinixnamikito.
9 Filisteos ajsikej itech tal tamanis* tein moixmati kemej Refaím uan peuak kinteuiaj akin ompa nemiaj.
10 David kitajtanij* Dios: “¿Maj nipankisa nikinteuiti filisteos? ¿Tinechpaleuis maj nikintani?”. Jehová kinankilij: “Kemaj, xipankisa xikinteuiti uan nimitspaleuis xikintani”.
11 Yejua ika David pankisak Baal-Perazim para kinteuis filisteos uan kintanik. Uan David kijtoj: “ToTajtsin Dios kintanik akin nechtauelitaj, kemej se tepamit tein xitini porin at kikuitikisa”. Yejua ika ompa tatokaytijkej Baal-Perazim.
12 Filisteos ompa kinkaujteujkej inintatadiosuan* uan David tanauatij maj kinchichinokan.
13 Satepan filisteos oksepa kinteuitoj akin nemiaj itech tal tamanis.
14 David oksepa kitajtanij Dios toni maj kichiua, sayoj ke toTajtsin Dios kinankilij: “Amo xipankisa para tikinixnamiktias, ta xitayoualoti kampa yetokej koujmej bacá* para tikinteuis desde ompa.
15 Uan keman tikakis ke ininkuapan koujmej bacá mokaki kemej yeskia miak soldados tajtaksatiuitsej,* ijkuak peua xikinteui soldados filisteos porin nejua akin yekmelauj niDios nimitsyekantias para tikintanis”.
16 Uan David kichiuak nochi tein toTajtsin Dios kinauatij. Israelitas kinteuijtiajkej soldados filisteos desde Gabaón hasta Guézer uan kintankej.
17 Uan nochin akin nemiaj itech okseki altepemej kiixmatkej David uan Jehová kichiuak maj kimouilianij.
Tajtolmelaualismej
^ Oso “tepanchiuanij”.
^ Oso “takomol”.
^ Oso “kitajtoltij”.
^ Oso “inintiotsitsin”.
^ Oso “bekja”.
^ Oso “tateliksatiuitsej”, “tatsoniksatiuitsej”.
