1 Crónicas 16:1-43
16 David kichijchiujka se kaltsin* para ompa kitalis tatiochiualkaxon* tein iaxka toTajtsin Dios. Yejua ika ompa kitalijkej tatiochiualkaxon uan kichichinouilijkej Dios miak tapialmej. No kitemaktijkej okseki taman para sentakuaskej* iuan toTajtsin Dios uan yejua kiitstoya tein kichiujtoyaj.
2 Keman David kitamichichinouilij Dios nejon tapialmej uan kimaktilij okseki taman para sentakuaskej, kitajtanij Jehová maj kintatiochiui israelitas.
3 Uan no kinmajmakak nochin takamej uan siuamej israelitas se pantsin youaltik, se taxkaltsin tein chijchiujtoya ika dátiles* uan se taxkaltsin tein chijchiujtoya ika pasas.
4 Satepan kinixtalij seki levitas para tekitiskej kampa yetoya tatiochiualkaxon tein iaxka Jehová. Yejuan ompa kiueyitaliskiaj* Jehová ininDios israelitas, kitasojkamatiliskiaj uan kiueyichiuaskiaj.
5 Asaf kinixyekanaya uan Zacarías kipaleuiaya maj taixyekana. Uan Jeiel, Semiramot, Jehiel, Matitías, Eliab, Benaya, Obed-Edom uan Jeiel kitsotsonayaj cítaras* uan arpas. Asaf kikakistiltiaya címbalos.*
6 Uan Benaya uan Jahaziel nochipa yayaj kampa yetoya tatiochiualkaxon tein iaxka toTajtsin Dios para kipitsaskej trompetas. Yejuan katkaj tiopixkamej.
7 Nejon tonal David kiniluij Asaf uan iparientes maj kicantarouilikan Jehová se canción tein kichijchiuilijka para kitasojkamatilis. Yejuan cantarojkej ijkuin:
8 “¡Xiktasojkamatilikan Jehová, xiktokaytikan keman nankitataujtiskej,xikinmatiltikan tein kichiuani akin nemij itech okseki xolalmej!
9 Xicantarouilikan, xicantarouilikan* para nankiueyitaliskej,xitanemilikan itech* nochi tein kualtsin tein kichiuani.
10 Xikuelitakan ika nantajtoskej itokaytsin tein chipauak.
Maj yolpakikan akin kitemouaj Jehová.
11 Xiktemokan maj Jehová namechixyekana uan xiktajtanikan maj namechchikaua.
Nochipa xiktemokan nankiyolpaktiskej.*
12 Xikelnamikikan nochi tein kualtsin tein kichiuani,xikelnamikikan milagros tein kichiuani uan keniuj tetatsakuiltiani.
13 Xikelnamikikan nejin, namejuan nanikoneuan Israel akin katka itekitikauj.Xikelnamikikan namejuan nanikoneuan Jacob akin Dios namechijitak.
14 Yejua toDios Jehová.
Yejua kiixtalia tein mochiuas itech nochi taltikpak.
15 Nochipa xikelnamikikan tein motenkauak,amo keman xikelkauakan tein motenkauak.
16 Kemaj, xikelnamikikan tein motenkauak iuan Abrahán,uan tein motenkauak iuan Isaac.
17 Motenkauak nejon para maj Jacob kiyekmatini ke kichiuaskia.Ijkon motenkauak iuan Israel
18 keman kiluij ‘Nimitsmakas nochi tal tein poui Canaán,yejua nejon tal tein namoaxka yeski’.
19 Kijtoj nejin keman amo miakej katkaj,kemaj, amo miakej katkaj uan okseko kayomej katkaj.
20 Yejuan yajtinenkej itech altepemejuan panotiajkej itech uejueyi xolalmej.
21 Dios amo kikauak maj kintajyouiltianij,ta kintatsakuiltij tekiuanij para kinpaleuis.
22 Dios kijtoj: ‘Amo teyi xikinchiuilikan akin nikinijitakuan amo xikinchiuilikan notanauatijkauan* tein amo kuali’.
23 ¡Maj nochin akin nemij nikan taltikpak kicantarouilikan Jehová!
¡Mojmostaj xikiniluikan oksekin keniuj kinmakixtia itekitikauan!
24 Xikinmatiltikan akin nemij itech okseki altepemej ke Dios semi ueyichiujkej,xikinmatiltikan akin nemij itech okseki xolalmej nochi tein kualtsin tein kichiuani.
25 Porin Jehová semi ueyi uan moneki maj sayoj yejua se kiueyichiua.
Sayoj yejua kinamiki maj se kimouili uan amo tatadiosmej.*
26 Nochin tatadiosmej tein kinueyichiuaj itech okseki xolalmej amo tapaleuiaj,sayoj ke Jehová kichijchiuak iluikak.
27 Yejua semi ueyichiujkej uan kampa yetok semi takualtsinkan,yejua semi chikauak uan yolpaki kampa yetok.
28 Nochin familias xikueyitalikan Jehová,xikueyitalikan Jehová porin semi ueyichiujkej uan chikauak.
29 Xikueyitalikan itokay Jehová porin ijkon kinamiki maj se kichiua,ximotokikan kampa yejua yetok uan xikuikilikan teisa.
Ximotalilikan namotasal tein okachi kualtsin* uan ximoixpilokan iixpan* Jehová.
30 ¡Maj nochin akin nemij nikan taltikpak uiuiyokakan porin kimouiliaj!
Yejua kichijchiuak taltikpak* kemej nion teyi uelis kiolinis.*
31 Maj yolpaki nochi tein onkak ne iluikak uan maj yolpaki nochi tein onkak nikan taltikpak.Xikinmatiltikan akin nemij itech okseki altepemej: ‘¡Jehová peuakya tekiuajti!’.
32 Maj chikauak kakisti mar uan nochi tein ompa onkak,maj yolpakikan nochin tein yetokej ixtauat.
33 Uan koujmej maj no kemej yeskia tsajtsikan iixpan Jehová porin yolpakij.Maj yolpakikan porin kiixtalikiuj* tein kinnamiki kiseliskej akin nemij nikan taltikpak.
34 Xiktasojkamatilikan Jehová porin yolkuali.Yejua nochipa techtasojtas.
35 Uan xikijtokan: ‘Xitechpaleui toDios akin titemakixtia,xitechsentili uan xitechmakixti para maj amo teyi techchiuilikan akin nemij itech uejueyi altepemej.Xitechmakixti para maj tikueyitalikan motokaytsin tein senkis chipauakuan para maj tiyolpakikan keman timitsueyichiuaskej.
36 Maj tikueyitalikan Jehová ininDios israelitas,maj nochipa tikueyitalikan’”.
Uan nochin kijtojkej “¡Maj ijkon mochiua!”,* uan kiueyitalijkej Jehová.
37 Uan David kiixtalij Asaf uan iparientes maj tekitikan kampa yetoya tatiochiualkaxon tein iaxka Jehová. Yejuan mojmostaj tekitiskiaj iixpan tatiochiualkaxon ijkon kemej ixyetoya.
38 Obed-Edom uan 68 iparientes tajpiayaj puertajtenoj. Uan Obed-Edom iokichpil Jedutún uan Hosá no tajpiayaj puertajtenoj.
39 Uan David kiixtalij tiopixkat Sadoc uan iparientes akin no katkaj tiopixkamej maj tekitikan kampa yetoya ikaltsin* Jehová. Nejon kaltsin yetoya ompa Gabaón kampa yayaj kiueyichiuatij Dios.
40 Yejuan ompa yetoyaj para kichichinouiliskej Jehová miak tapialmej uan okseki taman itech altar kampa kichichinouayaj nochi tein kimaktiliayaj Dios. Kichiuayaj nejon kualkan uan tiotak. Uan no ompa yetoyaj para kichiuaskej nochi tein ijkuiliujtok itech Tanauatil tein Jehová kinmakaka israelitas.
41 No iniuan yetoyaj Hemán, Jedutún uan okseki takamej akin kinijitakaj para kitasojkamatiliskej Jehová porin “yejua nochipa techtasojtas”.
42 Hemán uan Jedutún kipitsayaj trompetas, kikakistiltiayaj címbalos uan kitsotsonayaj okseki taman para kiueyichiuaskej* toTajtsin Dios. Uan ikoneuan Jedutún tajpiayaj puertajtenoj.
43 Satepan nochin akin mosentilijkaj yajkej ininchan, uan David no yajki ichan para kitajtanis Dios maj kintatiochiui nochin akin nemiaj ichan.
Tajtolmelaualismej
^ Nejin kaltsin chijchiujtoya ika tasal.
^ Xikonita tatiochiualkaxon.
^ Nejin takilot motemaka itech se kouit tein tamati kemej palmajkouit.
^ Itech hebreo, “kielnamikiskiaj”.
^ Nejin tein ika tatsotsonayaj chijchiujtoya ika kouit uan kitaliliayaj cuerdas.
^ Nejin tein ika tatsotsonayaj katkaj ome uejueyi teposmej tein yojyoualtikej.
^ Oso “xiktatsotsonilikan”.
^ Oso xa “ika xitajtokan”.
^ Itech hebreo, “iixko”.
^ Xikonita tanauatijkej.
^ Oso “tiotsitsin”.
^ Akin motaliliaya nejin tasal kinextiaya ke xeliujtoya para Jehová.
^ Oso “xikueyichiuakan”.
^ Oso “sekosan kitalij taltikpak”.
^ Oso “kitsetselos”.
^ Oso “kiixtaliko”.
^ Oso “¡Amén!”.
^ Xikonita ikaltsin Dios.
^ Oso “kicantarouiliskej”.
