1 Crónicas 17:1-27
17 Keman David nemiaya ichan, niman kiluij tanauatijkej* Natán: “Nejua kualtsin ninemi itech se kali tein chijchiujtok ika cedrojkouit, sayoj ke tatiochiualkaxon tein iaxka Jehová yetok itech se kaltsin”.*
2 Natán kinankilij David: “Xikchiua tein tiknemilijtok porin toTajtsin Dios mitspaleuia”.
3 Sayoj ke nejon youak Dios kinojnotsak Natán uan kiluij:
4 “Xiouj xikiluiti notekitikauj David: ‘Yejua nejin tein kijtoua Jehová: “Tejua amo tinechchijchiuilis se kali kampa nichanchiuas.
5 Desde ke nikinmakixtij israelitas hasta axkan, amo keman nikpiani se kali kampa nechueyichiuaskej, ta nochipa nechueyichiuanij* itech se kaltsin tein miakkan kiuikatinemij.
6 Nochi nejon tiempo keman nikinixyekanak israelitas, nikinixtalij jueces para maj kinyekpianij akin pouij itech noxolal. ¿Kemansa tikakik maj nikintajtaniani semej nejon jueces maj nechchijchiuilikan se kali de cedrojkouit?”ʼ.
7 ”No xikilui notekitikauj David: ‘Yejua nejin tein kijtoua Jehová akin kinixyekana iangeluan: “Tejua tikinpixtinemia ichkamej* ne ixtauat, sayoj ke nimitskixtij de ompa para tikinixyekanas israelitas akin pouij itech noxolal.
8 Uan nochipa nimitspaleuis kampa yeski tias. Moixpan nikinixpolos nochin akin mitstauelitaj. Uan nikchiuas maj no miakkan mitsixmatikan ijkon kemej kinixmatij okseki uejueyi chiuanimej.
9 Nikinmakas israelitas akin pouij itech noxolal se tal tein yeski ininaxka. Yejuan kualtsin nemiskej ompa uan amo akin kinkuejmolosok. Akin amo yolkualmej amo kintajyouiltiskejok kemej achto kintajyouiltijkaj.
10 Israelitas akin pouij itech noxolal kintajyouiltijkej desde keman nikinixtalij jueces para maj kinixyekanakan. Uan nikintanis akin mitstauelitaj, uan nimitsyekiluia: ‘Nejua Jehová nikchiuas maj mokoneuan nochipa tekiuajtikan’.*
11 ”’”Keman timikis,* nikixtalis semej mokoneuan maj mitsixpata uan maj mochiua tekiuaj, uan nikchiuas maj nochipa yejua tekiuajti.
12 Yejua nechchijchiuilis se kali uan nikchiuas maj nochipa yejua tekiuajti.
13 Nejua niyeski niitat uan yejua yeski nokoneuj. Nejua nochipa niktasojtas* uan amo keman nikauas ijkon kemej nikauak akin tekiuajtik achto ke tejua titekiuajtiskia.
14 Nikauas maj motali itech noueyi silla para maj tekiuajti nochipaya, uan nochipa semej ikoneuan tekiuajtis”’”.
15 Natán kimatiltij David nochi tein Dios kiluijka uan kinextilijka.
16 Keman Natán tamitajtoj, tekiuaj David yajki uan motalij para kitataujtis Jehová uan kiluij: “NoDios Jehová, tejua semi tinechpaleuiani maski nejua uan nochankauan amo teyi tichiuanimej.
17 Uan amo sayoj yejua tikchiuani noDios, ta no tikijtoua ke nokoneuan miak tiempo tekiuajtiskej. Uan tejua noDios Jehová tinechita kemej se takat akin moneki okachi kiueyitaliskej.
18 Tejua semi tinechueyitaliani nejua David nimotekitikauj, yejua ika toni uelisok nimitsiluis ta tejua kuali tinechixmati.
19 Jehová, tikchiuak nochi nejin tein semi kualtsin uan tikchiuani maj miakej kimatikan nejin porin noka timotekipachoua uan porin ijkon tiknekik.
20 Amo akin kemej tejua Jehová. Sayoj tejua yekmelauj tiDios. Nochi tein tikakinij kinextia ke melauj nejin.
21 Amo onkak okse xolal kemej moxolal Israel. Tejua toTajtsin Dios tikinmakixtito de Egipto porin tikinijitak para maj mochiuakan moxolal. Tikchiuak miak milagros keman tikinkixtijtiajki akin nemiaj itech okseki altepemej para maj ompa nemikan akin pouij itech moxolal keman ojtokatoyaj. Ijkon tikchiuak maj miakej mitsixmatikan uan maj mitstakachiuakan.*
22 Tikchiuak maj israelitas mochiuakan moxolal nochipaya, uan tejua Jehová timochiuak ininDios.
23 Jehová, tikijtoj ke nejua uan nochankauan titekiuajtiskej, yejua ika amo keman xikpata tein timotenkauak uan nimitstataujtia ijkon xikchiua.
24 Maj mochiua tein motokay kijtosneki, uan maj nochin kiueyitalikan motokay nochipaya uan maj kijtokan: ‘Jehová akin kinixyekana iangeluan, ininDios israelitas, yejua Dios akin kiixyekana xolal Israel’. Uan xikinpaleui nochankauan para maj miak tiempo tekiuajtikan.
25 Porin tejua noDios tinechmatiltij ke tikneki maj nokoneuan nochipaya tekiuajtikan.* Yejua ika noteko amo nimoui nimitstataujtis.
26 Jehová tejua yekmelauj tiDios, uan timotenkauani nouan ke tikchiuas nochi nejin tein tinechiluij.
27 Yejua ika nimitstataujtia xikintatiochiui nochankauan uan maj nochipa mitsyolpakti tein kichiuaj, porin tejua Jehová tikintatiochiuiani uan nochipa kuali nemiskej”.
Tajtolmelaualismej
^ Xikonita tanauatijkej.
^ Nejin kaltsin chijchiujtoya ika tasal.
^ Itech hebreo, “ninentinemini”.
^ Oso “borregos”.
^ Oso “nimitschijchiuilis se kali”.
^ Itech hebreo, “timoseuitiuj iniuan mouejkaujtatuan”.
^ Oso “niknextilis ke niktasojta”.
^ Oso “mitspoujkaitakan”.
^ Oso “tinechchijchiuilis se kali”.
