1 Crónicas 18:1-17
18 Panok tiempo uan David kinteuij filisteos uan kintanik. No kinkuilij ueyi xolal Gat uan xolaltsitsin tein ompa pouij.
2 David no kintanik moabitas uan yejuan peuak kitekitiliaj uan kimakayaj tomin uan okseki taman tein kiixtalijka maj kimakakan.
3 Keman Hadadézer akin tekiuajtia Zobá yaya moinaxkatiliti talmej tein yetoyaj tanakastan den ueyiat Éufrates, David kiteuij uan kitanik. Kiteuij tanakastan de Hamat.
4 David kikuilij Hadadézer mil carros tein kikuia para tateuis, chikome mil soldados akin yayaj itech caballos uan 20 mil soldados akin metsnejnemiaj. No kinkoxojkuiltij* caballos tein kitilantiayaj carros uan sayoj 100 caballos amo teyi kinchiuilij.
5 Keman sirios akin nemiaj Damasco kipaleuikoj Hadadézer akin tekiuajtia Zobá, David kinmiktij 22 mil sirios.
6 Uan David kintitanik seki soldados maj tajpiatij Siria tein poui Damasco. Uan sirios peuak kitekitiliaj David uan kimakayaj tomin uan okseki taman tein kiixtalijka maj kimakakan. David nochipa tatania kampa yaya tateuiti porin Jehová kipaleuiaya.*
7 Uan no, David kinkuilij ininescudos itekitikauan Hadadézer. Nejon escudos tein katkaj de oro uan youaltikej kinuikak Jerusalén.
8 Uan David no kiuikak miak cobre tein onkaya Tibhat uan Cun. Tekiuaj Hadadézer achto taixyekanaya itech nejon uejueyi xolalmej. Satepan Salomón kikuik nejon cobre para kichijchiuas ueyi tanque,* kalikximej uan okseki taman tein mokuiskia ichan Dios.
9 Tou akin tekiuajtia Hamat kitekakilij ke David kintanka nochin isoldados Hadadézer akin tekiuajtia Zobá.
10 Yejua ika niman kititanik Hadoram akin katka iokichpil maj kiitati tekiuaj David uan maj kitajtani* ox paktok. No kinauatij maj kilui ke yolpakia porin kiteuijka Hadadézer uan kitanka. (Tou semi yolpakia porin Hadadézer miakpa kiteuijka). Hadoram kiuikilij David miak taman tein chijchiujtoya ika oro, plata uan cobre.
11 Tekiuaj David kimaktilij Jehová nochi nejon oro, plata uan cobre, ijkon kemej kichiujka ika plata uan oro tein kinkuilijka edomitas, moabitas, ammonitas, filisteos uan amalequitas.
12 Abisái iokichpil Zeruyá kinmiktij 18 mil edomitas itech tal tamanis* tein moixmati kemej Sal.
13 Abisái kintitanik seki soldados ompa Edom para maj tajpiakan itech nochi ueyi xolal, uan nochin edomitas peuak kitekitiliaj David. David nochipa tatania kampa yaya tateuiti porin Jehová kipaleuiaya.*
14 David kisentokak kinixyekanak nochin israelitas. Keman israelitas kiixpantiliayaj teisa, kuali kiixtaliaya tein kinamikia mochiuas uan kichiuaya tein kuali.
15 Joab iokichpil Zeruyá kinixyekanaya nochin isoldados David, uan Jehosafat iokichpil Ahilud kijkuilouaya nochi tein mochiuaya itech altepet.
16 Sadoc uan Ahimélec katkaj tiopixkamej uan Savsá katka tajkuilojkej. Itat Sadoc katka Ahitub uan itat Ahimélec katka Abiatar.
17 Benaya iokichpil Jehoiadá kinixyekanaya soldados akin kiyekpiayaj tekiuaj.* Uan ikoneuan David katkaj uejueyi chiuanimej.
Tajtolmelaualismej
^ Oso “kinkotstejtekik”.
^ Oso “kimakixtiaya”.
^ Itech hebreo, “Mar”.
^ Oso “kitajtolti”.
^ Oso “takomol”.
^ Oso “kimakixtiaya”.
^ Itech hebreo, “keretitas uan peletitas”.
