1 Crónicas 19:1-19
19 Satepan, Nahás akin kinixyekanaya ammonitas momikilij uan iokichpil peuak tekiuajti.
2 Yejua ika David kijtoj: “Nahás nochipa nechnextilij ke nechtasojtaya, yejua ika no niknextiliti Hanún iokichpil Nahás ke niktasojta”. Yejua ika David kintitanik seki takamej maj kiyolchikauatij Hanún porin momikilijka itat. Itakeualuan David yajkej kampa nemiaj ammonitas para kiyolchikauaskej Hanún.
3 Sayoj ke keman ajsikej, akin kinixyekanayaj ammonitas kiluijkej Hanún: “¿Tiknemilia ke David kinualtitanik itakeualuan porin yekmelauj kineki mitsyolchikauas? Yejua amo yekmelauj kineki kitakachiuas* mopaj, ta xa kinualtitanik maj tachiakij toaltepeuj para kiitaskej keniuj uelis mitstaniskej”.
4 Yejua ika Hanún tanauatij maj kinkitskikan itakeualuan David uan maj kintenximakan. No tanauatij maj kintekilikan inintasal hasta inintajkoyan uan kintokak.*
5 Keman kiluitoj tekiuaj David tein kinchiuilijkaj itakeualuan, niman kintitanik seki takamej maj kinnamikitij porin semi kinpinaujtijkaj. David tanauatij maj kiniluikan: “Ximokauakan Jericó uan ximokepakan hasta keman oksepa moskaltis namotentson”.
6 Kemej ammonitas kichiujkej nejon, kiitakej ke David peuak kintauelita. Yejua ika Hanún uan ammonitas kintitankej seki takamej maj yakan Mesopotamia,* Aram-Maacá uan Zobá. Uan kinmakakej 34 toneladas* de plata para ompa taneuiskej carros tein kikuij para tateuiskej uan para kintakeuaskej soldados akin youij itech caballos.
7 Taneujkej 32 mil carros uan no kitakeujkej akin tekiuajtia Maacá uan isoldados. Nochin mosentilitoj Medebá uan ompa kitalijkej ininkaltsitsin.* Ammonitas kiskej den uejueyi xolalmej kampa nemiaj uan mosentilijkej para tateuitiuij.
8 Keman David kimatik tein kichiujkej ammonitas, kititanik Joab uan nochin isoldados para kinteuiskej. No kintitanik isoldados akin okachi kuali tateuiayaj.
9 Ammonitas kiskej de ininueyi xolal uan motejtekpankej kalampa para tateuiskej. Uan tekiuanij akin yajkaj kinpaleuitoj moketsatoj hasta ixtauat.
10 Joab kiitak ke seki soldados ualayaj taikan uan oksekin ualayaj taixpan para kiteuiskej. Yejua ika kinijitak seki soldados israelitas akin okachi kuali tateuiayaj uan kiniluij maj motejtekpanakan para kinteuiskej soldados sirios.
11 Joab no kiixtalij Abisái maj kinixyekana okseki soldados uan kinnauatij maj motejtekpanakan para kinteuiskej ammonitas.
12 Uan Joab kiluij Abisái: “Komo tikita ke sirios techtantokej, xitechpaleuiki. Uan komo nikita ke ammonitas namechtantokej, tejuan tamechpaleuitiuij.
13 Moneki tiyeskij tiyolchikaujkej uan amo timouiskej para tikinpaleuiskej israelitas uan para amo techkuiliskej uejueyi xolalmej tein toDios techmakak. Uan Jehová kichiuas tein kiitas ke okachi tapaleuis”.
14 Uan Joab uan isoldados peuak kinteuiaj sirios uan sirios cholojkej.
15 Keman ammonitas kiitakej ke sirios cholojkaj, yejuan no kicholuijkej Abisái akin katka iikniuj Joab uan kalakitoj ininueyi xolal. Satepan Joab mokepak Jerusalén.
16 Keman sirios kiitakej ke israelitas kintankaj, kintitankej seki takamej maj kinnotsatij sirios akin nemiaj tanakastan den ueyiat Éufrates. Nejon sirios kinixyekanaya Sofac akin Hadadézer kiixtalijka maj kinixyekana isoldados.
17 Keman David kimatik ke sirios mosentilijkej, no niman kinsentilij nochin soldados israelitas. Yejuan kipanauijkej ueyiat Jordán, ajsikej kampa yetoyaj sirios uan motejtekpankej para iniuan moteuiskej. David uan isoldados motejtekpankej para kinixnamikiskej sirios, uan sirios iniuan moteuijkej.
18 Sayoj ke sirios kincholuijkej israelitas. David kinmiktij chikome mil soldados sirios akin kiuikayaj carros tein kikuiaj keman tateuiayaj uan 40 mil soldados akin metsnejnemiaj. Uan no kimiktij Sofac akin kinixyekanaya nochin soldados sirios.
19 Keman itekitikauan Hadadézer kiitakej ke israelitas kintankaj, niman kiluijkej David ke amo kiteuiskiajok uan peuak kitekitiliaj. Uan sirios amo kinekkejok* kinpaleuiskej ammonitas.
Tajtolmelaualismej
^ Oso “kipoujkaitas”.
^ Oso “kineualtij”.
^ Itech hebreo, “Aram-Naharaim”.
^ Itech hebreo, “mil talentos”. Xikonita B14.
^ Nejin kaltsitsin chijchiujtoyaj ika tasal.
^ Oso “amo moixeuijkejok”.
