1 Crónicas 21:1-30
21 Satanás* peuak kinixnamiki israelitas uan kichiuak maj David kinpouani nochin akin nemiaj itech xolal Israel.
2 Yejua ika David kiluij Joab uan akin kinixyekanayaj soldados israelitas: “Xiakan xikinpouatij israelitas.* Xipeuakan Beer-Seba uan xitamitij Dan. Satepan ximokepakan uan xinechiluikij kanachimej nankinpoujkej”.
3 Sayoj ke Joab kiluij David: “¡Maj Jehová miakpa* kinmiakilti israelitas akin pouij itech ixolal! Notekiuaj, yejuan ipa motakeualuan, ¿keyej tikneki tikinpouas? ¿Keyej tikneki tikchiuas maj israelitas motajtakolmakakan?”.
4 Sayoj ke tekiuaj amo kikakik Joab. Yejua ika Joab yajki itech nochi xolal Israel para kinpouas israelitas. Keman matamik mokepak Jerusalén.
5 Uan Joab kiluito David kanachimej israelitas kinijkuilojka. Ompa Israel nemiaj 1,100,000* takamej akin ueliaj tateuiayaj ika machete tein ojkan tenej* uan ompa Judá nemiaj 470,000* takamej akin ueliaj tateuiayaj ika machete tein ojkan tenej.
6 Sayoj ke Joab amo kinpouak takamej akin pouiaj iniuan ikoneuan Leví uan Benjamín, porin nion tepitsin kiuelitak tein tekiuaj tanauatijka.
7 Uan toTajtsin Dios nion tepitsin kiuelitak tein kichiuak David, yejua ika kintatsakuiltij israelitas.
8 David kiluij toTajtsin Dios: “Semi nitajtakolchiuak keman nitanauatij maj kinpouakan israelitas. Noteko, nimitstataujtia xinechtapojpolui porin niknextij ke amo nitamati”.
9 Yejua ika Jehová kiluij Gad akin kimatiltiaya David tein Dios kiitaltiaya:
10 “Xiouj xikiluiti David: ‘Yejua nejin tein kijtoua Jehová: “Nimitstatsakuiltiti. Onkak eyi taman tein uelis nimitschiuilis. Xinechilui katiyejua tikneki”’”.
11 Yejua ika Gad kiitato David uan kiluij: “Yejua nejin tein kijtoua Jehová: ‘Xinechilui keniuj tikneki maj nimitstatsakuilti.
12 ¿Tikneki maj israelitas eyi xiuit amo kipiakan tein kikuaskej? ¿Tikneki maj eyi metsti mitstanikan akin mitstauelitaj uan maj mitsteuikan ika ininmachete tein ojkan tenej? ¿Oso tikneki maj eyi tonal se iángel Jehová kintatsakuilti israelitas? Nejon ángel kikuis imachete Jehová para kichiuas maj israelitas kokolispeuakan* uan maj miakej mikikanʼ. Kuali xiknemili uan xinechilui toni tikneki maj niknankili akin nechualtitanik”.
13 David kinankilij Gad: “Amo nikmati toni nikchiuas, fiero tein panotok. Okachi kuali maj nechtatsakuilti Jehová porin yejua semi teiknelia, sayoj ke maj amo nechtatsakuiltikan takamej”.
14 Uan Jehová kichiuak maj israelitas kokolispeuanij uan mikkej 70 mil.
15 Uan no, toTajtsin Dios kititanik se ángel maj kinixpoloti akin nemiaj Jerusalén. Sayoj ke keman Jehová kiitak ke ángel yaya kinixpolotiya, kiniknelij israelitas* porin kichiuak maj kokolispeuakan. Yejua ika kiluij ángel tein kinixpolojtoya israelitas: “¡Ijkon xikauaya, amo xikinmiktiok!”. Iángel Jehová amo uejka yetoya de ital Ornán kampa kichipauayaj trigo. Ornán katka kayot Jebús.
16 Keman David moixajokuik, kiitak iángel Jehová ejekaixko.* Ángel maaktoya imachete tein ojkan tenej uan ika kinextijtoya Jerusalén. Yejua ika David uan taixyekananij israelitas niman motankuaketskej uan moixpilojkej hasta talpan. Yejuan motalilijkaj tasal tein teajuayotia.
17 David kiluij toTajtsin Dios: “Nejua nitajtakolchiuak, nejua nimopoloj. In israelitas* amo teyi kichiujkej, ta nejua nitanauatij maj kinpouanij. NoDios Jehová, nimitstataujtia nejua xinechtatsakuilti uan xikintatsakuilti ichankauan nopaj, sayoj ke amo xikintatsakuiltiok akin pouij itech moxolal”.
18 Uan iángel Jehová kinauatij Gad maj kiluiti David maj pankisa ital Ornán.* Kiluij maj kichijchiuili Jehová se altar kampa kichipauayaj xinach.
19 Uan David pankisak ital Ornán ijkon kemej kinauatijka Gad akin kimatiltijka tein Jehová kijtojka.
20 Ornán kichipaujtoya trigo uan keman moixkepak kiitak in ángel. Uan naui ikoneuan akin iuan yetoyaj motatijkej.*
21 David pankisak kampa yetoya Ornán. Keman Ornán kiitak, niman kisak de kampa kichipaujtoya trigo. Motankuaketsak iixpan David uan moixpiloj hasta talpan.
22 Uan David kiluij Ornán: “Xinechnamakilti* motal kampa tikchipaua trigo para nikchijchiuilis Jehová se altar uan maj amo kisentokaok techtatsakuilti. Xinechnamakilti kemej ipa ipatiuj”.
23 Sayoj ke Ornán kiluij David: “Nimitstayokolia notekiuaj uan xikchiua tein tikixtalijtok tikchiuas.* No nimitsintayokolia kuakuejmej uan trigo para tikchichinouilis Dios uan kouit* para titaxotaltis.* Nimitstayokolia nochi nejin”.
24 Sayoj ke tekiuaj David kinankilij Ornán: “Amo xinechtayokoli motal, ta maj nimitstamiixtauili. Amo nimitskuilis tein moaxka para nikmaktilis Jehová nion nikchichinouilis tapialmej tein amo nikinixtauani”.
25 Yejua ika David kimakak Ornán chikome kilo* oro para kiixtauilis nejon tal.
26 Uan David kichijchiuilij Jehová se altar, kichichinouilij tapialmej uan kimaktilij okseki taman para sentakuaskej* uan satepan kitataujtij. Jehová kinankilij keman kiualtitanik tit* desde ne iluikak para kichichinos tein David kimaktilijka itech altar.
27 Uan Jehová kinauatij ángel maj kikalaki imachete tein ojkan tenej itech icubierta.
28 David kisentokak kimaktilij Jehová tapialmej kampa Ornán* kichipauaya trigo, porin kiitak ke kinankilijka keman ompa kitataujtij.
29 Sayoj ke ikaltsin Jehová* tein Moisés kichijchiujka taluakyan yetoyaok ompa Gabaón kampa taueyichiuayaj. No ompa yetoyaok altar kampa kichichinouiliayaj Dios miak taman.
30 David semi kimouiliaya iángel Jehová tein maaktoya imachete, yejua ika amo yajtoyaok ompa Gabaón para kitajtanis Dios maj kipaleui.
Tajtolmelaualismej
^ Oso xa “Se akin taixnamiki”.
^ Nikan ika motajtoua takamej israelitas akin kiajxitijkajya xiujmej para ueliskia mochiuaskej soldados.
^ Itech hebreo, “se cientojok”.
^ Oso “se millón cien mil”.
^ Oso “espada”.
^ Oso “cuatrocientos setenta mil”.
^ Oso “kokoxkakuikan”.
^ Oso “semi motayokoltij”.
^ Itech hebreo, “ijkatok tatajko den iluikak uan taltikpak”.
^ Itech hebreo, “In ichkamej”.
^ Itech hebreo, “Ornán akin katka kayot Jebús”.
^ Oso “mocholtijkej”.
^ Itech hebreo, “Xinechmaka”.
^ Itech hebreo, “tein tikitas ke kuali yetok”.
^ Nejin katka kouit tein kititilatsayaj kuakuejmej keman kichipauayaj xinach.
^ Oso “titichiuas”.
^ Itech hebreo, “600 siclos”. Xikonita B14.
^ Oso “tekol”.
^ Itech hebreo, “Ornán akin katka kayot Jebús”.
^ Xikonita ikaltsin Dios.
