1 Crónicas 22:1-19
22 David kijtoj: “Nikan yetos ichan toTajtsin Jehová uan no nikan yetos altar kampa kichichinouiliskej tapialmej”.
2 Satepan, David tanauatij maj kinsentilikan akin amo katkaj israelitas akin nemiaj itech xolal Israel para kintekitiltis. Yejua kinnauatij maj kitajtapanakan tet uan maj kialaxokan para kichijchiuaskej ichan toTajtsin Dios.
3 David no kisentilij miak tepos para kichijchiuaskej clavos tein ika kinsojsoskiaj puertas. Ika nejon tepos no kichijchiuaskiaj uejueyi grapas. Uan no kisentilij tel miak cobre tein nion uelia se kitamachiuaya.
4 No kisentilij tel miak cedrojkouit porin akin nemiaj Sidón uan Tiro kiualkuilijkej David tel miak cedrojkouit.
5 Uan David kijtoj: “Nokoneuj Salomón okichpilok uan ayamo kimati kichiuas miak taman. Uan kali tein moneki kichijchiuilis Jehová moneki tel ueyi yeski uan tel kualtsin chijchiujtos, para maj nochin akin nemij itech okseki altepemej kiixmatikan. Yejua ika niksentiliti miak taman tein kikuis keman kichijchiuas kali”. Uan achto ke momikiliskia, David kisentilij miak taman tein mokuiskia keman kichijchiuaskiaj kali.
6 Uan no, kinotsak Salomón akin katka iokichpil uan kinauatij maj kichijchiua se kali para Jehová, ininDios israelitas.
7 David kiluij iokichpil Salomón: “Nejua niktelnekia nikchijchiuas se kali kampa kiueyitaliskej itokay noDios Jehová.
8 Sayoj ke Jehová nechiluij: ‘Tejua miakkan titateuito uan miakej tikinmiktij. Kemej nikitani ke miakej tikinmiktiani, amo tikchijchiuas se kali kampa kiueyitaliskej notokay.
9 Tikpias se mookichpil akin yolseujkanemis uan nikchiuas maj amo kiixnamikikan akin kitauelitaj, yejua ika monotsas Salomón.* Uan israelitas kualtsin nemiskej keman yejua tekiuajtitos.
10 Yejua nechchijchiuilis se kali para ompa kiueyitaliskej notokay. Yejua yeski nokoneuj uan nejua nimochiuas niitat uan nikchiuas maj nochipa yejua tekiuajti itech xolal Israel’.
11 ”Nokonetsin, niktataujtia Jehová maj mitspaleui para uelis tiktamichijchiuas ichan moDios Jehová, ijkon kemej yejua kijtoj ke tikchiuas.
12 Uan no niktataujtia Jehová maj mitspaleui xitamatkej uan kuali xitaixejeko keman mitskauas xikinixyekanaya israelitas, para uelis tiktakamatis itanauatil moDios Jehová.
13 Kualtsin tinemis komo tiktakamati tanauatilmej tein Jehová kinauatij Moisés maj kinmatilti israelitas. Xiyolchikauak uan amo ximoui.
14 Semi nitekitik para niksentilis tein tikuis para tikchijchiuas ichan Jehová. Niksentilij 3,400* toneladas de oro uan 34 mil toneladas de plata,* no niksentilij tel miak cobre uan tepos tein nion ueli se kitamachiua uan niksentilij kouit uan tet, sayoj ke monekis tiksentilis okachi.
15 Uan no tikinpia miakej tekitinij: akin kitajtapanaj tet, kalchiuanij, koujxijximanij uan oksekin akin kichiuaj okseki taman tekit akin tel kuali tekitij.
16 Tikpia tel miak oro, plata, cobre uan tepos. Peua xitekiti uan maj Jehová mitspaleui”.
17 Uan David kinnauatij nochin uejueyi chiuanimej israelitas maj kipaleuikan iokichpil Salomón. David kiniluij:
18 “NamoDios Jehová namechpaleuijtok uan kichiujtok kualtsin xinemikan. Yejua nechpaleuij maj nikintani akin nemiaj itech nejin altepet uan axkan nejin altepet iaxka Jehová uan ininaxka israelitas.
19 Yejua ika, xikixtalikan nankiueyichiuaskej sayoj* namoDios Jehová uan xitekitikan. Xikchijchiuakan ichan toTajtsin Jehová para kiualkuiskej tatiochiualkaxon* tein iaxka Jehová, tapalkamej uan okseki taman tein mokui para tikueyichiuaskej toTajtsin Dios. Nochi nejin kitaliskej itech kali tein nankichijchiuaskej kampa moueyitalis itokay Jehová”.
Tajtolmelaualismej
^ Tokayit tein itech hebreo kijtosneki ‘teyolseuia’.
^ Oso “tres mil cuatrocientas”.
^ Itech hebreo, “100 mil talentos de oro uan se millón de talentos de plata”. Xikonita B14.
^ Xikonita tatiochiualkaxon.
