1 Crónicas 23:1-32
23 Keman David tatajtsinya katka uan yaya momikilitiya, kiixtalij Salomón akin katka iokichpil para maj tekiuajti itech xolal Israel.
2 Satepan kinsentilij nochin taixyekananij israelitas, tiopixkamej uan levitas.
3 Kinpoujkej levitas akin kipiayaj 30 xiujmej uan akin kipiayaj okachi. Katkaj 38 mil takamej.
4 De nejin takamej, 24 mil kiixyekanayaj tataman tekit tein mochiuaya ichan Jehová uan chikuasen mil katkaj uejueyi chiuanimej uan jueces.
5 Uan no, naui mil tajpiayaj puertajtenoj uan naui mil kitatsotsoniliayaj Jehová para kiueyichiuaskej. David kinmakaka tein ika tatsotsonaskej uan kijtojka: “Nikinchijchiuak para ika titaueyichiuaskej”.
6 David kinxejxeloj nochin levitas para tekitiskej uan sejse grupo kitokaytij kemej motokaytiayaj ikoneuan Leví: Guersón, Cohat uan Merarí.
7 Ikoneuan Guersón akin katkaj levitas monotsayaj Ladán uan Simeí.
8 Ichankauan Ladán katkaj eyin. Se monotsaya Jehiel uan yejua kinixyekanaya ichankauan. Okseki omen monotsayaj Zetam uan Joel.
9 Ikoneuan Simeí katkaj eyin. Yejuan monotsayaj Selomot, Haziel uan Harán. Nochin nejin takamej kinixyekanayaj uejueyi familias tein pouiaj iuan Ladán.
10 Uan ikoneuan Simeí katkaj Jáhat, Ziná, Jeús uan Berías. Nejin naui takamej katkaj ikoneuan Simeí.
11 Jáhat kinixyekanaya ichankauan uan Zizá kipaleuiaya. Sayoj ke Jeús uan Berías amo kinpiakej miakej ininkoneuan, yejua ika kinpoujkej kemej sayoj se ueyi familia uan kichiuayaj sayoj se tekit.
12 Ikoneuan Cohat katkaj nauin. Yejuan monotsayaj Amram, Izhar, Hebrón uan Uziel.
13 Ikoneuan Amram monotsayaj Aarón uan Moisés. Sayoj ke Aarón uan ikoneuan kinxelojkej para tekitiskej nochipaya itech cuarto tein monotsa Santísimo. Yejuan kinxelojkej para kichichinouiliskej Jehová tapialmej, para kitekitiliskej uan para nochipaya kikuiskej itokay keman kitataujtiskiaj maj kintatiochiui israelitas.
14 Ikoneuan Moisés itekitikauj toTajtsin Dios kinpoujkej iniuan ikoneuan Leví.
15 Ikoneuan Moisés monotsayaj Guersom uan Eliezer.
16 De ikoneuan Guersom, Sebuel kinixyekanaya nochin ichankauan.
17 Iokichpil Eliezer katka Rehabías uan yejua kinixyekanaya ichankauan. Eliezer amo kinpiakok okseki ikoneuan, sayoj ke Rehabías kinpiak miakej ikoneuan.
18 De ichankauan Izhar, Selomit kinixyekanaya nochin ichankauan.
19 Semej ichankauan Hebrón monotsaya Jerías uan yejua kinixyekanaya nochin ichankauan. Oksekin akin kipaleuiayaj Jerías monotsayaj Amarías, Jahaziel uan Jecameam.
20 Miqueas pouia iniuan ichankauan Uziel uan yejua kinixyekanaya nochin ichankauan. Isías kipaleuiaya Miqueas.
21 Ikoneuan Merarí monotsayaj Mahlí uan Musí. Ikoneuan Mahlí monotsayaj Eleazar uan Quis.
22 Eleazar amo kinpiak okichpipil, ta sayoj kinpiak siuapipil. Yejua ika iparientes* Quis monamiktijkej iniuan isiuapipiluan Eleazar.
23 Ikoneuan Musí katkaj eyin. Yejuan monotsayaj Mahlí, Éder uan Jeremot.
24 Nochin nejin takamej katkaj ikoneuan Leví. Yejuan kinijkuilojkej por familias uan kiitstiajkej akoni kiixyekanaya ininueyi familia. Sejse takat kipoujkej uan kijkuilojkej itokay. Akin kinijkuilojkej kipiayaj 20 xiujmej uan okachi uan tekitiaj ichan Jehová.
25 David kijtojka: “Jehová ininDios israelitas kichiuak maj kualtsin nemikan akin pouij itech ixolal, uan yejua nochipaya nemis Jerusalén.
26 Uan levitas amo kiuikatinemiskejok ikaltsin Dios* nion tein ompa kikuij para kitekitiliskej”.
27 Kinpoujkej levitas akin kipiayaj 20 xiujmej uan akin kipiayaj okachi, ijkon kemej David tanauatijka.
28 Yejuan kinixtalijkaj para maj kinpaleuikan ikoneuan Aarón. Tekitiaj itech patios tein kipiaya ichan Jehová uan kampa takuayaj. No kichipauayaj nochi tein ompa onkaya tein xeliujtoya para Dios uan kichiuayaj okseki taman tein monekia mochiuas ichan toTajtsin Dios.
29 Yejuan kichijchiuayaj pantsitsin tein kimaktiliayaj Dios uan kichijchiuayaj harina yektakuechol para kimaktiliskej Dios. No kichijchiuayaj taxkaltsitsin kajkanauak tein amo kitaliliayaj levadura, kichijchiuayaj pantsitsin tein kiyokxitiayaj itech komal, kimanelouayaj harina ika aceite uan kitamachiuayaj nochi tein kikuiaj para tachijchiuaskej.
30 Mojmostaj kualkan uan tiotak monekia kitasojkamatiliskej Jehová uan kiueyitaliskej.
31 Nejon levitas no tapaleuiayaj keman kichichinouiliayaj Jehová tapialmej itech tonal sábado, keman iluitiaj porin peuaya selik metsti uan keman kichiuayaj okseki iluimej ijkon kemej ijkuiliujtoya itech tanauatil. Nochipa kichiuayaj nejon para kiueyichiuaskej Jehová.
32 No kichiuayaj tekit tein kinmakakaj itech kaltsin kampa yayaj kiueyichiuatij Dios uan kiyekpiayaj nejon kaltsin. Nejin levitas kinpaleuiayaj ikoneuan Aarón akin katkaj ininparientes para tekitiskej ichan Jehová.
