1 Crónicas 26:1-32
26 Ijkon kinxejxelojkej akin tajpiayaj puertajtenoj: den coreítas yetoya Meselemías akin katka iokichpil Coré. Coré katka ichankauj Asaf.
2 Meselemías kinpiak chikome iokichpipiluan. Akin tayekanaya monotsaya Zacarías uan iikniuan akin kitojtokayaj* monotsayaj Jediael, Zebadías, Jatniel,
3 Elam, Jehohanán uan Elieho-Enái.
4 Uan Obed-Edom kinpiak chikueyi iokichpipiluan. Akin tayekanaya monotsaya Semaya uan iikniuan akin kitojtokayaj monotsayaj Jehozabad, Joá, Sacar, Netanel,
5 Amiel, Isacar uan Peuletái. Dios ijkon kitatiochiuij Obed-Edom.
6 Uan Semaya ikoneuj Obed-Edom kinpiak iokichpipiluan uan yejuan kinixyekanayaj ininuejueyi familias. Yejuan katkaj semi chikaujkej uan kuali tekitiaj.
7 Iokichpipiluan Semaya monotsayaj Otní, Refael, Obed uan Elzabad. Uan iparientes Elzabad monotsayaj Elihú uan Semakías. Yejuan no kuali tekitiaj.
8 Nochin yejuan katkaj ikoneuan Obed-Edom. Yejuan, ininkoneuan uan ininparientes katkaj takamej takuaujtamachmej uan kuali tekitiaj. Sennochinya, katkaj 62 de ichankauan Obed-Edom.
9 Uan iuan Meselemías yetoyaj ikoneuan uan iparientes, katkaj 18 takamej akin kuali tekitiaj.
10 Semej iokichpipiluan Merarí monotsaya Hosá. Hosá kinpiak ikoneuan. Semej ikoneuan monotsaya Simrí uan yejua kinixyekanaya ichankauan. Maski amo yejua tayekanaya, itat kiixtalij maj kinixyekana ichankauan.
11 Okse iokichpil Hosá monotsaya Hilquías uan iikniuan akin kitojtokayaj monotsayaj Tebalías uan Zacarías. Ikoneuan Hosá uan iparientes katkaj 13.
12 Akin kinixyekanayaj akin tajpiayaj puertajtenoj no kipiayaj tekit ichan Jehová ijkon kemej ininparientes.
13 Uan kitatamotkej tetsitsin* para kiixtaliskej itech katiyejua puerta tajpiaskia sejse ueyi familia. Kitatamotkej tetsitsin para nochin uejueyi familias maski miakej katkaj oso amo.
14 Selemías kiixtalijkej maj tajpia itech puerta tein yetoya kampa ualkisa tonaltsin. Satepan kitatamotkej tetsitsin para kiitaskej itech katiyejua puerta tajpiaskia Zacarías ikoneuj Selemías, uan nesik ke tajpiaskia itech puerta tein yetoya ajkokopa. Zacarías kimatia keniuj kuali tayolmajxitis.
15 Uan nesik ke Obed-Edom tajpiaskia itech puerta tein yetoya tanikopa,* uan ikoneuan tajpiaskiaj itech kalmej kampa kitaliayaj takual uan okseki taman tein patiyoj.
16 Supim uan Hosá kinixtalijkej maj tajpiakan itech puerta tein yetoya kampa pankalaki tonaltsin. Nejin puerta yetoya tanakastan den puerta tein motokaytiaya Saléket. Ompaka panouaya ojti tein pankisaya hasta tepetsin. Sejse grupo de tajpianij ijkatoyaj tanakastan de okse grupo.
17 Chikuasen levitas tajpiayaj itech puerta tein yetoya kampa ualkisa tonaltsin. Mojmostaj nauin tajpiayaj itech puerta tein yetoya ajkokopa uan mojmostaj nauin tajpiayaj itech puerta tein yetoya tanikopa. Uan kampa kitaliayaj takual uan okseki taman tein patiyoj tajpiayaj ojomen.
18 Kinkaujkej ome levitas para tajpiaskej itech kali tein kipiaya kalikximej tein yetoya kampa pankalaki tonaltsin. Uan naui levitas kinkaujkej maj tajpiakan itech ueyi ojti.
19 Ijkon kinxejxelojkej ikoneuan Coré uan ikoneuan Merarí akin tajpiayaj puertajtenoj.
20 Den levitas, Ahíya tajpiaya itech cuartos tein yetoyaj ichan toTajtsin Dios kampa kitaliayaj nochi tein patiyoj. Uan no tajpiaya itech cuartos kampa kitaliayaj nochi tein kimaktiliayaj Dios.
21 De ikoneuan Ladán yetoya Jehielí akin katka semej takamej akin kinixyekanaya uejueyi familias tein pouiaj iuan Ladán. Ladán pouia iniuan ichankauan Guersón.
22 No tajpiayaj ikoneuan Jehielí akin monotsayaj Zetam uan Joel. Yejuan tajpiayaj itech cuartos tein yetoyaj ichan toTajtsin Jehová kampa kitaliayaj nochi tein patiyoj.
23 No tajpiayaj amramitas, izharitas, hebronitas uan uzielitas.
24 Sebuel kinixyekanaya akin tajpiayaj itech kalmej kampa kitaliayaj takual uan okseki taman tein patiyoj. Itat Sebuel katka Guersom uan itat Guersom katka Moisés.
25 De iparientes Sebuel no tajpiayaj Rehabías, Jesayá, Joram, Zicrí uan Selomot. Yejuan katkaj ichankauan Eliezer.
26 Selomot uan iparientes tajpiayaj itech cuartos kampa kitaliayaj nochi tein kimaktiliayaj Dios. Tekiuaj David, akin kinixyekanayaj uejueyi familias, akin kinixyekanayaj mijmil soldados uan ciejcien soldados uan nochin akin kinixyekanayaj soldados kimaktilijkaj Dios nochi tein kitalijtoyaj ompa.
27 Seki taman tein kinkuilijkaj akin kinteuitoj kimaktilijkaj Jehová para ika kiyekchijchiuaskej ichan.
28 Uan no kiyekpiayaj nochi tein tanauatijkej* Samuel kimaktilijka Dios. No kiyekpiayaj tein kitemaktijka Saúl ikoneuj Quis, Abner ikoneuj Ner uan Joab ikoneuj Zeruyá. Selomit* uan iparientes kiyekpiayaj nochi tein aksa* kimaktiliaya Dios.
29 Den izharitas katkaj Kenanías uan ikoneuan. Yejuan amo kinmakakej tekimej ichan Dios, ta kinixtalijkej maj tekitikan kemej taixyekananij uan jueces itech xolal Israel.
30 Den hebronitas katkaj Hasabías uan iparientes. Katkaj 1,700* takamej akin kuali tekitiaj uan kiixyekanayaj tekit tein mochiuaya tanakastan den ueyiat Jordán kampa pankalaki tonaltsin. Yejuan kitekitiliayaj Jehová uan kitekitiliayaj tekiuaj.
31 Den hebronitas katka Jeriya. Yejua kinixyekanaya uejueyi familias den hebronitas. Keman David 40 xiujmejya tekiuajtitoya, seki itekitikauan kintemojkej seki takamej hebronitas akin chikaujkej uan kuali tekitiaj. Nejon takamej kinajsikej ompa Jazer tein poui Galaad.
32 Uan iparientes Jeriya katkaj 2,700* takamej akin kuali tekitiaj. Tekiuaj David kinixtalij maj kinixyekanakan ikoneuan Rubén, ikoneuan Gad uan seki* ikoneuan Manasés keman kitekitiliayaj toTajtsin Dios uan keman kitekitiliayaj tekiuaj.
Tajtolmelaualismej
^ Oso “kitoktiliayaj”.
^ Xikonita tetsitsin tein kitatamotayaj.
^ Oso “ataujkopa”, “tauakalkopa”.
^ Xikonita tanauatijkej.
^ No monotsa Selomot itech versículos 25 uan 26.
^ Oso “akin”, “akaj”.
^ Oso “mil setecientos”.
^ Oso “dos mil setecientos”.
^ Itech hebreo, “tajko”.
