1 Crónicas 28:1-21
28 David kinsentilij ompa Jerusalén nochin taixyekananij israelitas. Mosentilijkej takamej akin kinixyekanayaj uejueyi kalyetonij uan akin kinixyekanayaj soldados akin xejxeliujtoyaj itech grupos uan kitekitiliayaj tekiuaj. No mosentilijkej akin kinixyekanayaj mijmil soldados uan ciejcien soldados, uejueyi chiuanimej akin tekitiaj ichan tekiuaj uan nochin takamej akin katkaj chikaujkej uan kuali tekitiaj. No mosentilijkej akin kinyekpiayaj tapialmej uan okseki taman tein iaxka tekiuaj uan ikoneuan.
2 Uan tekiuaj David moketsak uan kijtoj:
“Xinechkakikan nokniuan akin nanpouij itech nejin xolal. Nejua niknekia nikchijchiuas se kali kampa yetos tatiochiualkaxon* tein iaxka Jehová uan kampa mometstajtalis toDios. Uan niksentilij nochi tein mokuiskia para nejon kali.
3 Sayoj ke toTajtsin Dios nechiluij: ‘Tejua amo tinechchijchiuilis se kali kampa kiueyitaliskej notokay porin miakkan titateuito uan miakej tikinmiktij’.
4 Sayoj ke toDios Jehová* nechijitak nejua de nochin ikoneuan nopaj para maj nochipa nitekiuajti itech xolal Israel. Dios kinijitak ikoneuan Judá para maj taixyekanakan uan de ikoneuan Judá kinijitak ichankauan nopaj, uan de ikoneuan nopaj nejua nechijitak maj nitekiuajti itech xolal Israel.
5 Uan Jehová kichiuak maj nikinpiani miakej nokoneuan, uan de nochin nokoneuan kijitak nookichpil Salomón para maj motali itech iueyi silla Jehová uan maj tekiuajti itech xolal Israel.
6 ”Yejua nechiluij: ‘Mokoneuj Salomón nechchijchiuilis nochan uan patios tein kipias nochan, porin nikijitak maj mochiua nokoneuj uan nejua nimochiuas niitat.
7 Nikchiuas maj nochipa yejua tekiuajti komo kisentoka kitakamati tein nitanauatia uan tein nikixtalia, ijkon kemej kichiujtokya’.
8 Yejua ika, ininixpan nochin israelitas akin kitekitiliaj Jehová uan iixpan toDios akin techkaktok namechiluia: ximochikauakan kuali nankiixmatiskej nochi itanauatiluan namoDios Jehová. Uan no ximochikauakan nankitakamatiskej nochi tein tanauatia. Komo ijkon nankichiuaj, nankisentokaskej nanemiskej itech nejin tal tein semi kualtsin uan uelis nankinkauiliskej namokoneuan para maj nochipaya nikan nemikan.
9 ”Uan tejua nokonetsin Salomón, xikixmati Dios akin nikueyichiua uan sayoj yejua xiktekitili* uan xikchiua ika miak pakilis, porin Jehová kiita tein tikpiaj toyolijtik, kiita keyej tikchiuaj teisa uan tein tiknemiliaj. Dios mitskauas xikajsi komo tiktemoua, sayoj ke senkis mitsixtopeuas komo tikaua.
10 Jehová mitsijitak tejua para tikchijchiuilis se kali kampa kiueyichiuaskej. Xiyolchikauak uan peua xitekiti”.
11 Satepan David kimakak iokichpil Salomón amat kampa nesia keniuj chijchiujtoskia cuarto tein yetoskia kampa se kalakteua ichan Dios uan keniuj chijchiujtoskiaj okseki cuartos.* Seki nejon cuartos yetoskiaj taijtik uan kalkuako.* Itech okseki cuartos kitaliskiaj takual uan okseki taman tein patiyoj. Uan no yetoskia okse cuarto* kampa Dios kintapojpoluiskia inintajtakoluan.
12 Kimakak amat kampa nesia keniuj chijchiujtoskiaj patios tein kipiaskia ichan Jehová uan keniuj chijchiujtoskiaj cuartos kampa takuaskiaj. No ompa nesia keniuj chijchiujtoskiaj cuartos tein kipiaskia ichan toTajtsin Dios. Itech nejon cuartos kitaliskiaj nochi tein patiyoj uan nochi tein kimaktiliskiaj Dios.* Dios ika ichikaualis kimatiltij David keniuj chijchiujtoskia in kali.
13 David no kiluij Salomón keniuj xejxeliujtoskiaj tiopixkamej uan levitas. No kiluij katiyejua tekit kichiuaskiaj ichan Jehová uan keniuj kikuiskiaj tapalkamej uan okseki taman tein mokuiskia ichan Jehová.
14 No kiluij kanachi oro uan kanachi plata kikuiskia para kichijchiuas tapalkamej uan okseki taman tein mokuiskia ichan Dios para kiueyichiuaskej.
15 No kiluij kanachi oro uan kanachi plata kikuiskia para kichijchiuas sejse tauilketsaloni uan sejse candil.
16 No kiluij kanachi oro kikuiskia para kichijchiuas mesas kampa kitaliskiaj pantsitsin tein kimaktiliayaj Dios uan kanachi plata kikuiskia para kichijchiuas okseki mesas.
17 Kiluij kanachi oro tein okachi kuali monekiskia kikuis para kinchijchiuas teposmej tein puntajyejkej, konmej uan uejueyi kaxit uan tein tsikitsitsin. Uan kanachi plata kikuiskia para kichijchiuas kaxit tein tsikitsitsin.
18 No kiluij kanachi oro tein okachi kuali monekiskia kikuis para kichijchiuas altar kampa tapopochuiskiaj uan tein kiixnextiskia icarro Dios. Nejin carro yejuan querubines tein chijchiujtoskiaj ika oro. Querubines ajtapaltajtapotoskiaj uan kiyekauilijtoskiaj tatiochiualkaxon tein iaxka Jehová.
19 David kijtoj: “Jehová nechpaleuij maj nikajsikamati keniuj chijchiujtos kali uan nechyekanak para maj nikijkuilo nochi tein nechmatiltij”.
20 Uan David kiluij Salomón akin katka iokichpil: “Xiyolchikauak, amo ximoui uan peua xitekiti. Amo ximojkakalaki porin toDios Jehová, noDios, mitspaleuijtok. Jehová amo keman mitskauas, ta mitspaleuijtos hasta xiktamichijchiua ichan.
21 Ixyetokya keniuj xejxeliujtoskej tiopixkamej uan levitas para tekitiskej ichan toTajtsin Dios. No mitspaleuiskej takamej akin kinekij tekitiskej uan kimatij keniuj kichiuaskej tein yeski tekit. Uan no mitspaleuiskej uejueyi chiuanimej uan nochin israelitas akin kichiuaskej nochi tein tikinnauatis”.
Tajtolmelaualismej
^ Xikonita tatiochiualkaxon.
^ Oso “Jehová ininDios israelitas”.
^ Oso “xiktekitili ika nochi moyolo”.
^ Itech hebreo, “kalmej”.
^ Oso “kaltipan”, “kalpani”.
^ Oso “cuarto kampa yetoya ipantsak tatiochiualkaxon”.
^ Oso “xeliujtoskia para Dios”.
