1 Crónicas 29:1-30
29 Tekiuaj David kiniluij nochin akin mosentilijkaj: “Dios kijitak nokoneuj Salomón para maj kichijchiua ichan, sayoj ke yejua semi okichpilok uan ayamo kimati keniuj kichiuas miak taman.* Uan tekit tein kipia semi ueyi porin kali tein kichijchiuati amo para se takat, ta para toDios Jehová.
2 Nimochikauani niksentilis miak taman para maj kichijchiua ichan noDios. Niksentilij oro, plata, cobre, tepos, kouit, tetsitsin tein moixmatij kemej ónice, tetsitsin tein ika kikualtsintiliaj tepamit, tetsitsin de tataman colores, tetsitsin tein patiyoj uan miak tetsitsin tein moixmatij kemej alabastro. Nochi nejin mokuis para tein yeski taman tein monekis mochijchiuas.
3 Uan maski niksentilijya nochi nejin para nankichijchiuaskej kali tein iaxka Dios, no niktemaka oro uan plata tein noaxka para nankichijchiuaskej ichan noDios porin semi nikpatiuita ichan noDios.
4 Niktemaka 103 toneladas* de oro tein kiualkuikej de Ofir uan 239 toneladas* de plata tein okachi kuali. Nochi nejin nankikuiskej para nankitamitaliliskej tepamit de nochi in cuartos.*
5 No nankikuiskej para nankichijchiuaskej nochi tein monekis mochijchiuas de oro uan de plata. Nejin oro uan plata no kikuiskej tamachijchiuanij. Uan axkan ¿akoni kiuelitaskia teisa kitayokolis Jehová?”.
6 Uan takamej akin kinixyekanayaj uejueyi familias uan akin kinixyekanayaj uejueyi kalyetonij kijtojkej ke teisa kitayokoliskiaj Dios. No kijtojkej nejon akin kinixyekanayaj mijmil soldados uan ciejcien soldados uan akin tekitiaj iuan tekiuaj.
7 Yejuan kitemakakej 171 toneladas* de oro, 10 mil dáricos,* 342 toneladas* de plata, 616 toneladas* de cobre uan 3,420 toneladas* de tepos. Kitemakakej nochi nejin para kichijchiuaskej ichan toTajtsin Dios.
8 Akin kipiayaj tetsitsin tein patiyoj kitemakakej para kitaliskej itech cuartos kampa yetoskia nochi tein patiyoj tein iaxka Jehová. Ompa tajpiaya Jehiel akin katka ichankauj Guersón.
9 Nochin israelitas semi yolpakiaj porin kitayokolijkaj Dios miak taman. Yolpakiaj porin yekmelauj kinekiaj kichiuaskej tein Jehová kiuelita uan amo akin kinchikaujkauijka maj ijkon kichiuanij. Uan tekiuaj David no semi yolpakia.
10 Uan David kiueyitalij Jehová ininixpan nochin akin mosentilijkaj. David kijtoj: “Maj nochipaya mitsueyitalikan noDios Jehová, akin tiiDios topaj Israel.
11 Tejua Jehová semi tiueyichiujkej, semi tichikauak, semi kualtsin nochi tein mitsyoualoua uan mitsnamiki maj mitstakachiuakan* uan maj mitsueyitalikan, porin moaxka nochi tein onkak ne iluikak uan nikan taltikpak. Tejua Jehová titekiuaj uan tejua tikixyekana nochi.
12 Tejua tikchiua maj aksa* ueyichiujkej uan tikmaka miak taman tein patiyoj. Tejua tikixyekana nochi uan semi tichikauak. Uan tejua ueli tikinueyitalia nochin uan tikinyolchikaua.
13 Yejua ika toDios, timitstasojkamatiliaj uan tikueyitaliaj motokaytsin tein semi kualtsin.
14 ”Sayoj ke ¿toni nichiujkej uan toni chiuanimej israelitas para maj ueli timitstayokolikan nochi nejin? Nochi tejua titechmaka uan tein timitsmakakej tejua titechmakak.
15 Tejua tikmati ke okseko tiualeujkej uan ke nikan timokaltalikoj ijkon kemej touejkaujtatuan. Kemej se yekauil tein panotikisa tejuan amo tikchiaj tiuejkauaskej nikan taltikpak.
16 ToDios Jehová, tejua titechmakak nochi nejin tein tiksentilijkej para timitschijchiuiliskej se kali kampa kiueyitaliskej motokaytsin. Nochi nejin tejua moaxka.
17 NoDios, nejua kuali nikmati ke tejua tikita tein se kipia se iyolijtik uan mitsyolpaktia maj se yolkuali.* Nejua niktelnekia nimitstayokolis nochi nejin, uan semi nechyolpaktia nikitas ke akin pouij itech moxolal akin nikan yetokej mitstayokoliaj miak taman.
18 Jehová, ininDios touejkaujtatuan Abrahán, Isaac uan Israel, xikinpaleui israelitas maj nochipa kinekikan mitstayokoliskej teisa uan maj nochipa sayoj tejua mitstekitilikan.
19 Uan xikpaleui nokoneuj Salomón para maj kineki mitstekitilis ika nochi iyolo, para maj kitakamati nochi tein titanauatia uan tein titamachtia. No xikpaleui para maj kineki kichiuas nochi nejin uan para maj kichijchiua mochan ika nochi tein niksentilij”.
20 Uan David kiniluij nochin akin mosentilijkaj: “Xikueyitalikan namoDios Jehová”. Uan nochin israelitas akin mosentilijkaj kiueyitalijkej Jehová ininDios ininuejkaujtatuan. Yejuan motankuaketskej uan moixpilojkej hasta talpan para kiueyichiuaskej Jehová uan para kitakachiuaskej tekiuaj.
21 Yejuan kisentokakej kimaktilijkej Jehová miak taman uan kichichinouilijkej tapialmej hasta mostika. Kimaktilijkej Jehová mil kuakuejmej tein moskaltijtoyajok, mil ichkaueuetkej,* mil ichkamej uan kipantekkej vino itech altar. Kimaktilijkej Dios miak tapialmej para kitajtaniskej maj kinpaleui israelitas.
22 Nejon tonal yejuan semi yolpakiaj, takuajkej uan tatayikej uan Jehová kiitstoya tein kichiujtoyaj. Yejuan oksepa kiixtalijkej Salomón iokichpil David akin Jehová kijitak para maj kinixyekana israelitas, uan no kiixtalijkej Sadoc kemej tiopixkat.
23 Uan Salomón kiixpatak itat David, motalij itech iueyi silla Jehová uan peuak tekiuajti. Tel kuali taixyekanaya uan nochin israelitas kitakamatiaj.
24 Nochin taixyekananij, soldados akin kuali tateuiayaj uan nochin ikoneuan tekiuaj David peuak kitekitiliaj tekiuaj Salomón.
25 Uan Jehová kichiuak maj nochin israelitas kitakachiuanij Salomón uan okachi kiueyitalij ke tekiuanij israelitas akin achto taixyekankej.
26 David iokichpil Jesé tekiuajtik itech xolal Israel.
27 Tekiuajtik 40 xiujmej itech xolal Israel. Ompa Hebrón tekiuajtik chikome xiuit uan ompa Jerusalén tekiuajtik 33 xiujmej.
28 Uan David semi yolpakia porin nemik miak xiujmej, kipiak miak taman uan miakej kitakachiuayaj. Satepan momikilij uan Salomón akin katka iokichpil peuak tekiuajti.
29 Nochi tein kichiuak tekiuaj David desde keman peuak tekiuajti hasta keman momikilij, ijkuiliujtok itech ininamatajkuiloluan tanauatijkej* Samuel, tanauatijkej Natán uan Gad akin Dios kiitaltiaya tein kinekia kitematiltis.
30 Ompa no ijkuiliujtok nochi tein panok keman tekiuajtik uan nochi tein uelik kichiuak. No ijkuiliujtok tein kipanok keman nemia, tein panok itech xolal Israel uan tein panok itech okseki altepemej.
Tajtolmelaualismej
^ Oso “uan amo chikauak”.
^ Itech hebreo, “eyi mil talentos”. Xikonita B14.
^ Itech hebreo, “chikome mil talentos”.
^ Itech hebreo, “kalmej”.
^ Itech hebreo, “makuil mil talentos”.
^ Dárico katka se tomin de oro tein kikuiaj ompa Persia. Xikonita B14.
^ Itech hebreo, “10 mil talentos”.
^ Itech hebreo, “18 mil talentos”.
^ Oso “tres mil cuatrocientas veinte toneladas”. Itech hebreo, “100 mil talentos”.
^ Oso “mitspoujkaitakan”.
^ Oso “akin”, “akaj”.
^ Oso “yolmelauak”.
^ Oso “borregos”.
^ Xikonita tanauatijkej.
