1 Crónicas 5:1-26
5 Iokichpil Israel akin tayekanaya katka Rubén. Yejuan nejin katkaj ikoneuan Rubén. Rubén tayekanaya sayoj ke tein kinamikia kimakaskej porin tayekanaya, kinmakakej ikoneuan José porin Rubén motekak* iuan semej isiuauan* itat. Itat José katka Israel. Kemej Rubén kichiuak nejon, yejua ika amo nesi ke yejua akin tayekanaya kampa ijkuiliujtok akonimej katkaj ichankauan Israel.
2 Judá katka okachi ueyichiujkej ke iikniuan uan de ikoneuan kisaskia akin satepan taixyekanaskia. Maski ijkon, José kimakakej tein kinamikia kimakaskej akin tayekana.
3 Iokichpil Israel akin tayekanaya monotsaya Rubén. Yejuan nejin katkaj ikoneuan Rubén: Hanok, Palú, Hezrón uan Carmí.
4 Yejuan nejin katkaj ikoneuan Joel: iokichpil Joel katka Semaya, iokichpil Semaya katka Gog, iokichpil Gog katka Simeí,
5 iokichpil Simeí katka Miqueas, iokichpil Miqueas katka Reayá, iokichpil Reayá katka Baal,
6 iokichpil Baal katka Beerá. Beerá katka semej akin kinixyekanaya ikoneuan Rubén uan Tilgat-Pilnéser akin tekiuajtia Asiria kikixtij de kampa nemia uan kiuikak okseko.
7 Kampa ijkuiliujtok akonimej katkaj ichankauan Beerá nesij kemej iparientes nejin takamej: Jeiel akin taixyekanaya, Zacarías
8 uan Bela. Itat Bela katka Azaz, itat Azaz katka Sema, itat Sema katka Joel. Ichankauan Bela nemiaj desde Aroer hasta Nebo uan Bet-Baal-Meón.
9 Kemej inintapialuan semi momiakilijkaj ompa Galaad, sentakuikej hasta kampa peua taluakyan uan hasta ueyiat Éufrates. Nochi nejin talmej yetoyaj kampa ualkisa tonaltsin.
10 Keman Saúl tekiuajtitoya, ikoneuan Rubén moteuijkej iniuan hagritas uan kintankej. Yejua ika ikoneuan Rubén peuak nemij itech kaltsitsin* tein katka ininaxka hagritas uan chanchiujkej ompa Galaad. Nejin tal yetoya kampa ualkisa tonaltsin.
11 Ikoneuan Gad nemiaj tanakastan de kampa nemiaj ikoneuan Rubén itech talmej tein yetoyaj Basán uan hasta Salecá.
12 Joel katka akin taixyekanaya uan Safam no kipaleuiaya para taixyekanas. Uan oksekin akin no kipaleuiayaj para taixyekanaskej katkaj Janái uan Safat. Yejuan kichiuayaj nejin tekit ompa Basán.
13 Uan nejin chikome takamej katkaj ininparientes uan pouiaj iniuan tataman uejueyi familias. Nejin chikome takamej monotsayaj Miguel, Mesulam, Seba, Jorái, Jacán, Zía uan Éber.
14 Nochin yejuan katkaj ikoneuan Abihail. Itat Abihail katka Hurí, itat Hurí katka Jaróah, itat Jaróah katka Galaad, itat Galaad katka Miguel, itat Miguel katka Jesisái, itat Jesisái katka Jahdó uan itat Jahdó katka Buz.
15 Akin kinixyekanaya ininuejueyi familias katka Ahí. Itat Ahí katka Abdiel, itat Abdiel katka Guní.
16 Yejuan nemiaj Galaad, Basán uan xolaltsitsin tein ompa yetoyaj. Uan sekin no nemiaj Sarón itech talmej kampa onkaya miak sakat, sentakuikej hasta kampa tamiaj nochi nejon talmej.
17 Nochin nejon familias kinijkuilojkej keman Jotán tekiuajtia ompa Judá uan keman Jeroboán tekiuajtia itech xolal Israel.
18 Ikoneuan Rubén, ikoneuan Gad uan seki* ikoneuan Manasés kinpiayaj 44,760* soldados akin kuali tateuiayaj. Yejuan kipiayaj ininescudos, ininmachete tein ojkan tenej* uan ininarcos* uan kimatiaj keniuj tateuiskej.
19 Yejuan moteuijkej iniuan hagritas. No moteuijkej iniuan ininchankauan Jetur, Nafís uan Nodab.
20 Keman iniuan moteuijtoyaj, kiluijkej Dios maj kinpaleui uan yejua kinpaleuij porin iuan takuaujtamatkej. Yejua ika kintankej hagritas uan nochin akin kinixnamikiaj.
21 Mokuilijkej inintapialuan: 50 mil camellos, 250 mil ichkamej* uan ome mil burros. No kinkixtijkej 100 mil takamej uan siuamej de kampa nemiaj.
22 Ijkuak, toTajtsin Dios kinpaleuij keman tateuijkej yejua ika miakej kinmiktijkej. Ikoneuan Rubén, ikoneuan Gad uan seki* ikoneuan Manasés nenkej itech nejon talmej tein moaxkatilijkej hasta keman kinkixtijkej de ompa uan kinuikakej okseko.
23 Uan ininchankauan seki ikoneuan Manasés nenkej itech talmej tein yetoyaj Basán hasta Baal-Hermón. No nemiaj Senir uan tepet Hermón. Yejuan semi miakej katkaj.
24 Nejin takamej kinixyekanayaj ininuejueyi familias: Éfer, Isí, Eliel, Azriel, Jeremías, Hodavías uan Jahdiel. Yejuan katkaj soldados akin kuali tateuiayaj uan semi kinixmatiaj. Nochin yejuan kinixyekanayaj ininfamilias.
25 Nochin akin pouiaj iniuan nejon uejueyi kalyetonij amo kitakamatkej Dios akin kiueyichiuayaj ininuejkaujtatuan. Uan peuak kinueyichiuaj tatadiosmej* tein kinueyichiuayaj akin nemiaj itech nejon talmej. Dios kinixpoloj akin ompa nemiaj para maj israelitas ompa chanchiuanij.
26 Pul akin tekiuajtia Asiria, kinkixtij ikoneuan Rubén, ikoneuan Gad uan seki* ikoneuan Manasés de kampa nemiaj uan kinuikak okseko. (Tekiuaj Pul no moixmatia kemej Tilgat-Pilnéser). Yejua kinkixtij porin ininDios israelitas kitanemililtij maj ijkon kichiua uan kinuikak Halá, Habor, Hará uan ueyiat Gozán uan ompa nemijok hasta axkan.
Tajtolmelaualismej
^ Itech hebreo, “kipitsotilij itat itapech”.
^ Xikonita tajtol okse siuatsin.
^ Nejin kaltsitsin chijchiujtoyaj ika tasal.
^ Itech hebreo, “tajko”.
^ Oso “cuarenta y cuatro mil setecientos sesenta”.
^ Oso “ininespada”.
^ Oso “tein ika kitamotaj flechas”.
^ Oso “borregos”.
^ Oso “tajko”.
^ Oso “tiotsitsin”.
^ Itech hebreo, “tajko”.
