1 Corintios 3:1-23
3 Yejua ika, nokniuan, amo uelik namechnojnotsak kemej akin moyekanaj ika ichikaualis Dios, ta kemej akin moyekanaj ika tein kinejneki ininnakayo, kemej pipilkonemej akin amo kiyekajsikamatij keniuj kitojtokaskej Cristo.
2 Kemej ayamo semi nanchikaujkej nankatkaj namechmakak leche porin ayamo uelia nantakuayaj. Tein melauj, axkan amo no semi nanchikaujkej,
3 porin nankisentokaj namoyekanaj ika tein kinejneki namonakayo. Kemej namonenexikoluiaj uan namoteuiaj, ¿amo kinextia nejon ke namoyekanaj ika tein kinejneki namonakayo? Nankichiujtinemij tein oksekin kichiuaj.
4 Keman se kijtoua “Nejua niktojtoka Pablo”, sayoj ke okse kijtoua “Nejua niktojtoka Apolos”, ¿amo kinextia nejon ke nankichiujtinemij tein oksekin kichiuaj?
5 ¿Toni chiujkej Apolos? ¿Toni chiujkej Pablo? Yejuan sayoj takeualmej akin kichiuaj tekit tein toTekotsin kinmakak. Sayoj tapaleuijkej maj namejuan xitaneltokakan, ijkon kemej toTekotsin kinpaleuij sejse.
6 Nejua nitatokak, Apolos kiatekij tein niktokak, sayoj ke Dios kisentokak kichiuak maj moskalti.
7 Yejua ika akin tatoka amo teyi chiujkej nion akin kiatekia tatok, ta Dios, akin kichiua maj moskalti.
8 Akin tatoka uan akin kiatekia tatok sentekitij,* sayoj ke sejse Dios kitatiochiuis ijkon kemej tekitis.
9 Porin tiitekitikaikniuan* Dios. Namejuan kemej yeskia italpan Dios kampa yejua tatoktok, kemej yeskia se kali tein Dios kichijchiujtok.
10 Dios nechmakak itatiochiualis tein amo technamiki, yejua ika niktalij tatsineualoni kemej se akin kimati kuali kalchijchiuas,* sayoj ke okse itech tachijchiujtok. Maj sejse kiyekita keniuj kiketsa kali.
11 Porin amo akin ueli kitalia okse tatsineualoni porin yetokya Jesucristo.
12 Aksa* uelis kichijchiuas se kali itech tatsineualoni uan kikuis oro, plata uan tetsitsin tein patiyojkej, oso kouit uan miak taman xiuit.
13 Keman ejkos tonal moitas toni ika chijchiujtok tein kichiuak sejse. Ika tit* monextis ox tein sejse kichijchiuak kuali chijchiujtok oso amo.
14 Komo taxikoua tein aksa kichijchiuak itech tatsineualoni, kitatiochiuiskej.
15 Komo tata* tein kichijchiuak aksa, kipolos tein kichijchiujkaya, sayoj ke yejua momakixtis; sayoj ke kipanos kemej akin momakixtia kampa tachichinaujtok.
16 ¿Amo nankimatij ke namejuan kemej yeskia itemplo Dios uan ke ichikaualis yetok namotech?
17 Komo aksa kiixpoloua itemplo Dios, Dios kiixpolos yejua, porin itemplo Dios yejua moxelouilij, uan namejuan nankiixnextiaj nejon templo.
18 Maj amo akin mokajkayaua: komo semej kinemilia ke tamatkej ininixpan oksekin, maj mochiua kemej akin amo teyi kimati para maj mochiua tamatkej.
19 Porin Dios kiita ke inintamatilis akin nemij nikan taltikpak amo tapaleuia, porin ijkuiliujtok: “Dios kichiua maj tamatinij uetsikan itech ininamo kuali tanemilil”.
20 No ijkuiliujtok: “Jehová* kimati ke tein kinemiliaj tamatinij amo tapaleuia”.
21 Yejua ika, maj amo akin moueyimati* ika tein kichiuaj oksekin, porin nochi namoaxka:
22 yeski Pablo, Apolos, Cefas,* tein onkak nikan taltikpak, tonemilis, mikilis, tein axkan mochiujtok uan tein mochiuas satepan. Nochi namoaxka.
23 Uan namejuan naniaxkauan Cristo, uan Cristo iaxka Dios.
Tajtolmelaualismej
^ Oso “sayoj se”, “kipiaj sayoj se tanemilil”.
^ Oso “tisentekitij iuan”.
^ Oso “kiixyekanas kalchijchiualis”.
^ Oso “Akin”, “Akaj”.
^ Oso “tekol”.
^ Oso “chichinaui”.
^ Oso “moueyineki”.
^ No monotsa Pedro.
