1 Corintios 6:1-20
6 Keman nankipiaj se kuejmol iuan okse, ¿keyej namoteteluilitij iniuan akin amo kitakamatij itanauatiluan Dios? ¿Keyej amo nanyouij iniuan akin Dios moinxelouilij?*
2 ¿Amo nankimatij ke akin Dios moinxelouilij* kiixtaliskej tein kinnamiki kiseliskej akin nemij nikan taltikpak? Uan komo namejuan nankichiuaskej nejon, ¿keyej amo ueli nankiixejekouaj tein amo semi moneki?
3 ¿Amo nankimatij ke tikixtaliskej tein kinnamiki kiseliskej ángeles? Komo ijkon, ¿keyej amo ueli nankiyektaliaj kuejmolmej tein axkan onkak?
4 Yejua ika, komo moneki nankiyektaliskej kuejmolmej tein axkan onkak, ¿keyej nankinitatij maj namechpaleuikan akin tokniuan amo kintakachiuaj?*
5 Namechiluia nejin para ximopinaujmatikan. ¿Xe amo moajsi namouan nion se tamatkej akin uelis kiixejekos keniuj momelauas kuejmolmej tein nankipiaskej?
6 Sayoj ke amo nankichiuaj nejon, ta se tokniuj kiteluiliti okse tokniuj ininixpan jueces akin amo taneltokaj.
7 Namoselti namopinaujtiaj keman namoteteluilijtokej ininixpan jueces. Okachi kuali maj namechchiuilikan tein amo kuali oso maj namechkuilikan tein namoaxka.
8 Sayoj ke namejuan nankinchiuiliaj tein amo kuali oksekin uan nantachtekij, ¡uan nejin nankinchiuiliaj namokniuan!
9 ¿Xe amo nankimatij ke akin amo yolkualmej amo kalakiskej itech iTaixyekanalis Dios? Amo ximokajkayauakan.* Akin auilnemij,* akin kinueyichiuaj tatadiosmej,* akin kikajkayauaj ininnamik, takamej akin mokauaj maj inintakaikniuan iniuan motekakan, takamej akin kitemouaj auilnemiskej* iniuan inintakaikniuan,
10 tachtekinij, akin semi kiixnejnekij tein teaxka,* tauananij, akin teuijuikaltiaj* uan akin takajkayauaj para tachtekiskej amo kalakiskej itech iTaixyekanalis Dios.
11 Uan nansekimej nankichiuayaj nejon. Sayoj ke Dios namechchipauak, namechxeloj uan namechita ke nanyolmelaujkej itokaykopa toTekotsin Jesucristo uan ika ichikaualis Dios.
12 Nochi ueli nikchiua, sayoj ke amo nochi tapaleuia. Nochi ueli nikchiua, sayoj ke amo nikauas maj nion teyi nechxijxiko.
13 Takual chijchiujtok para topox uan topox chijchiujtok para takual, sayoj ke Dios kitamis nochin omen. Uan tonakayo amo chijchiujtok para se auilnemis,* ta para se kitekitilis toTekotsin, uan toTekotsin kiyekpia tonakayo.
14 Sayoj ke Dios ika ichikaualis kichiuak maj toTekotsin oksepa nemi* uan no kichiuas maj oksepa tinemikan tejuan.
15 ¿Amo nankimatij ke namonakayo poui iuan inakayo Cristo uan mochiua sayoj se? ¿Nankinemiliaj ke nikuiti tepitsin inakayo Cristo uan niksentilis iuan se siuaauilnenkej? ¡Amo!
16 ¿Amo nankimatij ke akin mosentilia* iuan se siuaauilnenkej mochiua sayoj se iuan? Porin yejua kijtoua: “Nejon omen mochiuaskej sayoj se”.
17 Sayoj ke akin mosentilia iuan toTekotsin, kipia sayoj se tanemilil iuan.
18 ¡Amo xiauilnemikan!* Okseki tajtakolmej amo kipitsotilia se inakayo, sayoj ke akin auilnemi kipitsotilia inakayo.
19 ¿Amo nankimatij ke namonakayo kemej yeskia se templo kampa yetok ichikaualis Dios tein namechmakak? Uan no, namonakayo amo namoaxka,
20 porin Dios namechkouak. Yejua ika, xikuikan namonakayo para nankiueyitaliskej Dios.
Tajtolmelaualismej
^ Oso “chipaujkej iixpan Dios”.
^ Oso “chipaujkej iixpan Dios”.
^ Oso “amo kinpoujkaitaj”.
^ Oso “Maj amo namechkajkayauakan”.
^ Xikonita auilnemilis.
^ Oso “tiotsitsin”.
^ Oso “akin motekaj”.
^ Oso “xijxikuimej”.
^ Oso “tetejtelchiuaj”.
^ Tajtol griego, pornéia. Xikonita auilnemilis.
^ Itech griego, “kiajokuik toTekotsin”.
^ Oso “moteka”.
^ Itech griego, “¡Xikcholuikan (xikcholouilikan) auilnemilis!”. Tajtol griego, pornéia. Xikonita auilnemilis.
