1 Pedro 5:1-14
5 Nejua no nitayekankej, nikitak tein kijyouij Cristo uan no namouan nikselis ueyi tatiochiualis tein monextis. Yejua ika, nikintataujtia tayekananij akin namouan yetokej:
2 kemej tayekananij uan ichkatajpianij, xikinyekpiakan iichkauan* Dios tein namechinkauilijtokej; xikchiuakan nejon tekit, amo sayoj porin ipa moneki nankichiuaskej, ta xikchiuakan ika pakilis iixpan Dios; amo no porin nankiixnejnekij tomin,* ta porin nankinekij nantapaleuiskej,
3 amo no ximochiuakan kemej yeskia naninintekouan akin iaxkauan Dios, ta xikchiuakan tein kuali uan ijkon yejuan no kichiuaskej kemej namejuan.
4 Uan keman monextis okachi ueyi ichkatajpixkej, namejuan nankiseliskej se ueyi taxtauil kemej yeskia se corona tein amo kuetaui.
5 No ijkon, namejuan telpochmej, ximokauakan maj namechixyekanakan tayekananij.* Nanochin xiyolyemankej* iniuan oksekin, porin Dios kinixtopeua akin moueyimatij,* sayoj ke kinmaka itatiochiualis tein amo technamiki akin yolyemankej.
6 Yejua ika, ximokauakan maj namechixyekana Dios akin chikauak,* para maj yejua namechueyitali keman ajsis tonal.
7 Uan no, xikauilikan nochi tein namechtekipachoua porin yejua kiyolmachilia tein namechpanotok.
8 ¡Xiksentokakan kuali xitalnamiktokan uan xitachixtokan! In Amokuali akin namechtauelita, namechyoualojtinemi kemej se tekuani tein nanalkatinemi uan kitemojtinemi akoni kikuas.
9 Sayoj ke xikixnamikikan, semi xitakuaujtamatikan uan xikmatikan ke nochin tokniuan no kipanotokej tein namejuan nankijyouijtokej.
10 Satepan ke nantajyouiskej seki tonalmej, Dios akin itech ualeua nochi tatiochiualis tein amo technamiki, akin namechnotsak para xipouikan iuan Cristo uan para namechueyitalis nochipaya, yejua namechtamimachtis. Yejua kichiuas amo ximotsinkixtikan, namechchikauas, namechpaleuis amo xiuetsikan.
11 Yejua kipia chikaualis nochipaya. Maj ijkon mochiua.*
12 Silvano,* akin nikita kemej se tokniuj takuaujtamach, nechpaleuij maj nikijkuilo seki tajtolmej para namechyolchikauas uan namechyekmatiltis ke nejin yejua yekmelauj itatiochiualis Dios tein amo technamiki. Amo xikauakan nejin tatiochiualis.
13 Siuatsin akin yetok Babilonia, akin Dios kijitak* ijkon kemej namejuan, namechtajpaloua, uan no, nokonetsin Marcos.
14 Ximotajpalokan se iuan okse ika se beso* uan ijkon xiknextikan ke namotasojtaj.
Xiyolseujkanemikan nochin namejuan akin nanpouij iuan Cristo.
Tajtolmelaualismej
^ Oso “iborregos”.
^ Oso “nanxijxikuimej”.
^ Oso “akin kipiaj okachi xiujmej ke namejuan”.
^ Oso “ximotalilikan (ximotajkoilpilikan) yolyemanilis kemej tasal”.
^ Oso “moueyinekij”.
^ Itech griego, “imay Dios tein chikauak”.
^ Oso “Amén”.
^ No monotsa Silas.
^ Oso “kiixpejpenak”.
^ Oso “uan ximopitsokan”, “uan ximotenamikikan”.
