1 Samuel 11:1-15
11 Nahás akin kinixyekanaya ammonitas yajki iniuan isoldados kinteuitoj akin nemiaj Jabés ompa Galaad. Nochin takamej akin nemiaj Jabés kiluijkej Nahás: “Ximoyektenkaua ke amo titechmiktis uan timitstekitiliskej”.
2 Tekiuaj Nahás kiniluij: “Nikchiuas tein nankijtouaj komo nanechkauaj maj nanochin namechkixtili namoixtololo tein yetok namoyekmakopa. Ijkon nikinpinaujtis nochin israelitas”.
3 Akin taixyekanayaj Jabés kiluijkej: “Xitechchia chikome tonal. Tikintitanitij seki takamej maj kiniluitij nochin israelitas tein techpanotok, xa aksa* kinekis techpaleuikiuj. Uan komo amo akin techpaleuiki, timokauaskej xitechchiuili tein tikijtoua”.
4 Takamej akin kintitankej ajsikej Guibeá kampa nemia Saúl uan kitematiltijkej tein kinpanotoya akin nemiaj Jabés. Keman kikakkej nejon, nochin peuak semi chokaj.
5 Saúl kinuikaka ixtauat ikuakuejuan uan mokepayaya. Yejua kintajtanij* sekin akin ompa yetoyaj: “¿Toni panok? ¿Keyej nochin chokatokej?”. Yejuan kiluijkej tein kinmatiltijkaj takamej akin ualajkaj de Jabés.
6 Keman Saúl kikakik nejon, Dios kimakak ichikaualis uan tel kualanik.
7 Kinkuik ome kuakuejmej, kintejtekik uan kititanik sejse cacho itech nochi xolalmej kampa nemiaj israelitas. Kiniluij takamej maj kiuikakan uan maj kiniluijtiakan israelitas: “¡Ijkon kinchiuiliskej ikuakuejuan akin amo kinekis kipaleuis Saúl uan Samuel!”. Nejon kichiuak maj israelitas kimojkatokanij Jehová, uan nochin kitojtokakej* Saúl para iuan yaskej tateuitiuij.
8 Saúl kinpouak akin mosentilijkaj ompa Bézec. Mosentilijkaj 30 mil takamej akin pouiaj iniuan ichankauan Judá, uan 300 mil israelitas den okseki uejueyi kalyetonij.
9 Saúl uan isoldados kiniluijkej takamej akin ualeujkaj de Jabés: “Xikiniluikan takamej akin nemij Jabés tein yetok Galaad: ‘Mosta tamechmakixtitiuij kemej tajkotonal’”.* Nejon takamej kiniluitoj akin nemiaj Jabés tein Saúl kijtojka, uan keman yejuan kikakkej semi yolpakkej.
10 Akin nemiaj Jabés kiniluijkej ammonitas: “Mosta uelis nantechchiuiliskej tein namejuan nankinekiskej porin amo titateuiskej”.
11 Mostika, Saúl exkan kinxejxeloj isoldados. Achto ke tanesiskia,* yajkej kampa ammonitas kitalijkaj ininkaltsitsin* uan peuak kinmijmiktiaj hasta tajkotonal. Seki ammonitas momoyaujkej* uan cholojkej ininsejselti.
12 Uan seki israelitas kiluijkej Samuel: “¿Kani yetokej akin amo kinekiaj maj Saúl techixyekana? Maj kinualkuikan para tikinmiktiskej”.
13 Sayoj ke Saúl kiniluij: “Amo akin tikmiktiskej, porin Jehová techpaleuij maj tikintanikan akin techtauelitayaj”.
14 Satepan Samuel kiniluij israelitas: “Maj tiakan Guilgal para oksepa tikixtaliskej Saúl kemej totekiuaj”.
15 Yejua ika nochin israelitas yajkej Guilgal. Ompa kiixtalijkej Saúl kemej tekiuaj keman Jehová kinitstoya. Satepan kichichinouilijkej Jehová tapialmej para sentakuaskej.* Nejon tonal, Saúl uan nochin israelitas iluichiujkej uan semi yolpakkej.
Tajtolmelaualismej
^ Oso “akin”, “akaj”.
^ Oso “kintajtoltij”.
^ Oso “kitoktilijkej”.
^ Itech hebreo, “keman chikauak tonatos”.
^ Nejin hora peuaya kemej ome hora kualkan hasta chikuasen hora kualkan.
^ Nejin kaltsitsin chijchiujtoyaj ika tasal (tilmaj).
^ Oso “moxinijkej”.
