1 Samuel 2:1-36
2 Ana kitataujtij Dios uan kiluij:
“Niyolpaki porin Jehová nechpaleuia.Jehová nechpaleuia maj nimochikaua.*
Axkan amo nikmouilia nikinnankilis akin nechtauelitaj.Niyolpaki porin tinechmakixtiani.
2 Sayoj tejua tiyektik Jehová.Amo onkak okse Dios kemej tejua.ToDios, sayoj tejua tichikauak kemej se tet.
3 Amo ximoueyimatikan.*Amo ximoueyitalikan ika tein nankijtouaj,porin Jehová se Dios akin nochi kimati.Kiita nochi tein tikchiuaj uan kijtoua ox kuali yetok oso amo.
4 Takamej akin chikaujkej kinpojpostekilia ininarcos.*Sayoj ke kinchikaua akin amo chikaujkej.*
5 Akin kitelpiayaj tein kikuaskej, axkan moneki tekitiskej para kipiaskej tein kikuaskej,
sayoj ke akin amo kipiayaj tein kikuaskej, axkan kipiajya.Siuatsin akin amo uelia kinpiaya konemej axkan kinpia chikome ikoneuan,
sayoj ke siuatsin akin kinpiaya miakej ikoneuan, axkan mokauak iselti.*
6 Jehová ueli kiixpoloua aksa* uan ueli kichiua maj nemi.Yejua ueli kichiua maj aksa moseuiti Miketekoch* uan ueli kichiua maj oksepa nemi.
7 Jehová kichiua maj amo se kipia nion teyi uan kichiua maj se kipia miak taman.
Kipinaujtia akin moueyimati* uan kiueyitalia akin amo moueyimati.
8 Kiajokui akin amo moueyitaliauan kipaleuia pobre para maj amo tajyouijtook.*Kichiua maj yejuan motalikan iniuan ueyichiuanimejuan kinmaka se tekit tein kinueyitalia.
Jehová kichijchiuak kampa tsineujtok taltikpakuan ompa kitalij tal.
9 Yejua kinyekpia akin kitakamatij.Sayoj ke akin amo yolkualmej kinixpoloua uan kintalia kampa tayouayan,porin se takat amo ueli iselti kintani akin kiixnamikij.
10 Jehová kintamiixpolos akin kiixnamikij.*Kinextis ke iniuan kualantok keman tatikuinis ne iluikak.
Jehová kiixtalis tein kinnamiki kiseliskej nochin akin nemij nikan taltikpak.Kimakas tanauatil akin kiixtalij maj taixyekana.Kichikauas* akin kijitak”.*
11 Elcaná mokepak ichan ompa Ramá. Sayoj ke iokichpiltsin mokauak iuan Elí para kitekitilis Jehová.
12 Ikoneuan Elí semi amo yolkualmej katkaj. Yejuan nion tepitsin kimojkatokayaj Jehová.
13 Maski ixyetoyaya tein okseki israelitas monekia kinmakaskej tiopixkamej, yejuan amo kichiuayaj tein Dios kiixtalijka. Keman se israelita kimaktiliaya Dios se tapial, akin kipaleuiaya tiopixkat yaya kampa kiyokxitijtoyaj nakat uan kiuikaya se ueyi tepos tein exkan tenpitstik.*
14 Nejon tepos kipankalakiaya itech tein yeski olla kampa kiyokxitijtoyaj nakat. Uan nochi tein kikixtiaya kiuikiliaya tiopixkat. Ijkon kinchiuiliayaj nochin israelitas akin yayaj Siló.
15 Uan no, akin kipaleuiaya tiopixkat amo kichiaya maj chichinaui imantecayo tapial uan maj popoka, ta yaya kiitati israelita akin kitemakaya tapial uan kiluiaya: “Tiopixkat kineki nakat para kiteuatsas. Amo kineki nakat tein yoksikya, ta xikmaka nakat tein xoxouik”.
16 Israelita kiluiaya: “Maj achto kichichinokan imantecayo tapial para maj popoka. Satepan uelis tikuis tein tiknekis”. Sayoj ke akin kipaleuiaya tiopixkat kiluiaya: “Amo nimochias, ta xinechmakaya. Komo amo tinechmaka, nimitskuilis”.
17 Jehová kiitaya ke akin kinpaleuiayaj tiopixkamej semi tajtakolchiujtoyaj. Maski Jehová kiixtalijka keniuj monekia kimaktiliskej tapialmej, yejuan amo kitakamatiaj.
18 Samuel tekitia ichan Jehová maski piliok katka. Yejua motaliliaya se koton tein kiluiaj efod* tein chijchiujtoya ika lino.
19 Inan xijxiujtika kichijchiuiliaya se tasal* tein ueyak uan makojkotoltik. Uan kiuikiliaya nejon tasal keman xijxiujtika yaya Siló iuan itakatsin para kimaktiliskej Dios se tapial.
20 Uan Elí kitajtanij Dios maj kintatiochiui Elcaná uan isiuatsin. Uan kiluij Elcaná: “Kemej mosiuatsin Ana kimaktilij Jehová namokonetsin, maj Jehová namechmaka okse namokonetsin”. Satepan mokepkej ininchan.
21 Jehová kiiknelij Ana uan kichiuak maj oksepa mokokoxkatali. Kinpiakok eyi okichpipil uan ome siuapipil. Uan okichpiltsin Samuel moskaltijtiajki uan kisentokak kitekitilij Jehová.
22 Maski Elí tatajtsinya katka, kimattoya nochi tein ikoneuan kinchiuiliayaj israelitas. Uan no kimatia ke motekayaj iniuan siuamej akin tapaleuiayaj kaltenoj den kaltsin kampa yayaj kiueyichiuatij Dios.*
23 Elí kiniluiaya ikoneuan: “¿Keyej ijkon nankichiuaj nokoneuan? Nochin israelitas nechtapouikij ke nankichiuaj tein amo kuali.
24 Amo ijkon xikchiuakan nokoneuan. Amo kualtsin tein itekitikauan Jehová nechtapouikij.
25 Komo se takat kichiuilia tein amo kuali okse takat, xa aksa kitataujtis Jehová maj kipaleui. Sayoj ke komo se takat kichiua tein Jehová amo kiyolpaktia, amo akin uelis kitataujtis Dios maj kipaleui”. Sayoj ke yejuan amo kinekkej kikakiskej inintat porin Jehová kiixtalijkaya kinmiktis.
26 Uan okichpiltsin Samuel kisentokaya moskaltiaya, uan Jehová uan nochin israelitas kiteltasojtayaj.
27 Uan Dios kititanik se takat maj kiluiti Elí: “Jehová kijtoua nejin: ‘Keman mouejkaujtat uan ichankauan yetoyaj Egipto uan faraón kinteltekitiltiaya, nikchiuak miak taman para maj nechixmatikan.
28 De nochin uejueyi kalyetonij, nikixtalij mouejkaujtat maj nechtekitili kemej tiopixkat. Yejua nikixtalij maj kinchichino tapialmej itech noaltar uan maj tapopochui.* No nikixtalij maj motalili koton keman nechtekitilis. Uan nikauak maj ichankauan kikuikan tepitsin nakat tein israelitas kiualkuij para nechchichinouiliskej.
29 Nejua nitanauatij maj israelitas ualakan nochan uan maj nechmaktilikij tapialmej uan okseki taman. ¿Keyej nankiauilmatij* tein nitanauatij uan nankichiuaj tein nankinekij? ¿Keyej okachi tikintakachiua* mokoneuan? ¿Keyej namejuan nankikuaj nakat tein okachi kuali tein nechmaktilikij notekitikauan?
30 ”’Yejua ika nikneki nimitsiluis nejin: “Nejua Jehová ininDios israelitas nikijtojka ke mochankauan nochipa nechtekitiliskiaj,* uan ke ichankauan mouejkaujtat no nechtekitiliskiaj nochipa”. Sayoj ke axkan, nejua Jehová nikijtoua: “Amo nikauasok xinechtekitilikan. Nikinueyitalis akin nechueyitaliaj, sayoj ke akin nechixtopeuaj no nikinixtopeuas”.
31 Yejua ika, ejkos tonal keman nimitskuilis tanauatil* tein tikpia uan tanauatil tein kipiaj mochankauan. Nion se takat akin mochankauj tatajtsintias, porin achto mikis.
32 Nejua nikintatiochiuis israelitas, sayoj ke kampa nechueyichiuaj* nochipa moajsis aksa akin mitsixnamikis. Uan nion se takat akin mochankauj tatajtsintias, porin achto mikis.
33 Nikauas maj se takat akin mochankauj kisentoka nechtekitili itech noaltar. Sayoj ke nejon takat kichiuas amo xitachiaok uan semi mitstajyouiltis. Uan miakej mochankauan kinmiktiskej ika machete tein ojkan tenej.*
34 Uan para tikmatis ke yekmelauj tein nikijtojtok nikchiuati nejin: mokoneuan Hofní uan Finehás senmikiskej.
35 Uan nikixtalis se tiopixkat akin nochipa nechtakamatis. Yejua kichiuas tein nejua nikneki. Uan nikchiuas maj ikoneuan no nechtekitilikan kemej tiopixkamej miak xiujmej. Yejua nochipa kitekitilis* taixyekankej akin nikixtalij.
36 Uan mochankauan akin amo mikiskej, motankuaketsaskej iixpan para kitajtaniskej maj kinmaka tekit. Ijkon uelis motaniliskej tomin uan mokouiliskej pantsin. Kiluiskej: “Nimitstataujtia xinechmaka tekit kemej tiopixkat para uelis nikpias tein nikuas”ʼ”.
Tajtolmelaualismej
^ Oso “Amo ximoueyinekikan”.
^ Oso “tein ika kitamotaj flechas”.
^ Oso “akin mometskuatelojtiuij”.
^ Itech hebreo, “kuetauik”.
^ Oso “akin”, “akaj”.
^ Oso “Seol”, kampa moseuijtokej mikemej. Xikonita miketekoch.
^ Oso “moueyineki”.
^ Oso xa “uan kikixtia pobre den tajsolijtik”.
^ Oso “kiixpejpenak”.
^ Oso xa “Akin kiixnamikij Jehová motelmoujtiskej”.
^ Oso “yekapitstik”. Nejin tepos katka se ueyi tenedor.
^ Oso “tilmaj”.
^ Xikonita ikaltsin Dios.
^ Oso xa “para kichiuas maj pankisa pokti den tapialmej tein kichichinouaj”.
^ Itech hebreo, “nankiteliksaj”.
^ Oso “tikinpoujkaita”.
^ Itech hebreo, “nentinemiskiaj noixpan”.
^ Oso “chikaualis”.
^ Itech hebreo, “nochan”.
^ Oso “espada”.
^ Itech hebreo, “nentinemis iixpan”.
