1 Samuel 30:1-31
30 Uiptika, David uan takamej akin kipaleuiayaj ajsikej Ziclag. Keman ajsitoj, kimatkej ke amalequitas kinteuijkaj akin nemiaj Négueb uan Ziclag. Uan kitikuiltijkaj Ziclag.
2 Amo kimiktijkej nion akin, ta nochin kinuikakej. Kinuikakej nochin siuamej uan nochin akin yetoyaj itech xolal, desde konemej hasta akin xiuejkejya.
3 Keman David uan takamej akin kipaleuiayaj ajsikej, kiitakej ke kitikuiltijkaj ueyi xolal Ziclag. No kiitakej ke kinuikakaj ininsiuauan, ininokichpipiluan uan ininsiuapipiluan.
4 Uan David uan takamej akin kipaleuiayaj peuak tel chokaj. Semi chokakej hasta sioujkej.
5 Isiuauan David no kinuikakaj. Se monotsaya Ahinoam akin kayot Jezreel uan okse monotsaya Abigaíl akin katka isiuatsin Nabal akin kayot Carmelo. Sayoj ke Nabal momikilijkaya.
6 David semi motekipachojtoya porin takamej akin kipaleuiayaj kinemilijtoyaj kitetemaskej.* Yejuan kinekiaj kitetemaskej porin amalequitas kinuikakaj ininokichpipiluan uan ininsiuapipiluan uan semi kualantoyaj. Sayoj ke David kitemoj iDios Jehová para maj kiyolchikaua.*
7 David kiluij tiopixkat Abiatar ikoneuj Ahimélec: “Xikualkui efod”.* Abiatar kiuikilij.
8 Uan David kitajtanij* Jehová: “¿Maj nimotalo para nikintokatias amalequitas akin tachtekikoj Ziclag? ¿Nikinajsitiuj?”. Yejua kinankilij: “Kemaj, ximotalo uan xikintokatiuj, porin tikinajsitiuj uan tikinkuilis nochi tein kichtekkej”.
9 David uan 600 takamej akin iuan yayaj niman kisteujkej. Ajsitoj atauit* Besor uan seki takamej ompa mokaujkej.
10 David kisentokak kintokatiajki amalequitas iniuan 400 takamej. Sayoj ke 200 takamej mokaujkej ompa atauit Besor porin semi sioujtoyaj uan amo uelikok kipanauijkej atauit.*
11 Takamej kiajsitoj ixtauat se takat akin kayot Egipto uan kiuikakej kampa yetoya David. Yejuan kitamakakej uan kimakakej at.
12 No kimakakej ome taxkaltsitsin tein chijchiujtoyaj ika pasas uan se cacho taxkaltsin tein chijchiujtoya ika higo tein uakik. Keman takuaj, moyolkuik* porin amo teyi kikuajtoya uan amo teyi tayitoya eyi tonal.
13 David kitajtanij: “¿Kani tikayot? ¿Akoni moteko?”. Takat kinankilij: “Nikayot Egipto uan niitakeual se amalequita. Noteko nechkaujteuak porin yauipta nikokolispeuak.*
14 Tejuan tikinteuitoj keretitas akin nemij tanikopa* uan ichankauan Caleb akin nemij tanikopa. No tikinteuitoj akin nemij Judá uan tiktikuiltijkej Ziclag”.
15 David kiluij: “¿Uelis tinechuikas kampa yetokej akin techtachtekitoj?”. Takat kinankilij: “Nimitsuikas komo timotenkaua itokaykopa Dios ke amo tinechmiktis nion tikauas maj noteko nechchiuili teisa”.
16 Nejon takat kiuikak David kampa yetoyaj tachtekinij. Kinajsitoj uejuetstokej ixtauat, takuajtoyaj uan tatayitoyaj. Yejuan iluititoyaj porin tel miak taman kinichtekilijkaj filisteos uan akin nemiaj Judá.
17 Uan David peuak kinteuia desde kualkan hasta youak. Amo akin uelik choloj. Sayoj momakixtijkej 400 takamej porin cholojteujkej itech camellos.
18 David kinmakixtij isiuauan uan kinkuilij amalequitas nochi tein kiichtekkaj.
19 Ompa yetoyaj nochin akin amalequitas kinuikakaj, desde konemej hasta akin xiuejkejya. Ompa yetoyaj ininokichpipiluan uan ininsiuapipiluan uan nochi tein kinkuilijkaj. David kinkuilij nochi tein kinichtekilijkaj.
20 Uan no, David mokuilij ininichkauan* uan ininkuakuejuan amalequitas. Uan takamej akin kipaleuiayaj kinsentilijkej iniuan inintapialuan. Takamej kijtouayaj: “Nochi nejin mokuilij David”.
21 David yajki kampa yetoyaj 200 takamej akin mokaujkaj atauit* Besor porin tel sioujtoyaj. Yejuan kinamikitoj David uan takamej akin iuan yajkaj. Keman David kinajsito kintajtanij ox kuali yetoyaj.
22 Sayoj ke iuan David yajkaj seki takamej akin amo yolkualmej katkaj uan nexikolmej. Yejuan kijtojkej: “Amo tikinmakaskej tein tikinkuilijkej amalequitas porin amo touan yajkaj. Sayoj tikinmakaskej ininsiuauan uan ininkoneuan. Maj kinkuikan uan maj yakan”.
23 Uan David kiniluij: “Amo ijkon xikchiuakan nokniuantsitsin, porin Jehová techmakak nochi tein tikpiaj. Yejua techyekpiak uan techpaleuij maj tikintanikan akin techtachtekijkaj.
24 ¿Xe nankinemiliaj ke aksa* kinekis kichiuas tein nankijtojtokej? Amo, ta nochin tikinxejxelouiliskej tein tikinkuilijkej akin techtachtekijkaj. Tikinmakaskej akin yajkaj tateuitoj uan no tikinmakaskej akin mokaujkej para tajpiaskej. Amo akin tikmakaskej okachi”.
25 Ijkuak, David kiixtalij maj nochipa ijkon mochiua. Uan nochin israelitas peuak kitakamatij nejon tanauatil. Uan ijkon kisentokaj kichiuaj hasta axkan.
26 Keman David mokepak Ziclag, kikuik seki taman tein kinkuilijka amalequitas uan kintitanilij akin taixyekanayaj Judá porin kuali mouikaya iniuan. Kiniluij: “Namechtayokolia nejin* tein tikinkuilijkej akin kiixnamikij Jehová”.
27 David kintitanilij akin taixyekanayaj Betel, akin taixyekanayaj Ramot ompa Négueb uan akin yetoyaj Jatir.
28 No kintitanilij akin taixyekanayaj Aroer, Sifmot, Estemoa
29 uan akin taixyekanayaj Racal. No kintitanilij akin taixyekanayaj itech uejueyi xolalmej kampa nemiaj jerahmeelitas uan kampa nemiaj quenitas.
30 No kintitanilij akin taixyekanayaj Hormá, Borasán, Atac,
31 akin taixyekanayaj Hebrón uan nochin akin taixyekanayaj itech xolalmej kampa yajtinenkej David uan takamej akin kipaleuiayaj.
Tajtolmelaualismej
^ Oso “kitepoxoniskej”, “kimojmotaskej ika tet”.
^ Oso “David moyolchikauak porin takuaujtamatia iuan Jehová iDios”.
^ Oso “kitajtoltij”.
^ Oso “ojpanat”.
^ Oso “ojpanat”.
^ Oso “mochikauak”, “moyoltalij”.
^ Oso “nikokoxkakuik”.
^ Oso “ataujkopa”, “tauakalkopa”.
^ Oso “ininborregos”.
^ Oso “ojpanat”.
^ Oso “akin”, “akaj”.
^ Itech hebreo, “Nejin se tatiochiualis”.
