2 Pedro 3:1-18
3 Nokniuantsitsin, ika nejin ojpaya namechtajkuilouilia, uan ijkon kemej itech yekinika amatajkuilol, namechelnamiktia seki taman tein namechpaleuis kuali xitanemilikan,
2 para xikelnamikikan tein achto kijtojkej tanauatianij.* Uan no xikelnamikikan tanauatil tein kitemakak toTekotsin uan Totemakixtijkauj inintechkopa namotatitaniluan.
3 Okachi moneki nankimatiskej ke itech tonalmej keman tatamitiya* nesiskej akin takejkeloskej uan kichiuaskej tein amo kuali tein kinejnekiskej,
4 uan kijtoskej: “Yejua motenkauak ke mokepaskia,* ¿kani yetok axkan? Porin desde keman momikilijkej* touejkaujtatuan, nochi kisentoka kemej ijkuak Dios peuak tachijchiua”.
5 Yejuan kiixtaliaj kiixpanauiskej nejin: ke iluikak yetoyaya desde ne uejkauj uan ke Dios kijtoj maj tal uan at moxelokan uan maj tal moajsi tatajko den at,
6 tein ika Dios kinixpoloj akin nemiaj nejon tonalmej keman taapexonik.*
7 Sayoj ke, Dios no kijtoj ke iluikak uan taltikpak tein axkan yetokej, ixyetokej para ixpoliuiskej ika tit* itech tonal keman Dios kintatsakuiltis uan kinixpolos akin amo yolkualmej.
8 Sayoj ke, nokniuantsitsin, amo xikelkauakan nejin: Jehová* kiita mil xiujmej sayoj kemej se tonal uan se tonal kemej mil xiujmej.
9 Jehová* amo yolikati keman kichiua tein motenkaua, kemej sekin kinemiliaj, ta yejua namechchixtok* porin amo kineki maj nion akin ixpoliui, ta maj nochin moyolpatakan.
10 Sayoj ke, itonal Jehová* ejkos kemej se tachtekkej. Nejon tonal, iluikak ixpoliuis uan chikauak taijkoyokas, uan tein ika chijchiujtok iluikak uan taltikpak, patis porin semi kauantos,* uan taltikpak uan tein itech mochiua chichinauis.*
11 Kemej nochi ijkon patis, ¡xiknemilikan tein nankichiuaj uan tein moneki nankichiuaskej! Moneki nanchipaujkanemiskej uan nankichiuaskej tein kinextis ke nankiueyichiuaj Dios ika nochi namoyolo.
12 Uan no semi xikchiakan maj ejko itonal Jehová* uan amo xikelkauakan.* Ijkuak, iluikak ixpoliuis ika tit* uan tein ika chijchiujtok iluikak uan taltikpak patis porin semi kauantos.*
13 Sayoj ke tikchiaj se yankuik iluikak uan se yankuik taltikpak ijkon kemej Dios motenkauak, uan ompa nochipa mochiuas tein kuali yetok.
14 Yejua ika nokniuantsitsin, kemej nankichixtokej* nejin, xikchiuakan nochi tein nanueliskej para keman Dios namechtamiitas, amo namechajxilis teisa tein pitsotik, tein amo kuali uan kiitas ke kuali namouikaj iuan.
15 Uan no, xiknemilikan ke kemej toTekotsin amo yolijsiui, techpaleuia maj timomakixtikan, ijkon kemej no namechtajkuilouilij toknitsin Pablo. Yejua kijkuiloj nejin porin Dios kichiuak maj tamatkej.
16 Pablo ika tajtoj nejon itech nochi iamatajkuiloluan. Sayoj ke, seki taman tein kijkuiloj ouij se kiajsikamati, uan akin amo teyi kimatij* uan amo yektaneltokaj kikejkepaj, ijkon kemej no kichiuaj ika nochi Tajkuilolamatsin. Nejon kichiuas maj kinixpolokan.
17 Yejua ika nokniuantsitsin, kemej nankimatijya nejin, xitachixtokan para maj amo namechkajkayauakan kemej yejuan kinkajkayaujkej uan amo nanyekijkatoskejok. Yejuan kineltokakej tein amo melauak tein tamachtiaj akin amo yolkualmej.*
18 Okachi kuali, xiksentokakan okachi xikselijtiakan tatiochiualis tein amo technamiki uan okachi xikixmatikan toTekotsin uan toTemakixtijkauj Jesucristo. Yejua kinamiki maj kiueyitalikan axkan uan nochipaya. Maj ijkon mochiua.*
Tajtolmelaualismej
^ Xikonita tanauatijkej.
^ Oso “itamian tonalmej”.
^ Tajtol griego, parousía. Xikonita keman Cristo mokepasya.
^ Itech griego, “kochkej”.
^ Oso “taatemik”.
^ Oso “tekol”.
^ Oso “namechchatok”.
^ Oso “moitas”, “monextis”.
^ Oso “xotatos”.
^ Oso “semi xiknekikan”. Itech griego “xikijsiuiltikan”.
^ Oso “tekol”.
^ Oso “xotatos”.
^ Oso “nankichatokej”.
^ Oso “amo tamachtilmej”.
^ Oso “akin kitapanauiliaj tanauatil”.
^ Oso “Amén”.
