2 Samuel 1:1-27
1 Itech nejon tonalmej Saúl mikkaya. Satepan ke David kintanik amalequitas mokepak Ziclag uan ompa mokauak ome tonal.
2 Uiptika, ajsik Ziclag se takat akin ualeujka de kampa yetoyaj Saúl uan isoldados. Yejua kitsayanka itasal uan mokuatemilijka tal. Keman kiitak David, motankuaketsak uan moixpiloj hasta talpan.
3 David kitajtanij:* “¿De kani tiuitse?”. Takat kinankilij: “Niualcholojteuak de kampa yetoyaj soldados israelitas”.
4 Uan David kiluij: “Xinechilui toni panok”. Takat kiluij: “Soldados israelitas cholojkej uan miakej mikkej. Saúl uan iokichpil Jonatán no mikkej”.
5 Uan David kitajtanij takat: “¿Keniuj tikmati ke mikkej Saúl uan iokichpil Jonatán?”.
6 Takat kiluij: “Nejua nietoya itech tepet Guilboa uan nikitak ke Saúl motakitskilijtoya itech ilanza,* uan kiajsitoyajya carros tein filisteos kikuij para tateuiskej uan soldados akin yayaj itech caballos.
7 Keman Saúl moixkepak uan nechitak, nechnotsak maj nikajsiti. Nejua nikiluij: ‘Nikan nietok, ¿toni tikneki maj nikchiua?’.
8 Saúl nechtajtanij: ‘¿Tiakoni?’. Nejua niknankilij: ‘Nejua niamalequita’.
9 Yejua nechiluij: ‘Nimitstataujtia xinechmikti porin semi nitajyouijtok, sayoj ke amo ueli nimiki’.
10 Yejua ika nikmiktij. Kemej semi kikokojkaj, nikmatia ke amo taxikoskiaok. Nikuakixtilij icorona uan nikixtilij pulsera tein kipiaya iajkolko para nimitsualkuilis, tejuatsin”.
11 Keman David kikakik nejon, kitsayanak itasal uan nochin takamej akin iuan yetoyaj no kitsayankej inintasal.
12 Yejuan ajkotsajtsikej, chokakej uan amo takuajkej hasta tiotak porin momikilijka Saúl, Jonatán akin katka iokichpil Saúl uan miakej israelitas akin pouiaj itech ixolal Jehová. Nochin kinmiktijkaj ika machete tein ojkan tenej.*
13 David kitajtanij nejon takat: “¿Kani tikayot?”. Takat kinankilij: “Nejua niikoneuj se amalequita akin nemiko kampa nemij israelitas”.
14 David kiluij: “¿Keyej tikmiktij* akin Jehová kijitak?”.
15 Satepan kiluij semej isoldados: “Xiuiki uan xikmikti”. Uan soldado kimiktij.
16 Achto ke kimiktiskiaj nejon takat, David kiluij: “Tejua moselti timotatsakuiltij porin tikijtoj ke tikmiktij akin Jehová kijitak”.
17 David semi tayokoxtoya porin momikilijkaj Saúl uan Jonatán akin katka iokichpil uan peuak kincantarouilia se tatsotson.
18 Nejon tatsotson monotsa “Arco”* uan David kijtoj maj kinnextilianij nochin akin nemiaj Judá. Ijkuiliujtok itech amatajkuilol tein moixmati kemej Jasar uan kijtoua:
19 “¡Teikneltijkej akin nemij itech xolal Israel!
Takamej akin ueyichiuanimej mikkej itech tepemej tein yetokej ompa.
¡Mikkej akin semi kuali tateuiayaj!
20 Amo xikinmatiltikan akin nemij Gat,amo no xiktematiltikan itech ojmej de Asquelón,para maj amo mouelitakan siuamej filisteas,para maj amo iluichiuakan nejon siuamej akin amo kitekitiliaj Dios.
21 Maj amo kioui itech tepemej ompa Guilboa,nion maj taajuachyoua.Maj amo taki nion teyi tein uelis se kimaktilis Dios.Itech nejon tepemej uetskej ininescudos akin semi chikaujkej uan mopitsotilijkej.Iescudo Saúl amo akinok kikualtsintilia ika aceite.
22 Jonatán nochipa kuali kitamotaya flechas.*Saúl nochipa tatania ika imachete tein ojkan tenej.Semi kineskixtijkej akin kintauelitayaj uan kinkojkoyonijkej soldados.
23 Nochin semi kintasojtayaj Saúl uan Jonatán keman yoltoyaj.Saúl uan Jonatán nochipa senyetoyaj hasta keman mikkej.
Yejuan okachi ijsiuiaj ke águilasuan katkaj okachi chikaujkej ke leones.
24 Siuamej israelitas xikchokilikan Saúl.Yejua namechtasaltij ika tasal chichiltik tein petani tein kipia miak taman tein patiyoj.Uan kikualtsintilij namotasal ika miak taman tein chijchiujtok ika oro.
25 ¡Akin semi kuali tateuiayaj!
¡Jonatán mikik itech tepemej! mikkej keman tateuitoj
26 Semi nechtayokoltia tein mitspanok Jonatán, semi nimitstasojtaya noknitsin.Siuamej kinextiaj ke nechtasojtaj,
sayoj ke okachi nikpatiuita keniuj tiknextij ke tinechtasojtaya.*
27 ¡Mikkej akin semi kuali tateuiayaj,uan kinixpolojkej nochi teposmej tein ika tateuiayaj!”.
Tajtolmelaualismej
^ Oso “kitajtoltij”.
^ Nejin katka se kouit tein ueyak tein itempan kipiaya se tepos tein puntajyej.
^ Oso “espada”.
^ Oso “Keyej timoixeuij tikmiktis”.
^ Oso “tein ika kitamotaj flechas”.
^ Oso “kuali kikuia iarco”.
^ Nejin kijtosneki ke David uan Jonatán semi kualtsin mouikayaj.
