2 Samuel 10:1-19
-
Kintanij ammonitas uan sirios (1-19)
10 Satepan, tekiuaj akin kinixyekanaya ammonitas momikilij uan Hanún akin katka iokichpil peuak tekiuajti.
2 Yejua ika David kijtoj: “Nahás nochipa nechnextilij ke nechtasojtaya, yejua ika no niknextiliti Hanún iokichpil Nahás ke niktasojta”. Yejua ika David kintitanik seki itakeualuan maj kiyolchikauatij Hanún porin momikilijka itat. Itakeualuan David yajkej kampa nemiaj ammonitas.
3 Sayoj ke keman ajsikej, akin kinixyekanayaj ammonitas kiluijkej tekiuaj Hanún: “¿Tiknemilia ke David kinualtitanik itakeualuan porin yekmelauj kineki mitsyolchikauas? Yejua amo yekmelauj kineki kitakachiuas* mopaj, ta xa kinualtitanik maj tachiakij toueyi xolal para kiitaskej keniuj uelis techtaniskej”.
4 Yejua ika Hanún tanauatij maj kinkitskikan itakeualuan David uan maj tajko kintenximakan. No tanauatij maj kintekilikan inintasal hasta inintajkoyan uan kintokak.*
5 Keman kiluitoj tekiuaj David tein kinchiuilijkaj itakeualuan, niman kintitanik seki takamej maj kinnamikitij porin semi kinpinaujtijkaj. David tanauatij maj kiniluikan: “Ximokauakan Jericó uan ximokepakan hasta keman oksepa moskaltis namotentson”.
6 Kemej ammonitas kichiujkej nejon, kiitakej ke David peuak kintauelita. Yejua ika ammonitas kintitankej seki takamej maj yakan Bet-Rehob uan Zobá maj kintakeuatij sirios para maj kinpaleuikan. Kintakeujkej 20 mil soldados. No kitakeujkej akin tekiuajtia Maacá uan mil soldados. No yajkej Istob* uan ompa kintakeujkej 12 mil soldados.
7 Keman David kimatik tein kichiujkej ammonitas, kititanik Joab uan nochin isoldados para kinteuiskej. No kintitanik isoldados akin okachi kuali tateuiayaj.
8 Ammonitas kiskej de ininueyi xolal uan motejtekpankej kalampa para tateuiskej. Uan soldados sirios akin katkaj de Zobá, Rehob, Istob* uan Maacá moketsatoj hasta ixtauat.
9 Joab kiitak ke seki soldados ualayaj taikan uan oksekin ualayaj taixpan para kiteuiskej. Yejua ika kinijitak seki soldados israelitas akin okachi kuali tateuiayaj uan kiniluij maj motejtekpanakan para kinteuiskej soldados sirios.
10 Joab no kiixtalij Abisái maj kinixyekana okseki soldados uan kinnauatij maj motejtekpanakan para kinteuiskej ammonitas.
11 Uan Joab kiluij Abisái: “Komo tikita ke sirios techtantokej, xitechpaleuiki. Uan komo nikita ke ammonitas namechtantokej, tejuan tamechpaleuitiuij.
12 Moneki tiyeskij tiyolchikaujkej uan amo timouiskej para tikinpaleuiskej israelitas uan para amo techkuiliskej uejueyi xolalmej tein toDios techmakak. Uan Jehová kichiuas tein kiitas ke okachi tapaleuis”.
13 Uan Joab uan isoldados peuak kinteuiaj sirios uan sirios cholojkej.
14 Keman ammonitas kiitakej ke sirios cholojkaj, yejuan no kicholuijkej Abisái uan kalakitoj ininueyi xolal. Satepan ke Joab kinteuij ammonitas mokepak Jerusalén.
15 Keman sirios kiitakej ke israelitas kintankaj, oksepa mosentilijkej.
16 Hadadézer kinnotsak sirios akin nemiaj tanakastan den ueyiat Éufrates. Yejuan mosentilijkej ompa Helam uan Sobac kinixyekantiaya. Nochin isoldados Hadadézer kinixyekanaya Sobac.
17 Keman David kimatik ke sirios mosentilijkej, no niman kinsentilij nochin soldados israelitas. Yejuan kipanauijkej ueyiat Jordán uan ajsikej Helam. Uan sirios motejtekpankej para kiixnamikiskej David uan iuan moteuijkej.
18 Sayoj ke sirios kincholuijkej israelitas. David kinmiktij 700 soldados sirios akin kiuikayaj carros tein kikuiaj keman tateuiayaj uan 40 mil akin yayaj itech caballos. Uan no kimiktij Sobac akin kinixyekanaya isoldados Hadadézer.
19 Keman nochin tekiuanij akin kinixyekanaya Hadadézer kiitakej ke israelitas kintankaj, niman kiniluijkej israelitas ke amo kinteuiskiajok uan peuak kintekitiliaj. Uan sirios amo kinekkejok* kinpaleuiskej ammonitas.
Tajtolmelaualismej
^ Oso “kipoujkaitas”.
^ Oso “kineualtij”.
^ Oso “Tob”.
^ Oso “Tob”.
^ Oso “amo moixeuijkejok”.
