2 Samuel 11:1-27
11 Ipeujyan xiuit* keman tekiuanij youij tateuitij, David kititanik Joab, itakeualuan uan nochin soldados israelitas maj kintamiixpolotij ammonitas. Yejuan kitamiyoualojkej Rabá para kinteuiskej akin ompa nemiaj, sayoj ke David mokauak Jerusalén.
2 Se tonal keman David yetoya ichan uan tapoyaujtiayaya, meuak uan peuak nenemi kalkuako.* Desde ompa kiitak ke mopaktoya se siuat akin semi kuakualtsin katka.
3 David kititanik aksa* maj tatsintokati akoni katka nejon siuat, uan kiluijkej: “Nejon siuat monotsa Bat-Seba, iichpoch Eliam, uan itakatsin monotsa Urías. Yejua poui iniuan ichankauan Het”.
4 David kintitanik seki takamej maj kikuitij. Uan siuat yajki kampa yetoya David uan David iuan motekak. (Ijkuak, nejon siuat mochipaujtoya ijkon kemej kijtouaya Tanauatil).* Satepan, Bat-Seba mokepak ichan.
5 Bat-Seba kimatik ke kokoxkayetoya, yejua ika tanauatij maj kiluitij David: “Nikpiati se konetsin”.
6 Keman David kimatik, kititanik aksa maj kiluiti Joab: “Xikilui Urías* maj nechitaki”. Yejua ika Joab kititanik Urías maj kiitati David.
7 Keman Urías ajsik ichan David, David kitajtanij* keniuj yetoyaj Joab uan isoldados. No kitajtanij ox tatantiayaj.
8 Uan David kiluij Urías: “Xitemo mochan uan ximoseuiti”.* Keman Urías kisak de ichan David, seki takamej kitojtokateujkej* para kimakaskej tein tekiuaj kitayokoliaya.*
9 Sayoj ke Urías amo temok ichan, ta kochik itech se kali tein yetoya tanakastan de ichan tekiuaj iniuan nochin okseki takeualmej.
10 Uan kinauatitoj David: “Urías amo temok ichan”. Yejua ika David kitajtanij Urías: “Uejka tiualeuak uan yekin tiejko. ¿Keyej amo titemok mochan?”.
11 Urías kinankilij David: “¿Keniuj nejua nias nochan nitakuatiuj, niatitiuj uan nimotekatiuj iuan nosiuatsin, ta in tatiochiualkaxon* yetok itech se kaltsin?* Uan takamej de Israel uan Judá mokaujtokej itech kaltsitsin uan noteko Joab uan itakeualuan no kitalijkej ininkaltsitsin senpanian. ¡Nimitsyekiluia ke ipa amo nikchiuas nejon!”.
12 Uan David kiluij Urías: “No nikan ximokaua axkan, uan mosta tias”. Yejua ika Urías mokauak Jerusalén nejon tonal uan mostika.
13 Satepan, David kiyoleuak Urías maj iuan takuati uan maj iuan tatayiti. Urías yajki takuato uan tatayito iuan David uan kiuintij. Sayoj ke keman tapoyauik, Urías amo temok ichan, ta kochito iniuan itakeualuan tekiuaj.
14 Mostika kualkan, David kijkuilouilij Joab se amat uan kimakak Urías maj kiuikili.
15 David kijkuilouilij nejin: “Xiktalikan Urías hasta taixpan kampa okachi fiero tateuiaj uan ompa xikauakan iselti para maj kimiktikan”.
16 Joab kuali kimatia kanika yetoyaj soldados ammonitas akin kuali tateuiayaj, yejua ika ompa kititanik Urías.
17 Keman ammonitas kiskej uan kiteuitoj Joab uan isoldados, kinmiktijkej seki itakeualuan David uan no kimiktijkej Urías.*
18 Satepan, Joab kititanik se takat maj kiluiti David nochi tein panok keman moteuijkej iniuan ammonitas.
19 Joab kiluij takat: “Keman tiktamitapouis tekiuaj nochi tein panok,
20 tekiuaj xa kualanis uan mitsiluis: ‘¿Keyej namoteltokijkej ueyi xolal? ¿Xe amo nankimatiaj ke yejuan yetoskiaj tepankuako uan ke desde ompa namechtamotiliskiaj flechas?
21 ¿Xe amo nankielnamikij akoni kimiktij Abimélec iokichpil Jerubéset?* Se siuatsin akin yetoya tepankuako ompa Tebez kipankajkauilij se ueyi tet tein ika takuechouaj uan kimiktij. ¿Keyej namoteltokijkej kampa yetok tepamit tein kiyoualoua ueyi xolal?’. Komo ijkon mitsiluia, xiknankili: ‘Motakeual Urías akin poui iniuan ichankauan Het no kimiktijkej’”.
22 Takat akin Joab kititanik yajki kiitato David para kiluis nochi tein Joab kiluijka.
23 Keman ajsik, takat kiluij David: “Akin techixnamikiaj okachi chikaujkej katkaj. Yejuan kiskej de ininueyi xolal uan techteuitoj ixtauat, sayoj ke tejuan tikchiujkej maj tsinkisakan uan ajsikej hasta kampa yetok puerta.
24 Sayoj ke soldados akin kitamotaj flechas yetoyaj tepankuako uan kintamotilijkej flechas motakeualuan. Yejua ika notekiuaj sekin mikkej. Uan motakeual Urías* no kimiktijkej”.
25 Keman David kikakik nejon, kiluij takat: “Xiouj xikyolchikauati Joab uan xikilui: ‘Amo ximotajtakolti tein panok, ta ipa sekin mikij keman youij tateuitij. Okachi xikinteui akin nemij itech ueyi xolal uan ximoaxkatili’”.
26 Keman Bat-Seba kimatik ke momikilijka Urías akin katka itakatsin, peuak kichokilia.
27 Keman Bat-Seba amo kichokilijok Urías, David niman tanauatij maj kikuitij. David monamiktij iuan Bat-Seba uan kipiakej se konetsin. Sayoj ke Jehová nion tepitsin kiuelitak* tein David kichiuak.
Tajtolmelaualismej
^ Nikan ika motajtoua keman panokaya sesek ompa Israel, itech metsti marzo oso abril. Xikonita B15.
^ Oso “kaltipan”, “kalpani”.
^ Oso “akin”, “akaj”.
^ Xa satepan ke amo estemouayaok, kemej ipa kinpanoua siuamej mejmetstika.
^ Itech hebreo, “Urías akin poui iniuan ichankauan Het”.
^ Oso “kitajtoltij”.
^ Itech hebreo, “ximometspajpakati”.
^ Oso “kitoktilijteujkej”.
^ Oso “tein tekiuaj kikua”, xa katka tapalol tein akin tayoleuaya kititaniliaya aksa (akin, akaj) akin ueyichiujkej katka.
^ Xikonita tatiochiualkaxon.
^ Nejin kaltsin chijchiujtoya ika tasal.
^ Itech hebreo, “Urías akin pouia iniuan ichankauan Het”.
^ No moixmati kemej Jerubaal oso Gedeón.
^ Itech hebreo, “Urías akin pouia iniuan ichankauan Het”.
^ Itech hebreo, “kiitak ke amo kuali katka”.
