2 Samuel 12:1-31
12 Yejua ika Jehová kititanik Natán maj kiitati David. Keman Natán ajsik kampa yetoya David, kiluij: “Itech se ueyi xolal nemiaj ome takamej. Se katka tominpixkej uan okse katka pobre.
2 Takat tominpixkej kinpiaya miak ichkamej* uan kuakuejmej.
3 Sayoj ke takat akin pobre mokouilijka sayoj se ichkatsin uan semi kiyekpiaya. Ichkatsin moskaltijtiajki ichan nejon takat uan ikoneuan. Yejua kiuantia tepitsin tapalol tein kipiaya, kiamakaya itech ivaso uan kochia imako. Kiitaya kemej se isiuapil.
4 Se tonal, se takat kikalpanoko takat tominpixkej. Yejua kinekia kitamakas, sayoj ke amo kinekik kimiktilis nion semej iichkauan nion ikuakuejuan, ta kikuilito iichkatsin takat akin pobre uan kimiktilij takat akin kikalpanoko”.
5 Keman David kikakik nejon semi kualanik, uan kiluij Natán: “¡Nimitsyekiluia itokaykopa Jehová, Dios akin nochipa yoltok ke nejon takat kinamiki maj kimiktikan!
6 Uan kemej kichiuak tein tel amo kuali uan amo kiiknelij takat akin pobre, moneki kikepilis naui ichkamej para kiixtauas tein kikuilij”.
7 Natán kiluij David: “¡Tejua tikchiuak nejon! Yejua nejin tein mitsiluia Jehová ininDios israelitas: ‘Nejua nimitsixtalij kemej tekiuaj para tikinixyekanas israelitas uan nimitspaleuij para maj Saúl amo teyi mitschiuili.
8 Uan nimitsmakak nochi tein kipiaya moteko uan no nimitsinmakak isiuauan moteko. No nimitsixtalij tejua xikinixyekana ikoneuan Judá uan okseki israelitas. Uan amo sayoj nejon, ta yaya nimitsmakati okseki taman.
9 ¿Keyej tikixnamikik Jehová* uan tikchiuak tein amo kiyolpaktia? ¡Tikmiktij Urías akin pouia iniuan ichankauan Het! Tikmiktij ika ininmachete ammonitas tein ojkan tenej.* Uan satepan tikuilij isiuatsin uan iuan timonamiktij.
10 Kemej tinechixnamikik keman tikuilij isiuatsin Urías* uan iuan timonamiktij, desde axkan mochankauan nochipa tajyouiskej uan sekin fiero kinmiktiskej’.*
11 Jehová no mitsiluia nejin: ‘Desde axkan nikchiuas maj mochankauan mitstajyouiltikan. Uan nimitsinkuilis mosiuauan uan moixtenoj nikinmakas okse takat. Uan yejua motekas iniuan kampa nochin uelis kiitaskej.
12 Maski tejua nochi tikichtakachiuak, nejua nikchiuas nochi nejin ininixpan nochin israelitas’”.
13 David kiluij Natán: “Nitajtakolchiuak. Nikchiuak tein Jehová amo kiyolpaktia”. Uan Natán kiluij David: “Jehová mitstapojpoluia uan amo timikis.
14 Sayoj ke mokonetsin akin yekin yolik momikilis porin nion tepitsin tiktakachiuak* Jehová”.
15 Satepan Natán yajki ichan.
Uan Jehová kichiuak maj kokolispeuani* ikonetsin David tein kipiak iuan isiuatsin Urías.
16 David peuak kitataujtia Dios maj kipaleui ikonetsin. Mokaltentsakuak uan amo takuaya. Uan nochi youal uetstoya talpan.
17 Itakeualuan akin tatajtsitsinya yajkej kiitatoj uan kinekiaj kiajokuiskej, sayoj ke David amo kinekik. Uan amo no kinekik takuas iniuan.
18 Chikome tonal satepan konetsin mikik. Sayoj ke itakeualuan David mouiaj kiluiskej ke ikonetsin momikilijkaya. Yejuan moiluiayaj: “Keman konetsin yoltoyaok, tekiuaj amo kinekia techkakis komo teisa tikiluisnekiaj. Komo axkan tikiluiaj ke ikonetsin momikilijya, xa mochiuilis teisa”.
19 Keman David kiitak ke itakeualuan moichtakanojnotstoyaj, niman kimatik ke ikonetsin momikilijkaya. Yejua ika kintajtanij:* “¿Momikilijya nokonetsin?”. Yejuan kinankilijkej: “Kemaj, momikilijya”.
20 Uan David meuak, mopakak, moojxilij aceite, motapatilij uan yajki ichan Jehová para kiueyichiuas. Satepan mokepak ichan, tajtanik maj kitamakakan uan peuak takua.
21 Itakeualuan kitajtanijkej: “¿Keyej ijkon tikchiua? Keman konetsin yoltoyaok amo titakuaj uan titelchokaya. Sayoj ke keman momikilij, niman timeuak uan titakuaj”.
22 David kinnankilij: “Keman nokonetsin yoltoyaok amo nitakuaj uan nitelchokaya porin niknemiliaya ke Jehová xa nechikneliskia, uan amo kikauaskia maj momikili nokonetsin.
23 Sayoj ke axkan nokonetsin momikilijya uan nenkaj yeski maj amo nitakua. Amo uelis nikchiuas maj oksepa nemi. Nikyekmati ke nejua se tonal no nimikis kemej nokonetsin, sayoj ke axkan nokonetsin ipa amo nemisok”.
24 Uan David kiyolseuito Bat-Seba. Iuan motekak uan satepan kipiakej se konetsin akin kitokaytijkej Salomón.* Uan Jehová kitasojtaya in okichpiltsin.
25 Kemej Jehová kitasojtaya, kititanik tanauatijkej* Natán maj kiniluiti maj kitokaytikan Jedidías.*
26 Joab kisentokaya kinteuijtoya ammonitas akin nemiaj Rabá uan moaxkatilij se cacho den ueyi xolal kampa yetoya ichan tekiuaj.
27 Yejua ika Joab kintitanik seki takamej maj kiluitij David: “Nikinteuij akin nemij Rabá uan nimoinaxkatilij ameyalmej* tein onkak itech ueyi xolal.
28 Xikinsentili nochin soldados akin mokaujkejok uan xikinteui akin nemij ueyi xolal. Tejua ximoaxkatili para maj amo kijtokan ke nejua nikintanik”.
29 Yejua ika David kinsentilij nochin isoldados uan yajkej Rabá. Kinteuij akin ompa nemiaj uan moaxkatilij ueyi xolal.
30 Satepan kikuakixtilij icorona tatadios Malcam.* Nejin corona kikuatalilijkej David. Chijchiujtoya ika oro uan etik katka 34 kilos* uan no kikualtsintilijkaj ika tetsitsin tein patiyoj. David mokuilij nochi tein patiyoj tein kipiayaj akin ompa nemiaj.
31 Uan no, kinuikak akin ompa nemiaj para kintekitiltis. Kintajtapanaltiskia tet ika sierras, uan no kinmakaskia hachas uan okseki teposmej tein ika tatejtekiskiaj. Uan oksekin kinnauatij maj kichijchiuakan tabiques. David ijkon kinchiuilij nochin ammonitas akin nemiaj itech uejueyi xolalmej tein moinaxkatilij. Satepan David uan nochin isoldados mokepkej Jerusalén.
Tajtolmelaualismej
^ Oso “borregos”.
^ Itech hebreo, “itajtol Jehová”.
^ Oso “ininespada ammonitas”.
^ Itech hebreo, “Urías akin pouia iniuan ichankauan Het”.
^ Itech hebreo, “desde axkan amo moajchiuas de mochan se machete tein ojkan tenej (espada)”.
^ Oso “tikpoujkaitak”.
^ Oso “kokoxkakuini”.
^ Oso “kintajtoltij”.
^ Tokayit tein itech hebreo kijtosneki ‘teyolseuia’.
^ Xikonita tanauatijkej.
^ Tokayit tein kijtosneki ‘Jah kitasojta’.
^ Itech hebreo, “ueyi xolal kampa onkak at”.
^ Itech hebreo, “se talento”. Xikonita B14.
