2 Samuel 13:1-39
13 Absalón akin katka iokichpil David kipiaya se iikniuj akin monotsaya Tamar. Nejin ichpoch semi kuakualtsin katka uan Amnón okse iokichpil David kitasojtaya.
2 Amnón semi motekipachojtoya porin kitasojtaya Tamar* uan hasta kokolispeuak.* Kemej Tamar amo keman motektoya iuan se takat, Amnón kinemiliaya ke amo keman ueliskia senyetoskej.
3 Amnón kuali mouikaya iuan Jehonadab, iokichpil Simeá akin katka iikniuj David. Uan Jehonadab semi tamatkej katka uan kuali kinemiliaya keniuj kichiuas teisa.
4 Jehonadab kiluij Amnón: “Tejua tiiokichpil tekiuaj, ¿keyej mojmostaj titayokoxtok? Xinechilui toni mitspanoua”. Amnón kiluij: “Nitayokoxtok porin niktasojta Tamar, iikniuj nokniuj Absalón”.
5 Yejua ika Jehonadab kiluij Amnón: “Ximoteka uan xikchiua kemej yeskia timokokoua. Keman mopaj mitsitakiuj, xikilui: ‘Xikualtitani nokniuj Tamar maj nechchijchiuiliki tapalol tein kinchijchiuiliaj akin mokokouaj. Komo yejua nechtatekiuia,* nitakuas’”.
6 Yejua ika Amnón motekak uan kichiuak kemej yeskia mokokoua, uan tekiuaj kiitato ichan. Uan Amnón kiluij tekiuaj: “Xikilui nokniuj Tamar maj nechitaki. Maj nikan nechchijchiuili ome pantsitsin* uan maj nechtamaka”.
7 Tamar yetoya ichan keman David tanauatij maj kiluitij nejin: “Xiouj ichan mokniuj Amnón xiktakualchiuiti”.
8 Yejua ika Tamar yajki ichan Amnón uan kiitato kampa uetstoya. Kimaneloj tixti uan ompa iixpan kichijchiuilij seki pantsitsin.
9 Tamar kikuik pantsitsin uan kimakak Amnón, sayoj ke yejua amo kinekik kikuas. Amnón kiniluij nochin: “¡Xikisakan!”. Yejua ika nochin tamikiskej.
10 Uan Amnón kiluij Tamar: “Xinechualkuili pantsitsin kampa niuetstok uan nikan xinechtamaka”. Yejua ika Tamar kikuik pantsitsin tein kichijchiujka uan kiuikilij iikniuj Amnón kampa uetstoya.
11 Keman Tamar motokij para kitamakas, Amnón kikitskij uan kiluij: “Ximoteka nouan noknitsin”.
12 Sayoj ke Tamar kiluij: “¡Amo noknitsin! Amo xinechpinaujti. Nikan Israel amo ijkon tikchiuaj. Amo xikchiua tein tiknemilijtok porin semi fiero.
13 Komo tinechchiuilia nejin tein semi tepinaujtij, nochipa ika nechelnamikiskej uan tejua mitsitaskej kemej se takat akin tel amo yolkuali. Nimitstataujtia xitajto iuan tekiuaj porin yejua techkauas maj tisenyetokan”.
14 Sayoj ke Amnón amo kinekik kikakis. Uan kemej yejua okachi chikauak katka ke Tamar, kikitskij uan ika mauiltij.
15 Satepan ke Amnón ika mauiltij Tamar, peuak semi kitauelita. Uan maski achto kitasojtaya axkan semi kitauelitaya. Yejua ika kiluij: “¡Ximeua uan xiouj!”.
16 Tamar kiluij: “¡Amo noknitsin, amo xinechtoka!* ¡Nejon okachi fiero ke tein tinechchiuilijya!”. Sayoj ke Amnón amo kinekik kikakis.
17 Satepan kinotsak itakeual uan kiluij: “Xikalankixti nejin siuat uan xitatsakua ika llave”.
18 (Tamar aktiaya se kualtsin tasal tein kikuiaj isiuapipiluan tekiuaj akin ayamo monamiktiayaj).* Takeual kikalankixtij uan tatsakuak ika llave.
19 Uan Tamar mokuatemilij koujnex uan kitsayanak itasal. Yejua mokuakitskijtiaya uan tsajtsitiaya.
20 Keman iikniuj Absalón kiitak, kitajtanij:* “Mokniuj Amnón moka mauiltij, ¿melauj? Amo teyi xikijto noknitsin porin yejua mokniuj. Amo xiknenemilijtook tein mitspanok”. Desde ijkuak, Tamar peuak nemi ichan Absalón uan amo kisakok.
21 Keman tekiuaj David kimatik tein Amnón kichiuilijka Tamar, tel kualanik. Sayoj ke amo kinekia kiyolkokos iokichpil Amnón porin yejua tayekanaya uan semi kitasojtaya.
22 Absalón kitauelitaya Amnón porin kipinaujtijka iikniuj Tamar, yejua ika amo kinotsayaok.
23 Ome xiuit satepan, itakeualuan Absalón kinpanxintoyaj iichkauan* ompa Baal-Hazor. Yejua ika Absalón kinyoleuak nochin ikoneuan tekiuaj maj tatakuatij. Baal-Hazor yetoya tanakastan de kampa kintaxejxelouilijkaj ichankauan Efraín.
24 Absalón kiitato tekiuaj uan kiluij: “Nikinpanxintok noichkauan. Yejua ika notekiuaj, nimitstataujtia xiakan xitakuatij tejua uan motakeualuan”.
25 Sayoj ke tekiuaj kinankilij: “Amo nokonetsin, porin komo titamiyouij timitsteltekimakaskej”. Maski Absalón semi kitataujtiaya maj youi, tekiuaj amo kinekik yas. Sayoj ke kiluij maj kualtsin youi.
26 Yejua ika Absalón kiluij: “Komo amo tias, nimitstataujtia xikilui nokniuj Amnón maj youi”. Tekiuaj kitajtanij: “¿Uan keyej tikneki maj yejua youi?”.
27 Sayoj ke kemej Absalón semi kitataujtij tekiuaj, yejua kititanik Amnón uan no kintitanik okseki ikoneuan.
28 Satepan Absalón kinnauatij itakeualuan: “Xikitstokan Amnón uan keman nankiitaskej ke yolpaktokya porin tayitok vino, namechiluis: ‘¡Xikmiktikan Amnón!’. Keman namechiluis nejon niman xikmiktikan. Xiyolchikaujkej uan amo ximouikan porin nejua namechnauatijtok ijkon xikchiuakan”.
29 Itakeualuan Absalón kichiujkej tein kinnauatijka uan kimiktijkej Amnón. Keman okseki ikoneuan tekiuaj kiitakej nejon, moketstikiskej, mopantalijkej itech ininmula uan cholojkej.
30 Keman ikoneuan tekiuaj cholojtoyaj, kiluitoj David: “Absalón kinmiktij nochin mokoneuan, uan amo makisak nion se”.
31 Keman tekiuaj kikakik nejon, moketstikisak, kitsayanak itasal uan motekak talpan. Uan nochin itakeualuan no kitsayankej inintasal uan moketskej inakastan.
32 Sayoj ke Jehonadab, iokichpil Simeá akin katka iikniuj David, kijtoj: “Notekiuaj, amo xiknemili ke kinmiktijkej nochin mokoneuan, ta sayoj kimiktijkej Amnón. Absalón tanauatij maj kimiktikan. Yejua ipa kiixtalijkaya kimiktis porin ika mauiltij iikniuj Tamar.
33 Yejua ika notekiuaj, amo xikneltoka ke nochin mokoneuan mikkej, ta sayoj mikik Amnón”.
34 Uan Absalón choloj. Satepan, tajpixkej moixkepak uan kiitak ke miakej ualajtoyaj itech ojti tein yetok tanakastan den tepet.
35 Yejua ika Jehonadab kiluij tekiuaj David: “Notekiuaj, mokoneuan mokepkejya. Melauj tein nimitsiluij”.
36 Keman Jehonadab tamitajtoj, ikoneuan tekiuaj kalakitoj uan semi chokatiayaj. Tekiuaj uan itakeualuan no semi chokakej.
37 Absalón choloj Guesur kampa taixyekanaya Talmái, iokichpil Amihud. Uan David miak tonalmej kichokilij iokichpil Amnón.
38 Uan Absalón mokauak eyi xiuit ompa Guesur.
39 Satepan, tekiuaj David moyolseuij uan amo kichokilijok iokichpil Amnón. Yejua ika kinekiaya kiitas Absalón.
Tajtolmelaualismej
^ Tamar katka itakpaikniuj Amnón.
^ Oso “kokoxkakuik”.
^ Oso “nechtatekiuiltia”.
^ Itech hebreo, “pantsin tein tamati kemej se yolotsin”.
^ Oso “amo xinecheualti”.
^ Itech hebreo, “siuapipil akin ayamo motekayaj iuan se takat”.
^ Oso “kitajtoltij”.
^ Oso “iborregos”.
